1 Fisxoosi kawotida heedzu gallasape guye Qisaarepe Yerusalaame bis. 2 Yan kahine halaqatinne Ayhudeta kaaletheysati Phawuloosa mootidosona. 3 Phawuloosa Yerusalaame ehishin ogen qosetidi iya wodhanaw entaw injetana mela bantana maaddo gidi Fisxoosa woossidosona. 4 Fisxoosi entako, “Phawuloosi, Qisaaren qasho keethan de7ees; taani ta huuphenka ellesada guye simmana hanayis. 5 I balidabay de7iko hinte giddon aawateysati taara Qisaare bidi iya mootona” yaagidi zaaris.

6 Fisxoosi enta matan hospun woyko tammu gallasa mela gam7idaape guye Qisaare bis. Wontetha gallas pirda oyden uttidi Phawuloosa ehana mela kiittis. 7 I yin Yerusalaamepe yida Ayhudeti iya yuushuwan eqidi enti lathanaw danda7onna daro deexo mooto iya bolla shiishidosona. 8 Phawuloosi zaaridi, “Taani Ayhude higgiya gidin Xoossa Keethaa woyko Roome Kawa Qeesare naaqabike” yaagis.

9 Shin Fisxoosi Ayhudeta ufaysanaw koyidi Phawuloosako, “Yerusalaame bada ha mootuwaba yan ta sinthan pirdetanaw koyay?” yaagidi oychis.

10 Shin Phawuloosi, “Taani pirdetanaw bessiya Qeesare pirda keethan eqa kichas. Neeni loytha ereysada taani Ayhudeta aybinka naaqabike. 11 Hiza, taani naaqidabay woyko hayqos gathiyaba oothidaba gidiko hayqope tana ashsha giike. Shin enti tana mootiya mootoy mela gididaape guye oonika tana entaw aathidi immanaw danda7enna. Qeesarey tabaa pirdo gada oychayis” yaagis.

12 He wode Fisxoosi ba zoranchotara zoretidi, “Neeni Qeesarey tabaa pirdo gada oychadasa; Qeesareko baasa” yaagidi zaaris.

13 Guutha gallasape guye Kawoy Agirphinne Barniqey Fisxoosa sarothanaw Qisaare bidosona. 14 Yan enti daro gallas gam7in, Fisxoosi Kawas Phawuloosaba haysada yaagidi odis; “Filkisi billonna aggidi bida issi addey haysan de7ees. 15 Taani Yerusalaame bida wode kahine halaqatinne Ayhude cimati iya bolla pirdana mela tana woossidi iyabaa taw odidosona. 16 Taani, ‘Mootetida uray bana mooteyisata sinthan eqidi ba mootidabaas zaaro immonnashin, oona gidikoka aadhidi imeteysi Roome higge gidenna’ yaagada entaw zaaras.

17 “Hessa gisho, enti haysan shiiqida wode taani gam7onna wontetha gallas pirda keethaa gelada Phawuloosa ehana mela kiittas. 18 Iya mooteysati iya matan eqidi, iitaban iya mootonna aggokona gada taani qopidaysa mela iya mootibookona. 19 Shin enti banta haymaanotebanne Phawuloosi, ‘Paxa de7ees’ giya issi hayqida Yesuusa geetetiya addiyaba iyara palamoosona. 20 Ha oday tana shaakanaw metida gisho, Phawuloosi Yerusalaame bidi, yan pirdetanaw koyaako gada iya oychas. 21 Shin Phawuloosi ba oda Qeesarey iyabaa be7ana gakanaw qasho keethan gam7anaw oychis. Taani iya Qeesareko yeddana gakanaw I qashetana mela kiittas” yaagis.

22 Hessa gisho, Agirphi Fisxoosako, “Taani ta huuphenka he uray giyaba si7anaw koyayis” yaagis.

Fisxoosi iyako, “Neeni wonto I giyaba si7ana” yaagis.

23 Wontetha gallas Agirphinne Barniqey gita bonchon shaalaqataranne kataman de7iya gita asatara yidi pirda keethi gelidosona. Fisxoosi Phawuloosa xeegisidi ehis. 24 Fisxoosi, “Kawaw Agirpha, haysan nuura de7iya asaw, Ayhudeti Yerusalaamenka haysanka waassidi, ‘I hizape guye paxa daanaw bessenna’ yaagidi, tana woossida uraa haysa be7eeta. 25 Shin iya hayqos gathiyaba aybibaaka taani demmabike. I ba huuphen, ‘Qeesarey tabaa pirdo yaagada oychayis’ gida gisho, Qeesareko iya yeddanaw qofa qachas. 26 Taani iyabaa ta godaa Qeesares xaafanaw gidiya gaasoy aybika baawa. Hessa gisho, iyabaa hinte be7iko ta xaafiyabay bentaneko gada hinte sinthe ubbaraka Kawaw, Agirpha, ne sinthe iya ehas. 27 Ayis giiko, qashetida asi bolla daynnas aathiya wode I ayis mootetidaako qoncisonna aggeysi taw eeyatethi daanees” yaagis.