1 Xaruya na7ay Iyo7aabi Kawoy Dawiti Abeseloome laamotidaysa eris. 2 Hessa gisho, Iyo7aabi Tequhe katamaa kiittidi, issi cinca maccas ehisis. Iiko, “Neeni kayotiya asada hana; kayo ma7o ma7a; qibaate tiyettofa; daro wodepe doomidi, hayqida asas kayotiya maccasada hana. 3 Kawako bada ha qaala iyaw oda” yaagis. Iyo7aabi iya kawas odanaba iw odis.

4 Tequhe maccasiya kawako bada biittan gufannada, “Kawaw, tana maaddarki!” yaagasu.

5 Kawoy, “Nena aybe metiday?” yaagidi oychis.

Iya, “Taani azini hayqida maccas. 6 Taw ne ayllees nam7u adde nayti de7oosona. Enti issoy issuwara denban wadhetidosona; enta shaakanaw asi dhayin, issoy issuwa shocidi wodhis. 7 Ta dabboti ubbay ta bolla dendidi, ‘Ba ishaa I wodhida gisho nuuni iya wodhana mela ba ishaa wodhida uraa nuus hamma; yaatidi nuuni laattiya asi dhaysana’ yaagidosona. Enti taw laatas attida issi duncha toysoosona; ta azinaa sunthaanne iya kochaa biittafe dhaysoosona” yaagasu.

8 Kawoy maccaseeko, “Ne soo ba; ta ne gisho kiittana” yaagis.

9 Shin Tequhe maccasiya, “Ta godaw, kawaw, gomey tananne ta aawa soo asaa oyko; shin kawoynne iya araatay geeshshi gido” yaagasu.

10 Kawoy, “Ne bolla doona pogiya oonaka taako eha; I nena nam7antho bochenna” yaagis.

11 Maccasiya, “Suuthu zaariya uray qoho bolla qoho ehonadanne ta na7aaka wodhonnaada kawoy Godaa, ba Xoossaa sunthan taw caaqo” yaagasu.

Kawoy, “De7o Goday eriya mela, ne na7aa binaanape issoyka sa7an wodhenna” yaagis.

12 Maccasiya zaarada, “Ta godaw, ta kawaw, ta issiba odeto” yaagasu.

Kawoy, “Haasaya” yaagis.

13 Maccasiya, “Yaatin, neeni Xoossa deriya bolla haysa mela qoho ayis oothadii? Kawoy dhayida ba na7aa guye zaaribeenna. Ba odida qaalan kawoy bala gidennee? 14 Nu ubbay hayqana; gukida haathi simmonnaysada nu simmoko. Shin Xoossay shempo dhayo dosenna; dogetida asi kumethi dhayonna mela iyaw oge giigisees.

15 “Tana asay yashisiya gisho ta godaa, kawas, haysa odanaw ha77i yas. ‘Taani ne aylliya, taani kawas odana; ooni eri, taani iya aylliya oychidaba kawoy oothonna aggenna. 16 Kawoy si7idi, Xoossay nuus immida laatape tananne ta na7aa dhaysanaw koyiya asaa kushepe ashshana’ gada qopas. 17 Hessadaka kawoy lo77onne iita shaakanaw Xoossa kiitancho mela gidiya gisho, ta godaa kawa qaalay tana shempiso. Goday, ne Xoossay neera gido” yaagasu.

18 Kawoy, “Taani nena oychana; neeni taape qottofa” yaagis.

Maccasiya, “Ta goday, kawoy odeto” yaagasu.

19 Kawoy maccasiw, “Haysa ubban Iyo7aaba kushey neera de7ii?” yaagidi oychis.

Maccasiya, “Ta godaw, kawaw, ne shempoy ero! Neeni ta goday, kawoy, odida ubbaafe ushachi woyko haddirsi gaanaw danda7iya asi baawa. Ee, haysa tana kiittiday, ne aylle doonan haysa wothiday ne aylliya Iyo7aaba. 20 Ne aylley Iyo7aabi haysa oothiday ha77i de7iya hanota laammanaasa. Kawaw, new Xoossa kiitancho mela cinca gidiya gisho biittan haniyaba ubbaa eraasa” yaagasu.

21 Kawoy Iyo7aabako, “Lo77o! Taani haysa oothana! Bada he na7atetha Abeseloome ekada ya” yaagis.

22 Iyo7aabi kawa sinthan gufannidi, “Ta godaw, kawaw, ba aylley oychidaba oothanaw ero gida gisho, ne sinthan saba demmidaysa ne aylley hachi eris” yaagis.

23 Hessafe guye, Iyo7aabi dendidi Geshura bidi Abeseloome Yerusalaame ekidi yis. 24 Shin kawoy, “Abeseloomey ba soo baanaw bessees; I ta som7on keyopo” yaagis. Abeseloomey ba soo bis; kawa som7uwa be7ibeenna.

25 Isra7eele giddon mala lo77otethan Abeseloome mela sabetida asi baawa. Huuphepe toho gakanaw iyan boriyabay baawa. 26 I bana deexiya wode ba huuphiya qanxisees. Ba huuphiya qanxisiya wode ubban mizaanen mazzanees; iya binaanay kawo mizaane liken nam7u kilo giraamepe aadhees. 27 Abeseloomes heedzu adde na7inne issi macca na7i yeletidosona; macca na7e sunthay Timaaro; iya mala lo77o na7a.

28 Abeseloomey nam7u laythi kumethi kawa som7o be7onna Yerusalaamen de7is. 29 Abeseloomey, “Taani nena kawako kiittanaw koyiya gisho taako haaya” yaagidi Iyo7aabako kiittis; shin Iyo7aabi yoonna ixis. Nam7antho kiittis; shin Iyo7aabi ha77ika yoonna ixis. 30 Abeseloomey ba aylletako, “Heko, ta gadiya matan Iyo7aabas gadey de7ees; iyan bangi de7ees. Bidi iyan tama yeddite” yaagis. Abeseloome aylleti Iyo7aaba bangan tama yeddidosona.

31 Iyo7aabi Abeseloome soo bidi, “Ne aylleti ta bangan ayis tama yeddidonaa?” yaagidi oychis.

32 Abeseloomey, “Ta xeegin ne yoonna ixida gishosa. Neeni kawako bada, ‘Taani Geshurape ayis yadina? Taani hanno gakanaw yan de7idaako lo77oshin’ yaagees gada taw oychana mela koyas. Ha77i taani kawa som7o be7anaw koyayis; taani bala gidiko, I tana wodho” yaagis.

33 Iyo7aabi kawako bidi, Abeseloomey gidaysa odis. Kawoy Abeseloome xeegisis; Abeseloomey soo gelidi, kawa sinthan gufannidi ziggis; kawoy Abeseloome yeeris.