7
Oyddu Do7ata Qoncethi
1 Babiloone kawoy Bilxasoori kawotida koyro laythan, Daaneli ba arsan zin7idi, amuhonne qoncethi be7is. Ba amuhuwan be7ida ayfe qofata xaafis.
2 Daaneli haysada yaagis: “Salope yida oyddu carkoti gita abba buqishin ta qamma qoncethan be7as. 3 Issoy issuwafe dumma gidida oyddu gita do7ati abbafe keyidosona.Qon 13:1; 17:8.
4 “Koyro do7ay gaammo daanees; iyaw argantha qefey de7ees. Ta be7ishin, iya qefey shodetin, sa7ape dendidi, asada nam7u tohon eqanaada oosetis; iyaw asa wozani imetis.
5 “Nam7antho do7ay issi bagga dhoqu gidi eqida Babanthi geetetiya do7a daanees. He do7ay heedzu gaylle meqethi ba doonan baaridi, ba achan saxidi oykis. Ika, ‘Denda; kallana gakanaw asho ma’ geetetis.
6 “Hessafe kaallada, maahe daaniya hara do7a be7as. Iya zokon kafo qefe daaniya oyddu qefeti de7oosona. Iyaw oyddu huupheti de7oosona; iyaw haaro maati imetis.
7 “Hessafe guye, qamma qoncethan yashshiya, daganthiyanne daro mino gidida oyddantho do7a be7as. Iyaw gita birata achi de7ees. I banan gahetiya ubbaa entan mentherethidi mees; attidaysata ba tohuwan yedherethees. Kase ta be7ida do7ata ubbaafe I dummatees; iyaw tammu kacey de7ees.Qon 12:3; 13:1. 8 Taani he kacetaba qopishin, enta giddofe hara issi guutha kacey keyishin be7as. He kacey hanko kacetape heedzata dhoqollidi holis. He qaciyas asa ayfe daaniya ayfeynne otoron odetiya inxarsi de7ees.Qon 13:5-6.
9 “Taani hessa be7ishin, araatati utethas giigidosona. Merinaw De7eysi ba araatan uttis; iya ma7oy shachada, iya huuphe binaanay muqaadada boothu. Iya araataynne araata gertoy tamada locees.Qon 20:4; 1:14. 10 Iya araata giddofe tama shaafi pultidi, keyees. Mukulu toho mukulan taybeteysati iyaw oothosona; tammu mukulu toho tammu mukulan taybeteysati iya sinthan eqoosona. Pirdi doometis; maxaafati dooyetidosona.Qon 5:11; 20:12.
11 “Kacey odetiya otoro qaala taani si7ida gisho, iya cadda xeellas. Taani be7ishin do7ay hayqidi, eexiya taman yeggetidi, dhayis. 12 Hanko heedzu do7ata maatay eketis; shin enti guutha wode de7on daana mela entaw imetis.
13 “Taani, qamma qoncethan, asa na7a daaneysi salope shaarara yishin be7as. Merinaw de7eysako shiiqin, iya sinthe aathidosona.Maato 24:30; 26:64; Mar 13:26; 14:62; Luqa 21:27; Qon 1:7, 13; 14:14. 14 Iyaw maati, bonchoynne kawotethi imetis; derey, kawotethatinne dumma dumma doonan odetiya ubbay haaretidosona. Iya maatay merinaw shaaretonna maata; iya kawotethaas zawi baawa.
Qoncetha Birshethi
15 “Taani, Daaneli, ta be7idaban dagammas; qoncethay tana hirgisis. 16 Taani yan eqidaysatape issuwako shiiqada, ha ubbaas tuma birshethay aybeko oychas. I taw iya birshetha ubbaa haysada yaagidi odis: 17 ‘Ha oyddu gita do7ati sa7an sinthafe dendana oyddu kawotethata. 18 Shin Ubbaafe Dhoqa Xoossaa geeshshati iya kawotetha ekidi, merinaw bantaba oothana; merinaw kawotethaa enti laattana’ yaagis.
19 “Hessafe guye, taani hara do7ata ubbaafe dumma gidida yashshiya oyddantho do7aas de7iya tuma birshethaa eranaw koyas. He do7aas birata achinne naase birata xugunthi de7ees; I banan gahetiya ubbaa mentherethidi mees; attidaysa ba tohuwan yedherethees. 20 He do7aa huuphen de7iya tammu kacetabaanne guyepe keyidi, entafe heedzata dhoqollidi yeggida guutha kaciyaba eranaw koyas. He guutha qaciyas ayfeynne otoro qaala odetiya inxarsi de7ees. He kacey hankotape aadhidi yashshees. 21 Taani be7iya wode he kacey geeshshatara oletidi, enta xoonis. 22 Hessi haniday, Merinaw De7eysi yaana gakanawunne Ubbaafe Dhoqa Xoossaa geeshshatas pirdana gakanaasa; enti kawotethaa laattiya wodey gakis.Qon 20:4.
23 “I birshethaa taw haysada yaagidi odis; ‘Oyddantho do7ay ha sa7an sinthafe dendana oyddantho kawotethaa. He kawotethay hara kawotetha ubbaafe dumma; I, biitta ubbaa maana, yedhananne mentherethana. 24 Tammu kaceti ha kawotethaafe dendana tammu kawota. Hessafe guye, kase tammu kawotape dumma gidida hara kawoy dendana. I, entafe heedzu kawota xoonidi haarana.Qon 17:12. 25 I, Ubbaafe Dhoqa Xoossaa bolla otoron odetana; Ubbaafe Dhoqa Xoossaa geeshshata un7ethana. Qassi wodetanne higgiya laammanaw amottana. Wodey, wodetinne wode baggay gakanaw, geeshshati iya maatape garsan haaretana. 26 Shin pirdi doometana; iya maatay kumethi eketana; I merinaw dhayana. 27 Salope garsan de7iya kawotethata maatay, wolqaynne gitatethay, Ubbaafe Dhoqa Xoossaa geeshshatas imetana. Iya kawotethay merinaw daana; biitta haareysati iyaw kiitetana; iya goyinnana’ ” yaagis.Qon 20:4; 22:5.
28 Ta qoncethabay haysan wuris. Taani, Daaneli, ta qofan daro dagammas; ta som7oy bido gidis. Shin ubbaba taani ta wozanan wothas.