1 Ichashu gallasape guye kahine halaqay, Hanaani, cimataranne Xerxeluusa geetetiya issi xabaqaara Qisaare bis. Enti deriya ayseysa bolla Phawuloosa mootidosona. 2 Phawuloosi xeegetidi gelida wode, Xerxeluusi iya haysada yaagidi mootis:

“Boncho Filkisa, nuuni ne baggara daro sarotethaa demmida, ne lo77o aysuwan nu biittay daro laametis. 3 Boncho Filkisa, nuuni awunka awude gidin daro galatan hessa ekoos. 4 Taani nena gam7isonashin neeni ne keehatethan nubaa qanthan si7ana mela nena woossayis. 5 Ha uray dhube gididi biitta ubban de7iya Ayhudeta giddon buqethi medhidi Naaziraweta bagga asaa kaaletheysa gidoysa erida. 6 Hari attoshin, Xoossa Keetha tunisana hanishin nuuni iya oykida; nu higgiyada iya bolla pirdanaw qopida. 7 Shin shaalaqa Lusiyoosi yidi, wolqan nu kushepe iya wothi ekis. 8 Iya mooteysati neeko yaana mela kiittis. Neeni ne huuphen ha uraa pilgada nuuni iya mootiya mootuwa ubbaa eranaw danda7aasa” yaagis.

9 Ayhudetika, “Ha oday tuma” gidi iya qofaa ma7idosona.

10 Deriya ayseysi Phawuloosa oda gidi mallis. Phawuloosi haysada gidi zaaris: “Neeni daro wodepe doomada, ha asaas pirdashe de7eysa erada ta odas ufaysan zaaro immayis. 11 Taani Yerusalaame goyinnanaw keyin tammanne nam7u gallasape aadhonaysa neeni ne huuphen eranaw danda7aasa. 12 Ayhudeti tana Xoossaa Keethan gidin ayhude woosa keethan gidin kataman gidin ooderaka palamishin woyko asa shiishada maqishin issi asika demmibeenna. 13 Ha77ika enti tana mootiyabas marka demmanaw danda7okona.

14 “Shin taani haysa issiba ammanayis; taani higgen de7iyabaanne nabeti xaafida ubbaba ammanada, nu aawata Xoossaa, enti wordo giya ogiyan goyinnayis. 15 Enti banta huuphen ammaneysa mela xillotinne nagaranchoti hayqope dendanaysa taka ammanayis. 16 Hessa gisho, taani Xoossaa sinthaninne asaa sinthan ubba wode lo77o kahi taw daana mela minnayis.

17 “Taani Yerusalaamepe keyoosape daro laythafe guye ta biitta manqotas maade immanawunne yarsho yarshanaw Yerusalaame bas.Hawa 21:17-28. 18 Taani xoossa keethan hessa oothada geeshsha wogaa pola simmin tana demmidosona. He wode taara asi baawa, ooshshika keybeenna. 19 Shin Iisepe yida issi issi Ayhudeti hessan de7oosona; enti ta bolla oda koyko yidi tana ne bolla mootanaw danda7oosona. 20 Woyko taani shanguwa sinthe shiiqida wode oothida bali de7iko haysati ne sinthan de7eysati odonna. 21 Taani enta giddon eqada, ‘Hayqidaysati dendana gada waassada odida gisho hachi hinte sinthan ta bolla pirdoosona’ gas; hessafe haraba oothabike” yaagis.Hawa 23:6.

22 Shin Filkisi Xoossaa ogiyaba geeshshi erida gisho, “Taani hinte oda shaalaqa Lusiyoosi yaa wode pirdana” yaagidi moyzis. 23 Filkisi qassi Phawuloosa qachonna naagana melanne iya dabbotape oonika iya oychanaw yishin diggonna mela mato halaqaa kiittis.

24 Guutha gallasape guye, Filkisi Ayhude bagga gidida ba mache Dirusillara yidi Phawuloosa kiiti ehisidi Yesuus Kiristoosan ammanoba iyape si7is. 25 Phawuloosi xillotethabaa, ba huuphe haarobaanne yaanaw de7iya pirdaba odishin, Filkisi yayyidi, “Neeni ha77is ba; taw injetida wode nena xeegisana” yaagis. 26 He wode Phawuloosape wodhaafe ekanaw qopidi, iya zaari zaari xeegisidi iyara odetees.

27 Nam7u laythafe guye, Filkisa bessaa Phorqiyoos Fisxoosi ekis. Filkisi Ayhudeta ufaysanaw koyidi Phawuloosa billonna aggaagis.