1 Hawaaretinne Yihuda ubban de7iya ammaneysati, Ayhude gidonaysatika Xoossaa qaala ekidaysa si7idosona. 2 Phexroosi Yerusalaame bida wode qaxaretida ammaneysati, 3 iyako, “Neeni qaxaretiboonaysatako gelada entara kathi ayis maaddii?” yaagidosona.

4 Shin Phexroosi hanidaba koyrope doomidi maaran maaran odis: 5 “Taani Yoophe kataman Xoossaa woossashe qoncethi be7as. Gita afila daaniyabay oyddu baggara oyketidi salope wodhishe taako yis. 6 Taani tishshi ootha iya giddo xeelliya wode oyddu tohora de7iya meheta, wora do7ata, ulora gooshetiya medhetethatanne salo kafota be7as. 7 ‘Phexroosaa, denda, shukada ma’ giya qaala si7as.

8 “Shin taani, ‘Godaw, akay, tunabay woyko geeyonnabay ubbaka ta doonako shiiqi erenna’ yaagas.

9 “ ‘Xoossay geeshshidaysa neeni tuna goopa’ giya qaalay nam7antho salope yis.

10 “Hessi heedzu toho hanin, wursethan ubbabay salo pude eketis. 11 He saatenka heedzu asati Qisaarepe taako kiitetidi taani de7iya keetha gaki aggidosona. 12 Sidhonna entara bana mela Ayyaanay taw odis. Qassi ha usupun ishati Yoophefe taara Qisaare bidaysatara Qorneliyoosa soo gelida. 13 Kiitanchoy iya son eqidi, ‘Yoophe kiittada Phexroosa geetetiya Simoona xeegisa. 14 Nenanne ne soo asa ubbaa ashshiya qaala I new odana’ gidaysa Qorneliyoos nuus odis.

15 “Taani haasaya doomiya wode Geeshsha Ayyaanay koyro nu bolla wodhidaysada enta bollaka wodhi aggis. 16 He wode, ‘Yohaanisi haathan xammaqis, shin hinte Geeshsha Ayyaanan xammaqetana’ yaagida Godaa qaalay taw qofetis.Hawa 1:5. 17 Xoossay nuus Godaa Yesuus Kiristoosa ammanidaysatas immida imota Ayhude gidonaysataska immiko, yaatin Xoossaa digganaw taani oonee?” yaagis.

18 Enti hessa si7ida wode banta palama aggidi, “Yaatin, Xoossay Ayhude gidonaysatika nagarape simmidi de7on daanada qaada immis” yaagidi Xoossaa galatidosona.

19 Isxifaanose hayqos gathida goodda gaason laaletida ammaneysati qaala Ayhudeta xalaalas odishe Sirofinqe, Qophiroosanne Anxooke gakanaw yuuyidosona.Hawa 8:1-4. 20 Shin Qophiroosapenne Qereenape yida issi issi ammaniya asati Anxooke bidi, Godaa Yesuusa Wongela Girike asaaska odidosona. 21 Godaa wolqay entara de7ees; qassi daro asay ammanidi Godaako simmidosona.

22 He odaa Yerusalaamen de7iya woosa keethay si7ida gisho Barnabaasa Anxooke kiittis. 23 Barnabaasi Anxooke bida wode Xoossaa aadho keehatetha oosuwa be7idi ufaytis. Enti ubbay banta kumetha wozanan Godan minnidi daana mela enta zoris. 24 Barnabaasi Geeshsha Ayyaanaynne ammanoy kumida lo77o asi gidiya gisho daro asay Godaa ammanidosona.

25 Hessafe guye, Barnabaasi Saa7ola koyanaw Tarsesa bis. 26 Yan Saa7ola demmida wode Anxooke ekidi yis. Barnabaasinne Saa7oli woosa keetha asaara laythi kumethi uttidi daro asaa tamaarsidosona. Ammaneysati Anxooken “Kiristaane” geetetidi koyro xeegetidosona.

27 He wode issi issi nabeti Yerusalaamepe Anxooke wodhidosona. 28 Enta giddofe Agaboosa geysi dendidi biitta ubban gita koshi keyanaysa Ayyaana wolqan tinbite odis. Hessi haniday Roome Kawa Qalawudiyoosa wodena.Hawa 21:10. 29 Ammaneysati huuphen huuphen banta wolqaa mela miishe kessidi Yihudan de7iya ammaneysatas maade yeddanaw qofa qachidosona. 30 Enti hessada oothidi, miishiya Barnabaasa bollanne Saa7ola bolla woosa keethaa cimatas yeddidosona.