5
Isra7eeley Simmana Mela Oyshetis
1 Isra7eele asaw, taani hintew zeleeliya zelelsa si7ite!
2 “Geela7iya, Isra7eeley kundasu;
zaarada denduku.
Iya sa7an yegetasu;
iyo denthiya oonika baawa” yaagas.
3 “Isra7eele katamaape mukulu olanchota olas yeddiko, xeetu olanchota xalaali attana; katamaape xeetu olanchota olas yeddiko, tammu olanchota xalaali attana” yaagees Ubbaa Haariya Goday.
4 “Tana koyite; hinte de7on daana. 5 Shin Galgali di7etana; Beeteley dhayana gisho, Beetele koyopite; Galgala gelopite. Barsaabe pinnofite” yaagees Goday.
6 Godaa koyite; hinte de7on daana. Hessa ixiko, I Yoosefa kochaa tamada xuuggana; Beetelen de7iya asaa tami maana. He tama toysana asi baawa.
7 Hinteno, suure pirdaa mirqeysato, xillotethi sa7an yeggeysato, si7ite.
8 Piliyadisa geetetiya laapun xoolintota oothiday,
Ooriyoona geetetiya xoolinto kocata medhiday,
dhumaa poo7on, gallasa qamman laammey,
abban de7iya haathata salo pude xeegidi,
sa7a micetha bolla duge tigey, iya sunthay Godaa. 9 I miixata laallanaw wolqaamata bolla gado ehees.
10 Hintena pirdaa dabaaban seereysa ixeeta; tuma odeysa kadheeta. 11 Hinte manqota yedhidi, enta kathaa bonqeeta. Yaatidi shucha keethata gimbideta; shin hinte iyan de7eketa. Lo77o woyne tokideta; shin hinte he woyne ushsha uyeketa. 12 Hinte naaqoy ay mela daroko, hinte nagaray ay mela giteeko taani erayis. Hinte xillota naaqeta; wodhaafe ekeeta; qassi dabaaban manqota pirdaa naaqeta. 13 Hessa gisho, wodey iita gidiya gisho, hessa mela woden cinca asi si77i gees.
14 Lo77o dosite; iita ixite; hinte de7on daana. Hessa oothiko, hinte geysada, Goday, Ubbaafe Wolqaama Xoossay hintera gidana. 15 Iitabaa ixite; lo77oba dosite. Pirdaa bessan suure pirda pirdite. Ooni eri Goday, Ubbaafe Wolqaama Xoossay Yoosefa kochaafe attida guuthatas qadhetonna aggenna.
16 Hessa gisho, Goday, Ubbaafe Wolqaama Xoossay, “Dabaaba ubban waasoy si7etana; oge ubban zelelsi darana. Goshshanchoti yeeho, zeleelidi yeekiya asay zelelsas xeegetana. 17 Taani hintena seeranaw hinte giddora aadhiya gisho, woyne gade ubban yeehoy daana” yaagees.
Godaa Gallasa
18 Hinteno, Godaa gallasay yaana mela amotteysato, hintena ayye! Godaa gallasaa ayis amotteetii? He gallasay poo7o gidonashin dhuma gidana. 19 He gallasay asi gaammofe baqatidi attiya wode maahey gakeysa mela qassi ba soo gelidi, ba kushiya godaa bolla zempisiya wode shooshi dukiya asa mela gidana. 20 Godaa gallasay dhuma gidanaape attishin, poo7o gidenna; he gallasay sakana dhuma gidanaape attishin, poo7oy bayna gallas gidana.
21 “Taani hinte bonchiya ba7aaleta ixaysinne shaatettayis; hinte geeshsha shiiqoti tana ufaysokona. 22 Hinte taw xuussa yarshonne katha yarsho shiishiya wode taani ekike. Qassi hinte taw issifetetha yarshos ehiya dooretida modho meheta be7ike. 23 Hinte mazmure cancetha ta matape haassite; hinte diixiya diithaa si7ike. 24 Shin suure pirdi pulto haathada, xillotethi melonna shaafa haathada goggo.
25 “Hinteno, Isra7eele asaw, taani hintena mela biittan oytamu laythi kaalethiya wode, taw yarsho shiishidetii? Woyko imota immidetii? 26 He wode hinte, hinte kushen medhida, ‘Kawa Sakuta’ geetetiya eeqanne ‘Kewaana’ geetetiya xoolinto eeqa xoossata tookideta. 27 Hessa gisho, taani hintena di7isada Damasqo katamaape aathada haaho bessi yeddana” yaagees iya sunthay, Ubbaafe Wolqaama Xoossaa geetetiya Goday.