1 He wode kaalleyisata tayboy dari daridi bishin, Girike doona odetiya Ayhudeti Yihudan yeletidi de7iya Ayhudeta bolla zuuzumidosona. Ayis giiko, Girike doona odetiya Ayhudeti, “Gallas gallas imetiya kathan nu am7eti naaqetosona” yaagidosona. 2 Tammanne nam7u hawaareti woosa keetha asa ubbaa xeegidi, “Nuuni Xoossaa qaala odeysa aggidi kathi gishanaw bessenna. 3 Hiza, ishato, lo77o asata, Geeshsha Ayyaananinne cincatethan kumida laapun asata hinte giddofe doorite; nuuni enta ha oosuwas shuumana. 4 Shin nuuni, nu kumetha wodiya woosaninne qaala tamaarson peeshana” yaagidosona.

5 Hawaareti odida oday asa ubba ufaysis. Hessa gisho, ammanoynne Geeshsha Ayyaani kumida Isxifaanose, Filphoosa, Phirokoroosa, Niqaroona, Ximoona, Pharmenanne Ayhude ammano geli simmida Anxooke addiya Niqolawoosa dooridosona. 6 Enta hawaareta sinthan essin, hawaareti enta bolla kushe wothidi woossidosona.

7 Xoossaa qaalay dalgi dalgi bis. Yerusalaamen de7iya ammaneyisata tayboy dari daridi bis; daro kahinetika ammanidosona.

8 Isxifaanosey aadho keehatethaaninne wolqan kumidi asaa giddon oorathabatanne malaatata oothees. 9 Aylletethafe keyida ayhude woosa keetha asay Qereenapenne Iskindirepe Kilqefenne Iisepe yida issi issi asati dendidi Isxifaanosera palamidosona. 10 Shin Isxifaanosey Ayyaana wolqan odetiya cincatethaa enti eqetanaw danda7ibookona.

11 He wode enti, “Musenne Xoossaa I cayishin si7ida” giya wordo asata shammidosona. 12 Hessada oothidi biitta cimatanne higge astamaareta iya bolla denthidosona. Isxifaanose oykidi shanguwa sinthe efidosona. 13 Iya bolla paydida wordo markati, “Ha uray ha xoossa keethaanne Muse higgiya zaari zaari cayees. 14 I, ‘Haysi Naazirete Yesuusi, ha xoossa keetha laallana; qassi Musey nuus immida higgiya laammana’ yaagishin nuuni si7ida” yaagidosona.

15 Shango shiiqon uttida asa ubbay Isxifaanose loythidi xeelliya wode iya som7oy kiitancho som7o daanees.