4
Nabukadanaxoora Nam7antho Amuhuwa
1 Kawoy Nabukadanaxoori,
Asaas, kawotethatas, dumma dumma doonan odetiya kochatas haysada yaagidi dabdaabe xaafis:
Saroy hintew gido,
2 Ubbaafe Dhoqa Xoossay taw oothida, malaalsibaanne oorathaba ta hintew odanaw koyayis.
3 Iya malaatay ayba gite!
I oothiya oorathabay ayba mino!
Iya kawotethay merina kawotethi;
I yeletaape yeletaa gakanaw haarees.
4 Taani, Nabukadanaxoori ta keethan injetin, ta kawo gadhon miikotin de7ayis. 5 Issi gallas taani yashshiya amuho be7as. Taani ta arsan zin7ada, be7ida amuhoynne qoncethay tana daganthis. 6 Hessa gisho, amuhuwa birshethaa tana erisana mela Babiloonen de7iya cincata ubbaa taako ehana mela kiittas. 7 He wode maroti, muranchoti, xoolinto taybeysatinne bitanchoti taako yin, ta amuhuwa entaw odas; shin enti birshethaa tana erisanaw danda7ibookona. 8 Wursethan ta xoossaa sunthan Bilxasoora geetetidi xeegetiya, geeshsha xoossata ayyaani iyan de7iya, Daaneli taako gelin, iyaw ta amuhuwa odas.
9 Cincata halaqa gidida Bilxasoora, geeshsha xoossata ayyaani nenan de7eysanne ayba xuurika neepe geemmonaysa taani erayis. Taani be7ida amuhoy haysa; ane taw iya birshetha oda. 10 Taani ta arsan zin7ada, biittas gidi zawan issi gita mithi eqidaysa qoncethan be7as. 11 He mithay diccidi gitatisinne minnis. Iya xeeray salo gakees; sa7aa gaxape gaxa gakanaw bentees. 12 He mithaa haythay xeellanaw lo77ees; iya ayfeyka daro; iya bolla ubbaas meetetiyabay de7ees. Sa7a do7ati iya kuyan shempoosona; salo kafoti iya tashiya bolla keexidi de7oosona. De7ora de7iya ubbay iyape mees.
13 “Taani ta arsan zin7ada, geeshsha kiitanchoy salope wodhishin qoncethan be7as. 14 Ika ba qaala dhoqu oothidi, haysada yaagis: ‘Ha mithaa qanxite; iya tashiya karite; iya haytha duuthite; iya ayfiya laallite. Iya garsan de7iya do7atinne iya tashiyan uttiya kafoti ubbay baqato. 15 Shin durumaanne iya xaphuwa birataninne naase birata santhalaatan qachidi, biittan, maata giddon aggaagite. Salo akan laako; bazzon maata giddon do7ara de7o. 16 Iya kahay asape do7aysan laameto; hessada hanidi laapun laythi de7o. 17 Ubbaafe Dhoqa Xoossay asa nayta kawotetha ubbaa haareysa, kawotethi koyiya asas immeysanne hari attoshin boretidaysa shuumeysa de7on de7iya asi ubbay erana mela, hessa kiitanchoti awaajidosona; geeshshati pirdaa ehidosona’ ” yaagis.
18 “Taani, Kawoy Nabukadanaxoori be7ida amuhoy haysa: Ha77i, Bilxasoora, taw iya birshethaa oda. Ta kawotethan de7iya cincatape issoyka tana birshetha erisanaw danda7ibeenna. Shin geeshsha xoossata ayyaani nenan de7iya gisho, neeni danda7aasa” yaagas.
Daaneli Amuho Birshethaa
19 He wode Bilxasoora geetetiya Daaneli dagammidi, haniyaba dhayis. I dagammida gisho guutha wode si77i gidi gam7is. Yaatin, kawoy, “Bilxasoora, ha amuhoynne iya birshethay nena daganthofo” yaagis.
