1 Bilxasoori kawotida heedzantho laythan, taani, Daaneli, kase be7ida qoncethaafe hara qoncethi be7as. 2 He qoncethan, Elama biittan, Suusa kataman, Ubaala shaafa matan eqada tana demmas. 3 He shaafa matan nam7u adussa kaceti de7iya dorsi eqis. Nam7u kacetape issoy guyepe dolis; shin koyro dolidaysafe adusse. 4 He dorsay ba kaciyan qaycanaw, wuloha, pudehanne dugeha bagga koolishin be7as. Iyara eqetanawunne iya wolqaafe kessi ekanaw ay meheyka danda7ibeenna. I, ba koydaba oothees; yaatidi gita gidis.

5 Taani ha qoncethabaa qopishin, issi deeshi wuloha baggafe keyidi, biitta kanthidi, tohoy sa7a yedhonna yis. Iya nam7u ayfetape giddon issi gita kacey de7ees. 6 I, daro yilora, shaafa matan taani be7ida nam7u kacera de7iya dorsaako yis. 7 I, daro yilotidi, ta be7ishin, dorsaa kaceti nam7ay meqana gakanaw, iita dom7e dom7is. Dorsay iyara eqetanaw wolqi dhayis; deeshay iya sa7an yeggidi yedhidi eqis. Deesha wolqaafe he dorsa ashshiyabay baawa. 8 He deeshay daro wolqaamis; shin iya wolqay darishe bin, iya gita kacey meqis. Iya bessan oyddu gita kaceti biitta oyddu baggaa simmidi diccidosona.

9 Ha oyddu kacetape issuwa bolla hara guutha kacey dolidi, dugeha, dolohanne Isra7eele biittako simmidi wolqara diccis. 10 I, bidi salon de7iya olanchota gakanaw diccidi, salo xoolintotape guuthata sa7an yeggidi enta yedhis.Qon 12:4. 11 Salo tora mocona gidida Xoossara bana likisana gakanaw dhoqu dhoqu gis. Iyaw gallas gallas yarshetiya yarshuwa diggis; iya keethaaka tunisis. 12 Nagara gaason olanchotinne gallas gallas yarshetiya yarshoy he kaciyas imetis. Tumi sa7an holetis; he kacey oothiyaba ubbay iyaw injetis.

13 Hessafe guye, issi geeshsha kiitanchoy, hara geeshsha kiitanchuwara odetishin taani si7as. Issoy issuwa, “Gallas gallas yarshetiya yarshuwaba, dhayo ehiya makallatethaba, salo olanchotinne xoossa keethay yedhetishe daanaba odiya, qoncethay awude poletanee?” yaagidi oychis.

14 I zaaridi, “Nam7u mukulunne heedzu xeetu wontanne omarsi gakanaw gam7ana; hessafe guye, xoossa keethay geeyana” yaagidi odishin si7as.

15 Taani, Daaneli, ha qoncethaa be7ashenne iya birshetha eranaw qopashe de7ishin, issi ase daaniyabay ta sinthan eqidaysa be7as. 16 Ubaala shaafape, “Gabreela, ha addiyas ha qoncethaa birshetha oda” giya girsi si7as.

17 I, yidi ta matan eqida wode, taani dagammada, sa7an kundas. I taako, “Asa na7aw, ha qoncethay wursetha wodiyaba odeysa akeeka” yaagis.

18 I taara odetiya wode, taani sa7an ta som7uwara gufannada, tana bala aggas. I tana sa7aape denthidi, ta tohuwan essis. 19 I taako, “Ha qoncethay wursetha wodiyaba bessiya gisho, Godaa hanqo gallasan hananaw de7iyaba ta new odana. 20 Neeni be7ida nam7u kacera de7iya dorsay, Meedonanne Farse kawota leemiso. 21 Deeshay Girike kawa leemiso; iya nam7u ayfiyape giddon de7iya gita kacey Girike kawa. 22 Kace meqin iya bessan dolida oyddu kaceti iya kawotethaafe shaaketidi keyana oyddu kawotethata leemiso. Shin enta wolqay koyro kawa wolqaa gakenna.

23 “Enta kawotethaa wursethan, enta nagaray zawa gakiya wode, iitanne cimmiya kawoy dendana. 24 I daro mino gidana; shin ba wolqan gidenna. I daganthiya dhayo dhaysana; I oothiyaba ubbay iyaw injetana. I mino asatanne geeshsha asata dhaysana. 25 I cimmiya gisho iyaw injetana; I bana ubbaafe dhoqu dhoqu oothana. Enti sa7i saro gidi de7ishin, entafe darota wodhana. I halaqata Halaqaara eqetana, shin I, asi bochona baw dhayana.

26 “New odetida nam7u mukulunne heedzu xeetu wontanne omarsa qoncethay tuma. Shin ha qoncethay daro wodepe guye poletanaw de7iya gisho, maatame iya bolla wothada gordada naaga” yaagis.

27 Taani Daaneli, daro daaburida gisho, saketada daro gallas zin7as. Hessafe guye, dendada, kawa oosos bas. Ha qoncethan taani daro dagammas; akeekanaw danda7abike.