1 Hinteno, asay maado oychiya bonchetida Isra7eele halaqato, hinteno, Xiyoonen injen de7eysato, Samaare kataman hirgi bayna uttidaysato, hintena ayye! 2 Ane Kaline katamaa bidi be7ite. Yaape gita Hamaata katamaanne Filisxeeme katamaa Geete wodhite. Enti hinte nam7u kawotethatape aadhona? Enta biittay hinte biittafe dalgii? 3 Hinte, “Iita gallas elle yeenna” gidi, iita ooso ootheysato, 4 zaalepe oosetida arsan zin7eysato, injen uttidaysato, dorsa wudiyape anqaratanne miiza wodiyape gatarmenthuwa meysato, 5 Dawitada yetha miishe hintew giigisidi, dumma dumma yethi yexeysato, 6 woyney ushsha kerera ganeysato, al7o shitton tiyeteysato, Yoosefa kochata dhayuwan azzanonaysato, hintena ayye! 7 Hessa gisho, koyro di7etanay hintena; he wode hinte inje duussay attana.

8 Goday, Ubbaafe Wolqaama Xoossay haysada yaagidi, banan caaqis: “Taani Yayqooba otoruwa ixas; enta miixaaka shaatettas; taani katamaanne kataman de7iya ubbaa enta morketas aathada immana” yaagees.

9 Issi keethan tammu asi attiko, entika hayqana. 10 Hayqidaysata dabbotape issoy aha mooganaw soope kessi efishe, he keethan qosetida uraako, “Neera attida hara asi de7ii?” yaagidi oychana. I zaaridi, “Baawa” yaagana. Oycheysi zaaridi, “Hayza, hayza! Godaa sunthaa nuuni xeeganaw koshshenna” yaagana.

11 Godaa kiitan, gita keethati laaletana; laafa keethati meqeretana. 12 Parati zaalla bolla gaallabanaw danda7oona? Woyko goshshanchoy boori waaxidi, abba goyanaw danda7ii? Shin hinte suure pirdaa ciiye, xillotethaa camo oothideta. 13 Hinte Lodobaara katama xoonida gisho ufayteta; hinte, “Nuuni Qarnayma katamaa nu minotethan oykida” gidi ceeqeteta.

14 “Hinteno, Isra7eele asaw, taani hinte bolla hara kawotethi denthana; enti hintena Hamaata Pinuwape doomidi, Araba zangaara gakanaw un7ethana” yaagees Goday, Ubbaafe Wolqaama Xoossay.