1 Ha77ika Isra7eele asaw, hinte de7on daana melanne Goday, hinte mayzata Xoossay, hintew immiya biitta hinte laattana mela ta hintena tamaarsiya wogaanne higgiya si7itenne oothite. 2 Ta hintena kiittiya, Godaa hinte Xoossaa kiitta naagitepe attishin, iya bolla aykoka gujofite; iyape aykoka pacisopite. 3 Bi7eel-Fagoora zuma bolla Goday oothidaba hinte, hinte ayfen be7ideta. Goday, hinte Xoossay Bi7eel-Fagoora eeqa goyinnidaysata ubbaa hinte giddofe dhaysis. 4 Shin hinte Godaas, hinte Xoossaas ammanetida gisho, hachi gakanaw ubbayka de7on de7eeta.

5 Heko, hinte laattanaw geliya biittan oothana mela Goday, ta Xoossay tana kiitida wogaanne higgiya ta hintena tamaarsas. 6 Hinte enta naagitenne oothite. Hinte hessa oothiko, hinte ay mela cinceko hara asay hintena be7ana. Enti ha wogabaa si7iya wode, “Tumaka ha gita kawotethay cincanne akeekancho kawotethi” yaagana. 7 Nuuni iya xeegiya wode ubban Goday, nu Xoossay nuus mata gideysada xoossi mata gidida hara ay wolqaama kawotethi de7ii? 8 Taani hachi hinte sinthan wothiya ha higge ubbaa mela xillo gidida woginne higgey de7iya hara ay gita kawotethi de7ii?

9 Hiza ne de7o laytha ubban ha ne be7idaba ubbaa dogonna melanne ne wozanan wothana mela naageta. Ne naytanne ne nayta nayta tamaarsa. 10 Koreeba zumaa bolla Godaa, hinte Xoossaa sinthan hinte eqida wode Goday taako, “Ta qaala enti si7idi, banta laytha ubban taw yayyana melanne banta nayta hessa tamaarsana mela asaa taako shiisha” gidaysa akeekite. 11 He wode hinte shiiqidi zumaa xaphon eqideta; salo gakanaw tami eexis. He zumaa xaphoy sakana dhumaninne shaaran goozetis. 12 Goday tama giddon gididi hintew odis. Hinte iya girsa si7idetape attishin, iya malaa be7ibeeketa. 13 Hinte oothana mela I hintena kiitida ba caaquwa hintew odis; hessika Tammu Kiitata. I enta nam7u loche shuchata bolla xaafis. 14 Hinte laattanaw biya biittan oothana mela wogaanne higgiya hintena tamaarsana mela Goday tana he wode kiittis.

15 Goday Koreeba zumaa bolla tama giddon gididi hintew odida gallas hinte iya malaa be7iboona gisho loythi naagetite. 16 Adde woyko macca medhon oosetidaba gidin, 17 sa7an de7iya do7a ubbaa leemison gidin, salora paalliya kafo ubbaa leemison gidin, 18 sa7a bolla ulora gooshetiya medhetetha leemison gidin, haatha giddon de7iya molo leemison gidin, hinte tunonna mela hintew xoosse oothidi medhofite. 19 Salo pude xeellida, Goday ne Xoossay salope garsan de7iya kawotethatas imida awa, ageena, xoolintotanne salo medhetethata ubbaa be7ida, ne entaw goyinnada balonna mela naageta. 20 Shin Goday hintena hachi hinte hanidaysada baw dummatida ase oothanaw birata seerisiya cooce mela gidida Gibxefe kessidi ehis.

21 Hinte gaason Goday tana hanqetidi, Yordaanose pinnonna melanne Goday hinte Xoossay, laata oothidi hintew immiya lo77o biitta taani gelonna mela caaqis. 22 Hessa gisho, taani Yordaanose shaafa pinnonna ha biittan hayqana, shin hinte pinnidi he lo77o biitta laatteeta. 23 Hiza Goday, hinte Xoossay hintera caaqida caaquwa dogopite. Goday, ne Xoossay nena oothofa gida ay medhon oosetida misile new eeqa oothonna mela naageta. 24 Goday, ne Xoossay miya tamanne qanaatiya Xoossi.

