1 Gibxe biittafe hintena kessida, Isra7eele asaw, Goday hintew odeysa si7ite. 2 Goday, “Sa7an de7iya asa ubbaafe taani hinte xalaala dooras. Hessa gisho, hinte oothida nagara ubbaas taani hintena seerana” yaagees.

3 Nam7u asati wolla baana gidi qofa qachonna de7ishe issife hemetoona?

4 Gaammoy wodhathe demmonna woran coo gudiyee? Woyko wodala gaammoy ayko yedethidi oykonna uti dendidi sarbuqiyee?

5 Kafoy xihey bayna coo denban oyketiyee? Woyko xihey aykoy bochonna coo piriyee?

6 Katama giddon ola moyzey punetiya wode asay yashshan kokoreneyee? Woyko Goday kiittonna de7ishin dhayoy issi katama bolla yiiyee?

7 Tuma Ubbaa Haariya Goday ba xuuraa nabetas, ba oosanchotas kasetidi qoncisonna de7ishe aykoka oothenna.

8 Gaammoy gudin yayyonnay oonee? Ubbaa Haariya Goday odin, tinbite odonnay oonee?

9 Ashdoodaninne Gibxen de7iya miixa ubbaas haysada yaagidi awaajite: “Samaariya dereta bolla shiiqidi, yan de7iya iitatethaanne sugethaa be7ite” yaagite.

10 “Ha asay lo77oba oothi erokona; iitatethaninne bonqidi ehida miishen banta keethaa kunthoosona” yaagees Goday. 11 Hessa gisho, “Morkey hinte biitta teqana; hinte baasuwa laallana; hinte keethaa bonqana” yaagees Ubbaa Haariya Goday.

12 “Henthanchoy gaammo doonape nam7u shuqule woyko duuxa haythi yegisi ekeysada, Samaare biittan inje duussu de7iya Isra7eele asaape guuthati attana” yaagees Goday.

13 “Haysa si7idi Yayqooba kochata bolla haysada yaagidi markatite. 14 Taani Isra7eele asaa enta nagaraa gisho seeriya wode, Beetele kataman de7iya yarsho bessata laallana; yarsho bessan de7iya kaceti me77idi, sa7an wodhana. 15 Enti balgonne bone de7iya keethata ubbaa taani dhaysana. Enti dangarsa zaalen alleeqisidi, keexida keethaa laallana; qassi gita gita keethati ubbay dhayana” yaagees Goday, Ubbaafe Wolqaama Xoossay.