1 He wode Kawoy Herodiisi*Kawoy Herodiisi: Haysi kawoy Herodiisi, Herodiisa Agirpha geetetiya koyruwa. I, 37-44 Maarotetha Laytha gakanaw haaris. I kawa Herodiisas na7a na7a woosa keetha asaape baggaa goodda doomis. 2 Yohaanisa ishaa Yayqooba mashshan wodhisis. 3 Hessi Ayhudeta ufaysidaysa be7idi, gujidi Phexroosaka oythis. Hessi haniday Paasika Ba7aale bonchiya gallasatana. 4 Phexroosa oykidi qachis. Paasika bonchiya gallasatape guye deriya sinthe aathanaw qopidi, oyddu oyddu wotaadareti iya naagana mela tammanne usupun wotaadaretas aathidi immis.Kessa 12:1-27. 5 Hessa gisho, Phexroosi qasho keethan naagetees. Shin woosa keetha asay iyaw minthidi Xoossaa woossosona.

6 Herodiisi Phexroosa asaa sinthe shiishanaape kase qamma Phexroosi nam7u baggara nam7u wotaadaretara santhalaatan qashetidi enta giddon dhiskis. Naageysati qasho keethaa pengetan eqidi naagoosona. 7 Akeekona de7ishin Godaa kiitanchoy qoncis. Qasho keethan poo7oy poo7is. Kiitanchoy Phexroosa miya bochi barkisidi, “Elle denda” yaagis. Iiraka santhalaatay iya kushiyape wodhi aggis. 8 Kiitanchoy iyako, “Ne ma7uwa ma7a, ne caammaaka aatha” yaagis. Phexroosi hessada oothis; kiitanchoy, “Ne laxana ma7ada tana kaalla” yaagis.

9 Phexroosi qasho keethafe keyidi kiitanchuwa kaallis. Iyaw qoncethi be7iyaba daanisipe attishin, kiitanchoy oothiyabay tuma daanibeenna. 10 Kiitanchoynne Phexroosi koyruwanne nam7antho wotaadariya aadhidi katamaa efiya birata pengiyako gakidosona. Pengey entaw barka dooyeti aggis. Enti keyidi issi ogiyara bishin kiitanchoy akeekona Phexroosape shaaketi aggis.

11 Phexroosas wozani simmin, “Tana Goday ba kiitanchuwa kiittidi, Herodiisa kushepenne naagidi uttida Ayhude asa ubbaafe ashshidaysa ha77i tuma eras” yaagis.

12 I hessa akeekida wode daro asay issife shiiqidi Xoossaa woossiya bessaa, Marqoosa geetetiya Yohaanisa aaye Mayraami soo bis. 13 Yan karen eqidi xeegis. Issi Rooda geetetiya oosanchiya pengiya dooyanaw yasu. 14 Rooda Phexroosa qaala gididaysa erida wode ufaysan kumada kariya dooyenna guye woxa bada, “Phexroosi karen eqis” yaagada asaas odasu.

15 Asay iiko, “Neeni gooyay!” yaagidosona. Rooda Phexroosa gididaysa geeshshada odasu. Enti, “Hessi iya naagiya kiitanchuwa” yaagidosona.

16 Shin Phexroosi karen eqidi xeegidi aggonna ixin asay kariya dooyidi iya be7idi malaaletidosona. 17 Shin enti si77i gaana mela Phexroosi ba kushiyan mallidi Goday qasho keethafe iya waati kessidaako entaw qoncisi odidi, “Haysa Yayqoobasinne ammaniya asatas odite” gidi yaape keyidi haraso bis.

18 Sa7ay wontiya wode, “Phexroosi aw bide” gidi wotaadareti woli giddon daro kaccidosona. 19 Herodiisi Phexroosa koyisin, I dhayida wode naageysata qoridi, enta wodhana mela kiittis. Hessafe guye, Herodiisi Yihudape Qisaare wodhidi yan guutha wode uttis.

20 Herodiisi Xiroosa asa bollanne Sidoona asaa bolla daro hanqetis. Enta biittay kathi Herodiisa biittafe demmiya gisho enti issife gididi iya Moorinna Bilasxoosa bantaw cima oothidi giiganaw Herodiisako bidosona.

21 Herodiisi bareda gallasan ba kawotethaa afilaa ma7idi, araata bolla uttidi asaas odis. 22 Asay, “Hessi Xoossaa qaala, asa qaala gidenna” yaagidi waassidosona. 23 Herodiisi Xoossaa bonchiboona gisho iiraka Godaa kiitanchoy iya dechin guxunen meetetidi hayqis.

24 Shin Xoossaa qaalay diccishenne dalgishe bees.

25 Barnabaasinne Saa7oli banta oosuwa polidi Marqoosa geetetiya Yohaanisa bantara ekidi Yerusalaamepe simmidosona.