1 Dawiti deriya huuphiyara hefinthi aadhishin, Siiba geetetiya Mempiboste aylley iyara gahetis. Nam7u xeetu uythu, issi xeetu zabibe nuka, issi xeetu tiya ayfe, issi ogoro woyne ushshu nam7u haretan caanis.

2 Kawoy, “Haysa ayis ehadii?” yaagidi oychis.

Siibi, “Hareta, kawa soo asay toggana mela, uythaanne tiyiya ayfiya asay maana melanne woyne ushshay bazzon daaburiya asati uyana melasa” yaagis.

3 Kawoy, “Ne godaa na7aa na7ay awun de7ii?” yaagidi oychis.

Siibi, “ ‘Isra7eele asay ta aawa kawotethaa hachi taw zaari immana’ yaagidi Yerusalaamen uttis” yaagis.

4 Kawoy, “Mempibostes de7iyaba ubbay new gido” yaagis.

Siibi, “Abeeti godaw, kawaw! Taani ne sinthan teemo demmayis” yaagidi biittan gufannida ziggayis.

5 Kawoy Dawiti Biraqima katama yaa wode Saa7ola dabbo gidida issi addey yaape keyis. Iya sunthay Geera na7aa Saami. I Dawita baaddishe keyis. 6 Olanchotinne kawa naageysati ushacharanne haddirsara Dawita teqidi de7ishin, Saami Dawita bollanne kawa moorinnata bolla shuchu holis. 7 Saami Dawita baaddishe, “Kicha; ha iitay kicha! Asa suuthu gussiya ha pathonaysi kicha. 8 Neeni Saa7ola bessan kawotadasa; neeni gussida Saa7ola soo asaa suutha ubbaa Goday ne bolla zaaris. Goday kawotethaa ne na7aa Abeseloomes immis; neeni suuthu gussida asi gidiya gisho, new dhayo wodey gakis” yaagis.

9 Hessafe guye, Xaruya na7ay Abisi, Kawako, “Ha bawuta kanay, ta godaa kawa ayis baaddii? Taani bada iya qoodhiya qanxana” yaagis.

10 Kawoy, “Hinteno, Xaruya nayto, hintera taara aybi gathii? Goday, ‘Dawita baadda’ yaagida gisho I baaddiyaba gidiko, ‘Neeni ayis hessa oothay?’ yaagidi oychanaw danda7ey oonee?” yaagis.

11 Hessafe guye, Dawiti Abisanne ba moorinnata, “Ta na7ay, ta ashoy, tana wodhanaw koyees; yaatin, ha Biniyaame addey waati aggane! Goday iya kiitida gisho I baaddees, iya bochofite. 12 Ooni eri, Goday ta metuwa be7idi, taani hachi ekiya baadetha gisho taw keeha qopaneeko” yaagis.

13 Hessafe guye, Dawitinne iya asay ogiya oykidi boosona. Saami zumaa miyara bishe Dawita baaddees; shuchu holees; iya bolla biitta laallees. 14 Kawoynne iyara de7iya asati banta biya bessa daaburidi gakin kawoy yan shempis.

15 Abeseloomeynne Isra7eele asa ubbay Yerusalaame gelidosona; Akxoofeli entara de7ees. 16 Dawita laggey Arkaya kochay Kuussi Abeseloomeko yidi, “Kawoy birata tuussu gido! Kawoy mukulu laythi kawoto!” yaagis.

17 Abeseloomey, “Neeni ne laggiya dosiya dosoy haysee? Ne laggiyara ayis babikii?” yaagis.

18 Kuussi, “Akay! Goday, ha asaynne Isra7eele asay dooridaysas taani aqana; taani iyara attana. 19 Hiza taani ta godaa na7aas oothonna ooddes oothanee? Taani ne aawas oothidaysada ha77i newuka oothana” yaagis.

20 Abeseloomey Akxoofelako, “Neeni ane nuna zora; nuuni ay oothino?” yaagis.

21 Akxoofeli, “Kawo gadho naaganaw son attida ne aawa laggethotara bada zin7a. Neeni ne aawa kawushidaysa Isra7eele asa ubbay si7ana; neera de7iya ubbaa kushey minnana” yaagis. 22 Kawo keethaa pooqiya bolla Abeseloomes dunkaane tokidosona; asa ubbay xeellishin Abeseloomey gelidi ba aawa laggethotara zin7is.

23 He wode Akxoofeli zoriya zorey issi asi Godaa oychidi ekiya zore mela. Dawitinne Abeseloomey Akxoofela zoriya hessada oothidi ekidosona.