25 Ne naytanne, nayta nayta yelada he biittan adussa wode de7iya wode ay medhon oosetida misile goyinnada tuniko, qassi Godaa, ne Xoossa hanqethanaw iya sinthan iitaba oothiko, 26 hinte Yordaanose shaafa pinnidi laattanaw biya biittafe issoyka attonna elle dhayanaw de7eysas, ta hachi hinte bolla salonne sa7a markayayis. Hinte polo dhayanape attishin, he biittan adussa wode de7eketa. 27 Goday hintena hara asaa giddon laallana; hintena I laaliya kawotethata giddon hinte tayboy guutha gidana. 28 Yan hinte mithafenne shuchafe asa kushen giigida be7onna, si7onna, moonnanne singonna xoossata goyinnana. 29 Shin yan de7ashe ne Godaa, ne Xoossaa koyana; ne iya kumetha wozanapenne kumetha shempofe koyko demmana. 30 He meto ubbaa giddon ne un7etada de7iya wode wursethan Godaako, ne Xoossaako simmananne iya qaalas kiitetana. 31 Goday, ne Xoossay maarotethan kumida Xoosse gidiya gisho, I nena aggenna woyko dhaysena; ne mayzatas caaqida caaquwa dogenna.

32 Goday biittan ase medhida gallasape doomidi, hintefe kase aadhida wodiya ane pilgite; hessa mela gitabay polo hani eriyako woyko si7etidi eriyako saluwas ha gaxape ya gaxaa gakanaw ane oychite. 33 Tama laco giddon Goday haasayin si7idi, hinte dhayona de7on de7eysada Goday odishin si7idi, de7on de7ida hara asi de7ii? 34 Woyko Goday, hinte Xoossay hinte xeellishin, Gibxe biittan hintew oothidaysada paacen, malaatan, malaalsiyaban, olan, wolqaama kusheninne micetida qesen, gita yashshan hara kawotetha giddo gelidi, issi kawotethaa baw ekanaw butetida hara xoossi de7ii? 35 Goday, Xoosse gideysa hinte erana mela hessa I hintena bessis; iyape attishin, hara xoossi baawa. 36 I hintena tamaarsanaw koyida gisho, ba girsaa salope sissis. Qassi ha sa7an ba gita tama hintena bessis; he tama giddofe hinte iya qaala si7ideta. 37 I hessa oothiday hinte aawata siiqidi, entafe guye yeletiya enta sheeshata doorida gisho, hintena Gibxefe ba gita wolqan kessis. 38 Hachi hinte be7eysada, hintena gelsanawunne enta biitta hintew laata oothidi immanaw, hintefe dariyanne wolqaamiya kawotethata hinte sinthafe yedethidi kessis. 39 Hiza, bolla salon gidin, garsa sa7an gidin, Goday Xoosse gideysa erite; hinte wozanan wothite; hara xoossi baawa. 40 Hessa gisho, hintewunne hintefe guye hinte naytas ubbabay lo77o gidana mela, qassi Goday hinte Xoossay hintew merinaw immiya biittan hinte laythay aduqana mela, taani hachi hintena kiittiya wogaanne higgiya naagite.

41 Hessafe guye, Musey Yordaanose hefinthan doloha baggara heedzu katamata dummayis. 42 Hessa I dummayiday kase morketethi bayna de7ishin, eronna de7ishe ase wodhida asi yaa baqatana melasa. He uray he katamatape issuwau baqatidi ba shempuwa ashshanaw danda7ees. 43 Hessa gisho, Robeela kochaas gadhan dere bolla de7iya Boosora katamaa, Gaade kochaas Galadan de7iya Ramootanne Minaase kochaas Baasanen de7iya Goolana katamata dummayis.

44 Musey Isra7eele asaas immida Godaa higgey haysa; 45 Musey ha wogaa, awaajuwanne higgiya enti Gibxefe keyida wode immis. 46 Hessi entaw imetiday enti Beet-Pa7oora katamaa sinthan de7iya Yordaanosepe doloha baggara de7iya zangaaran de7ishina. He bessay Museynne Isra7eele asay Gibxefe keyida wode olidi xoonida, Haseboonan uttidi Amoore haariya kawa Sihoona biitta. 47 He wode enti iya biittanne Baasane kawa Ooge biitta, hessika Yordaanosepe doloha baggan de7iya nam7u Amoore kawota laattidosona. 48 He biittay Arnoona zangaaran Aro7eera katamaape bidi, Siriyoona deriya gakees; Siriyoona geetetidi xeegetiya derey Armoona zuma. 49 He biittay Yordaanosepe doloha baggara de7iya Araba biitta ubbaa ekidi bidi, Pisga deriya xaphon de7iya Maxine Abbaa gakees.