1 Ubbaa Haariya Goday tana qoncethi bessis. He qoncethan taani kawa gakiya kathay caketidaape guye, nam7antho caarida dolaa bolla Xoossay boole wude medhishin be7as. 2 Enti irxaba ubbaa midi wursida wode taani, “Abeeti, Ubbaa Haariya Godaw, hayyana ne deriya maararki! Yayqooba zareti waanidi attanaw danda7oona? Enti ubba guutha!” yaagas.

3 Hessa gisho, Goday entaw qadhetidi, “Ha neeni be7idabay poletenna” yaagis.

4 Ubbaa Haariya Goday tana hara qoncethi bessis. Ubbaa Haariya Goday ba asaa pirdanaw tama xeegis; he tamay gita ciimmo abba mi diggidi, biitta maanaw doomis. 5 Taani, “Abeeti, Ubbaa Haariya Godaw, hayyana ha tama toysarki! Yayqooba zareti waanidi attanaw danda7oona? Enti ubba guutha!” yaagas.

6 Hessa gisho, Goday qadhetidi, “Haysi poletenna” yaagees Ubbaa Haariya Goday.

7 Qassi Xoossay tana hara qoncethi bessis. Taani he qoncethan be7iya wode, Goday tumbe oykidi, tumben liketidi gimbetida gimbiya matan eqis. 8 Goday taako, “Amoxe, neeni ay xeellay?” yaagidi oychis.

Taani, “Tumbe xeellayis” yaagas.

Goday taako, “Heko, taani ta ase gidida Isra7eele giddon tumbe yeggayis; taani enta seeronna aggike. 9 Yisaaqa kochati goyinniya dhoqa bessati laaletana; Isra7eele geeshsha bessati dhayana; Iyorbaama kawotethaa bolla taani mashshara dendana” yaagis.

10 Beetele kataman kahine gididi de7iya Amasiyaasi Isra7eele kawa Iyorbaamako haysada yaagidi kiittis: “Amoxey Isra7eele asaa giddon de7ishe, ne bolla maqetees; I ba odan biitta dhaysees. 11 I, ‘Iyorbaami mashshan hayqana; Isra7eele asay banta biittafe di7etidi baana’ yaagees” yaagis.

12 Amasiyaasi Amoxeko, “Neno tinbite odeyso, ba; Yihuda biitta bada, yan oothada aqa; yan tinbite oda. 13 Shin Beeteley kawoy goyinniya bessinne kawotetha keethi gidiya gisho, nam7antho ha bessan tinbite odopa” yaagis.

14 Amoxey zaaridi, “Taani mehiya heemmiyanne boobba ayfe maxiya asepe attishin, nabe woyko nabe na7a gidike. 15 Shin Goday tana dorsa wude heemmiya bessaafe ekidi, ‘Bada ta asaa Isra7eeles tinbite oda’ yaagis. 16 Ha77i hiza Goday giyaba si7a! Neeni, ‘Isra7eele bolla tinbite odopa; Yisaaqa kochata sabbakopa’ yaagadasa. 17 Hessa gisho, Goday, ‘Ne machiya katama giddon layma gidana; ne adde naytinne ne macca nayti mashshan hayqana. Ne biittay wodoron shaaketana; qassi neeni ne huuphen allaga biittan hayqana. Sidhey bayna Isra7eele asay banta biittafe di7etidi baana’ yaagees” yaagis.