4
Isra7eeley Xoossako Simmibeenna
1 Hinteno, Baasane miizatada modhida Samaare maccasato, haysa si7ite! Hinte manqota un7etheeta; metootanchota waayetheta. Hinte azinatako, “Nuus ushshi immite” yaageeta. 2 Ubbaa Haariya Goday haysada yaagidi, ba geeshshatethan caaqis, “Hinte manxaqon oyketidi gooshetana gallasinne hintefe attida guuthati manxaqon oyketidi biya moloda hanana gallas yaana. 3 Hinte ubbay dirsa xoo7era gooshetidi, keyidi, Armoone holetana” yaagis.
4 “Hinteno, Isra7eele asaw,
Beetele bidi nagara oothite;
Galgala bidi nagara gujidi oothite.
Wonta wonta hinte yarshuwa yarshite;
heedzantho gallas gallas hinte asraata ehite. 5 Hinte oothanaw dosey hessa gidiya gisho,
Irsho yeggidi uukida oytha xuuggidi, galata yarshuwa yarshite.
Hinte hinte dosan immiya imuwa gisho, otortidi awaajite” yaagees Ubbaa Haariya Goday.
6 “Hinte katama ubban taani kosha yeddada, hari attoshin hinte achan gathiyaba dhaysas; shin hinte hessan taako simmibeketa. 7 Kathi cakiya wodey gakanaw buroo heedzu ageeni de7ishin, taani hintew ira teqas. Taani issi kataman ira bukisada hara kataman bukonnaada diggas; issi goshshan bukis; hara goshshay qassi ira dhayidi melis. 8 Hessa gisho, nam7u woyko heedzu katama asay haathe uyanaw issi katama bidosona; shin alibookona. Hessanka hinte taako simmibeketa” yaagees Goday.
9 “Taani hinte kathaa bolla harge yeddas; hinte atakiltiya, hinte woyniya hinte balasiyanne hinte shamaho ubbaa booley mis; shin hinte hessanka taako simmibeketa” yaagees Goday.
10 “Taani Gibxe asaa bolla gado yeddidaysada, hinte bolla gado yeddas. Hinte pantha nayta mashshan wodhas; hinte parati di77etana mela oothas. Hinte mootha aha xinqon ullas; shin hinte hessanka taako simmibeketa” yaagees Goday.
11 “Soodomenne Gamoora katamata dhaysidaysada hintefe darota dhaysas; hinte tamape attida duncha mela; shin hessanka hinte taako simmibeketa” yaagees Goday.
12 Hessa gisho, “Isra7eele asaw, taani hintena haysada oothada seerana. Taani hintena haysada oothada seerana haniya gisho, Isra7eele asaw, hinte Xoossara gahetanaw giigite” yaagees Goday.
13 Dereta giigisiday, carko medhiday,
ba wozana qofaa asas qoncisey,
gallasa poo7uwa dhuman laammey,
biitta dhoqa bessata bolla hemetey,
iya sunthay Godaa, Ubbaafe Wolqaama Xoossaa.