1 Hessafe guye, nuuni simmidi Baasane efiya ogiyara keyida. Baasane kawoy Oogey, ba olanchota ubbaara Edraa7a geetetiya bessan nuura oletanaw keyis. 2 Shin Goday taako, “Iyaw yayyofa; taani iya, iya olanchotanne iya biitta ubbaa ne kushen aathada immas. Haseboonan uttidi kawotida Amooreta kawa Sihoona bolla oothidaysada neeni iya bolla oothana” yaagis.

3 Hessa gisho, Goday nu Xoossay Baasane kawa Oogenne iya asa ubbaa nu kushen aathidi immis; nuuni entafe issuwaka ashshona wursidi wodhida. 4 He wode nuuni iya katamata ubbaa oykida; nuuni oykiboonna issi katamika deenna; hessika, Baasane kawa Oogey Argoba biittan aysiya usupun tammu katamata ubbaa oykida. 5 Ha katamati ubbay adussa gimben diretidaysatanne pengeti kobetidaysata. Gimbe dirsi bayna daro gutatika de7oosona. 6 Haseboona kawa Sihoona bolla oothidaysada nuuni enta kumethi dhaysida. Enta katamatan de7iya adde, maccanne na7a ashshona dhaysida. 7 Shin mehe ubbaanne katamatape di77idabaa nuus ekida.

8 He wode nuuni Arnoona zangaarape bidi Armoona zumaa gakanaw de7iya biitta, Yordaanose Shaafape doloha baggara de7iya nam7u Amoore biittata kawotape ekida. 9 (Sidoona biitta asay Armoona zumaa, Siriyoona gidi xeegiya wode, Amoore biitta asay Sanira gidi xeegosona.) 10 Nuuni demba biittan de7iya katamata ubbaa, Galada biitta ubbaa, Baasane biitta ubbaanne Baasane biittan Oogey haariya Salakanne Edraa7a katamata gakanaw de7iya bessaa oykida. 11 (Raafaymetape attiday Baasane kawa Ooge xalaala. Iya arsay birata arsi; he arsay hachi gakanaw Raaba geetetiya Amooneta kataman de7ees; iya adussatethay hospun wadha; gompay oyddu wadha.)

12 He biitta nuuni laatidaape guye, Arnoona shaafa doonan de7iya Aro7eera katamaape doomidi de7iya bessaanne derey dariya Galada biittafe baggaa gujada iya katamatara Robeelasinne Gaade kochaas taani immas. 13 Galadape attidaysanne Oogey haariya Baasane biitta ubbaa Minaase kochaa baggaas immas; hessika, Argoba kawotethaa. (He Baasane biittay ubbay Raafaymeta biitta geetetidi xeegetees. 14 Minaase kochaafe Ya7iri kumetha Argoba biitta laattis; hessika Geeshuretanne Ma7ikata biitta gaxaa gakanaw de7iya Baasane biitta. I he katamata ba sunthan xeegetana mela oothis; hessa gisho, enti hachi gakanaw, Ya7ira katamata geetetidi xeegetoosona.)

15 Galada biitta Minaase koche gidida Makiras immas. 16 Robeelanne Gaade kochaas Galadape bidi Arnoona shaafa mata gakanaw de7iya biitta immas. Dugeha baggara Arnoona Shaafape baggay enta zawa; qassi pudeha baggara Amooneta biittas gaxa gidida Yaaboqa shaafay zawa. 17 Wuloha baggara, enta zaway Araban de7iya Yordaanose shaafa gakees; hessika Galila Abbaafe doomidi Pisga zuma xaphon de7iya Maxine Abbaa (Hayqo Abbaa) gakanaasa.

18 He wode taani hintena haysada yaagada kiittas. “Goday hinte Xoossay he biitta hinte laattana mela hintew immis. Hiza hintew de7iya tooranchota ubbaa ola miishe dancisidi, hinte ishata gidida Isra7eele asaape sinthe aathite. 19 Hintew daro mehey de7eysa taani erayis; hessa gisho, hinte macheti, hinte naytinne hinte mehey taani hintew immida katamatan de7ishshona. 20 Goday hintena shempisidaysada hinte ishata shempisana gakanawunne Yordaanose shaafape hefinthan Goday, hinte Xoossay entaw immiya biitta enti ekana gakanaw entaw oletite. Hessafe guye, taani hintew immida biitta simmeta” yaagis.

21 Taani he wode Iyyasu haysada yaagada kiittas. “Goday, hinte Xoossay ha nam7u kawota bolla oothidaba ubbaa neeni ne ayfen be7adasa; hinte oykanaw biya kawotethata ubbaa bolla Goday hessada oothana. 22 Hintew oletey Godaa hinte Xoossaa gidiya gisho, entaw yayyofite” yaagis.

23 He wode taani haysada yaagada Godaa minthada woossas. 24 “Ubbaa Haariya Godaw, ne gitatethaanne ne mino kushiya tana, ne aylliya bessanaw doomadasa. Ne oothiya wolqaama oosota oothanaw danda7ey salon gidin sa7an hara xoossi de7ii? 25 Godaw, taani bada Yordaanose shaafape hefinthan de7iya derey dariya lo77o biittanne Libaanose deriya be7ana mela tana yeddarki” yaagas.

26 Shin Goday hinte gaason tana hanqetidi si7onnan ixis. Goday taako, “Hiza new gidana; ha odaa nam7antho denthada haasayopa. 27 Hessa aggada denda; Pisga zuma bolla keya; yan eqada he biitta wuloha bagga, pudeha bagga, dugeha bagganne doloha bagga ne ayfiya dhoqu oothada xeella. Neeni ha Yordaanose shaafa polo pinnaka. 28 Shin neeni Iyyasu kiitta; iya zoranne minthetha. I ha asaa kaalethidi pinthananne ha neeni be7iya biitta enta laatisana” yaagis.

29 Hessa gisho, nuuni Beet-Pa7oora sinthan de7iya zangaaran gam7ida.