1 Hessafe guye, Abeseloomey issi para gaare, paratanne ba sinthan woxanaw ishatamu asata giigisis. 2 Abeseloomey guura dendidi, katamaa pengiyan eqees. Mootoy de7iya ay asika kawa sinthe pirdas biya wode Abeseloomey xeegidi, “Neeni awu katamape yay?” yaagidi oychees. He uray, “Ta ne aylley Isra7eele zare issuwafe yas” yaagidi iyaw zaarees. 3 Abeseloomey, “Heko, ne oday lo77onne suure; shin kawa baggafe nena si7anay baawa” yaagees. 4 Abeseloomey gujidi, “Ta Isra7eele bolla pirdanaw shuumetidaba gidarkinashin. Hessi hanidaako, mootoy woyko odi de7iya oonika taako yin, taani iyaw suure pirda pirdanashin” yaagees.

5 Oonika iyako yidi iyaw ziggiya wode Abeseloomey ba kushiya yeddidi he addiya oykidi yeerees. 6 Pirdetanaw kawako yaa Isra7eele ubbaas Abeseloomey hessada hanidi Isra7eele asaa wozanaa ekis.

7 Oyddu laythafe guye, Abeseloomey, “Taani Godaas qangida qangetha gathanaw Kebroona baana. 8 Taani ne aylley Soore biittan Geshura kataman de7ashe, ‘Tana Goday Yerusalaame guye zaariko, Godaas goyinnana’ yaagada qangas” yaagis.

9 Kawoy, “Saro ba” gin, I dendidi Kebroona katamaa bis.

10 Shin Abeseloomey Isra7eele zare ubbaas qosan kiita yeddidi, “Moyze puno hinte si7ida wode, ‘Abeseloomey Kebroonan kawotis’ yaagite” yaagis. 11 Abeseloomey xeegin, Yerusalaamepe iyara bida asata tayboy nam7u xeeta. Enti he hanotaba aykoka eronna ashketethan bidosona. 12 Abeseloomey yarsho yarshiya wode Dawita zoriya asaape issuwa Akxoofela Gilo katamaape xeegisis. Kawa bolla dendida maqoy goobis; Abeseloome kaalliya asaa tayboy guji guji bis.

13 Issi kiitetida asi yidi Dawitako, “Isra7eele asaa wozanay Abeseloomera de7ees” yaagis.

14 Dawiti baara Yerusalaamen de7iya ba moorinnatako, “Dendite! Nuuni baqatoos! Yaanona ixiko, nu giddofe ay asika Abeseloomepe kessi ekenna. Nuuni ellesidi baanaw koshshees; hankoode, I ellesi yidi nuna dhaysana; nu katama mashshan buthana” yaagis.

15 Kawa moorinnati, “Nu goday, kawoy doorida ubbaa nuuni ne aylleti oothanaw giigidi uttida” yaagidosona.

16 Kawoy keydi tohora bis; iya soo asaynne iya moorinnati ubbay iyara bis; shin ba gadhuwa naagana mela tammu laggethota son ashshis. 17 Kawoy keyin asa ubbay iyara haahon de7iya issi keetha matan eqidosona. 18 Iya asati ubbay iyape sinthara salpidi aadhidosona; enta kaallidi kawa naageysati salpidosona. Qassi enta kaallidi Gaate katamaape yida usupun xeetu asati, kawa sinthara salpidi aadhidosona.

19 Kawoy Gaate addiya Itayako, “Neeni nuura ayis yay? Guye simmada, kawa Abeseloomera de7aasha. Neeni asa biitta asi; ne di7etada yida asi. 20 Neeni zine yadasa; taani ta huuphen biya soo eronna de7ashe, nena waatada daaburso? Guye simma; ne biitta asi neera efa. Goday new keehonne ammaneto!” yaagis.

21 Shin Itayi, “De7o Goday eriya mela, ta goday kawoy eriya mela, ta goday kawoy de7iya awunka, paxan gidin hayqon taani ne aylley neepe shaaketike” yaagis.

22 Dawiti, “Lo77o! Ba, aadha” yaagis. Gaate addey Itayi asaaranne naytara asa ubbaara bis.

23 He asa ubbay biya wode he biitta asay banta qaala dhoqu oothidi yeekidosona. Kawoy Qediroona zangaara pinnis; asa ubbay mela biittako simmidi bis.

24 Kahiney Saadoqi he bessan de7ees; Xoossa caaqo Taabotiya tookiya Leewetinne kahiniya Abyataari yan de7oosona. Asa ubbay katamaape keyidi wurana gakanaw Xoossa Taabotiya sa7an shempisidosona.

25 Hessafe guye, kawoy Saadoqako, “Xoossa Taabotiya katama guye zaara. Goday tanan ufaytiyaba gidiko, issi gallas guye zaaridi ba Taabotiyanne ba keethaa bessaana. 26 Shin i, ‘Nenan ufaytike’ giiko, I bana lo77iyaba ootho; taani giigeta uttas” yaagis.

27 Qassi kawoy kahiniya Saadoqako, ane akeeka “Neeni ne na7aa Akmaasanne Abyataara na7aa Yoonataana ekida katamaa saro ba. 28 Hinte taw kiittana gakanaw taani mela biittan de7iya shaafa pinuwan de7ashshana” yaagis. 29 Hessa gisho, Saadoqinne Abyataari Xoossa Taabotiya Yerusalaame guye efidi yan de7idosona.

30 Shin Dawiti yeekishe Shamaho deriya bolla keyis. I azzanon ba huuphiya guuluntidi mela tohon hemetis; iyara de7iya asati guuluntidi yeekishe pude keyidosona. 31 Akxoofeli Abeseloomera maqetidaysa Dawiti si7ida wode “Godaw, Akxoofela zoriya eeyatethi laamma” yaagidi woossis.

32 Dawiti asay Xoossaa goyinniya zumaa huuphe gakida wode, Arkaya addiya*Arkaya addiya geysi besse gidonashin koche gidanaw danda7ees. Kuussi ba ma7uwa daakidi, ba huuphiyan baana qolidi, Dawitara gahetanaw yis. 33 Dawiti, “Neeni taara biiko taw tooho gidana. 34 Shin neeni katamaa guye simmada Abeseloomeko, ‘Kawaw, haysafe kase taani ne aawa aylle gididaysada ha77i newuka aylle gidana’ yaagiko, Akxoofela zoriya laallada tana maaddana. 35 Kahineti Saadoqinne Abyataari neera yan de7oosona gidokona? Neeni kawo gadhon si7iyaba ubbaa entaw oda. 36 Saadoqa na7aa Akmaasinne Abyataara na7aa Yoonataani yan entara de7oosona; neeni si7iyaba ubbaa enta bolla taw kiitta” yaagis.

37 Abeseloomey Yerusalaame gelishin, Dawita laggey Kuussi katama gakis.