1 Qisaaren, “Xaale ola asata” geetetiya olanchota giddon issi Qorneliyoosa geetetiya mato halaqay de7ees. 2 Qorneliyoosi ba soo asaara Xoossaa minthi ammaniya asinne Xoossaa goyinniya asi. Ayhude manqotaka daro maaddees, qassi Xoossaa ubba wode woossees. 3 Issi gallas uddufun saate heeran Xoossaa kiitanchoy iyako yidi, “Qorneliyoosa” gidi xeegishin I qoncethan geeshshidi be7is.

4 Qorneliyoosi dagammidi kiitanchuwa tishshi oothi xeellidi, “Godaw, I aybee?” yaagis.

Kiitanchoy zaaridi, “Ne woosaynne manqota ne maaddeysi Xoossaa sinthan hassayetis. 5 Ha77i Yoophe ase kiittada, Phexroosa geetetiya Simoona ehisa. 6 Phexroosi abba doonan galba haashiya Simoona son imathatethi siiratis” yaagis.

7 Qorneliyoosi baw odida kiitanchoy bin, ba aylletape nam7atanne Xoossaa goyinniya ba mata wotaadaretape issuwa xeegidi, 8 entaw ubbaba odidi Yoophe kiittis.

9 Wontetha gallas enti bidi, Yoophe katama matishin usupun saate heeran Xoossaa woossanaw Phexroosi pooqe bolla keyis. 10 I koshatidi kathi maanaw koyis, shin kathi kaxishin I qoncethi be7is. 11 Saloy dooyetin, gita afila daaniyabay oyddu baggara oyketidi wodhishin I be7is. 12 Iyan oyddu tohora de7iya meheti, wora do7ati, ulora gooshetiya medhetethatinne salo kafoti ubbay de7ees. 13 He wode, “Phexroosaa, denda eqada shukada ma” giya qaalay iyako yis.

14 Shin Phexroosi, “Godaw, akay! Ta tunabaa ubbaraka ma erike” yaagis.

15 Qassi, “Xoossay geeshshidaysa neeni tuna goopa” giya qaalay nam7antho iyako yis. 16 Hessika, heedzu toho hanidaape guye he gita afila daaneysi ellesidi pude salo eketis.

17 Phexroosi ba be7ida qoncethaa birshethay, “Ay gidandesha?” gidi ba wozanan qopishin, Qorneliyoosi kiitida asati Simoona soo oychi demmidi karen eqidosona. 18 Banta qaala dhoqu oothidi, “Phexroosa geetetiya Simoona geetetiya imathay haysan de7ii?” yaagidi oychidosona.

19 Phexroosi qoncethan be7idaba qofa bolla de7ishin, Geeshsha Ayyaanay iyako, “Heko, heedzu asati nena koyoosona. 20 Dendada wodha, taani enta kiitida gisho sidhonna entara ba” yaagis.

21 Phexroosi asatako wodhidi, “Hinte koyey tana; ayis yidetii?” yaagis.

22 Enti zaaridi, “Nuna mato halaqay Qorneliyoosi kiittis. I xillo, Xoossaa goyinniya asinne Ayhude asa ubban daro bonchetida asi. Qorneliyoosi, nena ba soo ehisidi qaala neepe si7ana mela geeshsha kiitanchoy iyaw odis” yaagidosona. 23 Phexroosi asata soo gelsidi mokis.

Wontetha gallas, dendidi entara bis. Yoophe kataman de7iya ammaneysatape issoti issoti iyara issife bidosona. 24 Wontetha gallas, Qisaare gakidosona. Qorneliyoosi ba dabbotanne ba mata laggeta issife xeegi shiishidi, Phexroosa naagees. 25 Phexroosi soo gelana hanishin, Qorneliyoosi iyara gahetidi iya sinthan kundidi iyaw goyinnanaw koyis. 26 Shin Phexroosi, “Denda, taka ta huuphen ne mela ase” yaagidi iya denthis.

27 Phexroosi Qorneliyoosara odetishe soo geliya wode daro asay shiiqidaysa demmis. 28 I asaako, “Ayhude asi hara derera issifanaw woyko gahetanaw woga gidonnaysa hinte ereeta. Shin taani oonaka tuna woyko geeshshi gidenna goonna mela Xoossay tana bessis. 29 Hessa gisho, hinte taako kiittin ixoy bayna yas. Ha77i tana ayis xeegisidaako taw odite” yaagis.

30 Qorneliyoosi, “Taani hachi oyddu gallasape kase hannoode uddufun saate woosa woossishin, phooliya ma7o ma7ida asi ta sinthan eqis. 31 I taako, ‘Qorneliyoosa, Xoossay ne woosa si7is, neeni manqota maaddidaysaka hassayis. 32 Hiza, ase Yoophe kiittada, Simoon Phexroosa geysa xeegisa. Simoon Phexroosi Simoona geetetiya galba haashiya uraa son abba doonan siiratis’ yaagis. 33 Hessa gisho, taani neeko ellesada kiittas; ne lo77o yadasa. Hiza, Xoossay nena Kiittidaba ubbaa si7anaw ha77i nuuni ubbay haysan Godaa sinthan de7oos” yaagis.

34 Kaallidika, Phexroosi, “Xoossay asa som7o be7idi ase asape shaakenna.Zaare 10:17. 35 Shin ase ubbaa oona gidikoka baw yayyeysanne xillo ooso ootheysan Xoossay ufayteysa taani tuma akeekas. 36 Xoossay, ubbaa Godaa gidida Yesuus Kiristoosa baggara sarotethaa odishe ha Wongela Isra7eele asaas kiittidaysa hinte ereeta. 37 Yohaanisi xinqateba Galilan sabbakida wodiyape doomidi Yihuda biitta ubbaa gakanaw hanidaba hinte ereeta. 38 Xoossay Naazirete Yesuusas Geeshsha Ayyaananne wolqaa immis. Xoossay iyara de7iya gisho lo77oba I oothishe Xalahe kushen haaretida ubbaa pathishe yuuyis.

39 “Ayhude biittaninne Yerusalaamen I oothida ubbabaas nuuni markata. Enti masqaliya bolla kaqidi iya wodhidosona. 40 Shin Xoossay heedzantho gallasan hayqope iya denthidi asaas qoncana mela oothis. 41 He qoncethay Xoossay koyro doorida markatasafe attishin, asa ubbaasa gidenna. I hayqope dendidaape guye iyara midanne uyida. 42 Xoossay Wongela asaas nuuni odana melanne paxa de7eyisata bollanne hayqidaysata bolla pirdanaw shuumetiday Yesuusa gideysa markatana mela nuna kiittis. 43 Xoossay iya ammaniya ubbaa nagaray, iya sunthan atto geeteteysa nabeti markatoosona” yaagis.

44 Phexroosi buroo he oda ongonnashin qaala si7iya ubbaa bolla Geeshsha Ayyaanay wodhis. 45 Phexroosara Yoophefe yida ammaniya qaxaretida Ayhude ubbay, Ayhude gidonnaysati bolla Geeshsha Ayyaanay gukida gisho malaaletidosona. 46 Gaasoyka, enti dumma dumma doonan odetishininne Xoossa gitatetha sabbishin si7idosona.

He wode Phexroosi zaaridi, 47 “Haysati qassi nu mela Geeshsha Ayyaana ekidaysati xammaqetonna mela haathe digganay oonee?” yaagis. 48 Enti Yesuus Kiristoosa sunthan xammaqetana mela enta kiittis. Hessafe guye, enti bantara guutha gallas uttana mela Phexroosa woossidosona.