Bilxasoori zaaridi, “Ta godaw, ha amuhoy nena ixeysatas, iya birshethay ne morketas gido. 20 Ne amuhon be7ida mithay, diccidi minniday, daayidi salo gakiday, sa7a gaxape gaxa gakanaw bentiday, 21 haythay xeellanaw lo77ey, ayfey dariday, iya bolla ubbaas miyabay de7ey, do7ati iya kuyan shempidaynne salo kafoti iya tashiyan keexidi de7ey, 22 kawaw, he mithay nena. Neeni gitatadasa; minnadasa; ne gitatethay diccidi, salo gakis; ne maatay sa7aa gaxape gaxa gakis.”
23 “Kawaw, geeshsha kiitanchoy salope wodhidi, ‘Ha mithaa qanxidi dhaysite; shin iya durumaanne iya xaphuwa birataninne naase birata santhalaatan qachidi, biittan, maata giddon aggaagite. I salo akan laako; laapun laythi gakanaw woran do7ada de7o’ ” giya wode be7adasa.
24 “Kawaw, birshethay haysa: haysi Ubbaafe Dhoqa Xoossay ta godaa, kawa bolla polanaw kiitida pirda. 25 Neeni asa giddofe goodetada do7atara issife daana. Neeni boorada maata maananne salo akan laakana. Qassi Ubbaafe Dhoqa Xoossay, asa nayta kawotetha ubbaa haareysanne kawotethi ba koyida asas immeysa ne erana gakanaw, laapun laythi ne bollara aadhana. 26 Durumay xaphora biittan attanaada kiitetidaysi, salo Xoossay biitta ubbaa haareysa neeni eriya wode, ne kawotethay new simmanaysa bessees. 27 Kawaw, ta zoriya eka. Nagara ooso aggada suureba ootha; un7etidaysata naaqo aggada entaw qadheta. Ooni eri neeni saro daana wodey aduqonna aggenna” yaagis.
Amuhoy Poletis
28 Ha ubbay kawa Nabukadanaxoora bolla gakis. 29 Tammanne nam7u ageenape guye, kawoy Babiloonen de7iya kawo gadho bolla de7iya bessan simeretees. 30 Kawoy, “Taani, ta gita wolqan, ta gita bonchuwas kawoy daana mela ta keexida wolqaama Babiloone katamay haysa gidennee?” yaagis.
31 I, ba odaa wursonna de7ishin, salope haysada giya qaali yidi, “Kawa Nabukadanaxoora, ne bolla pirdetida pirday haysa: ne kawotethay neepe eketis. 32 Neeni asa giddofe goodetada, bazzo do7atara daana; ne boorada maata maana. Ubbaafe Dhoqa Xoossay asa nayta kawotetha ubbaa haareysanne I ba koyaida asas kawotethi immeysa neeni erana gakanaw laapun laythi ne bollara aadhana” yaagis.
33 Nabukadanaxoora bolla geetetidabay ellesidi poletis. Asa giddofe goodetidi, boorada maata mis. Iya asatethay salo akan laakis. Iya binaanay anko baalleda, iya xugunthayka kafo xugunthada diccis.
34 “He laapun laythay wuridaape guye, taani Nabukadanaxoori dhoqu gada salo xeellas. Ta kahay simmin, Ubbaafe Dhoqa Xoossaa galatas; merina Xoossaa bonchas; sabbas.
“I merinaape merinaw haarees;
iya kawotethay yeletethaafe yeletetha gakanaasa.
35 Sa7an de7iya asa ubbay
iya sinthan laafaba.
Salo medhetethata bollanne
sa7an asaa bolla I dosidaba oothees.
Iya kushiya teqanaw danda7ey baawa,
iya, ‘Ay oothay?’ yaagidi oychey deenna.
36 Ta kahay simmin, ta kawotethaa bonchoynne ta teemay taw simmis. Kase tana zoreysatinne ta moorinnati tana koydosona. Taani ta araatan minnas; taw kaseysafe aadhiya gitatethi guzhetis. 37 Hiza, taani Nabukadanaxoori salo kawa galatayis; iya dhoqu dhoqu oothayis; iya bonchayis. I oothiyaba ubbay like; iya oge ubbay suure; I otoron hemeteyisata kawushanaw danda7ees” yaagis.