1 Hessafe guye, Goday tana kiittidaysada, nuuni Zo7o Abbaa efiya ogiya oykidi guye simmidi mela biitta metootishe, derey dariya Sayre biittan daro gallasa toylatishe yuuyida.

2 Hessafe guye, Goday taako haysada yaagis. 3 “Ha derey dariya biitta adussa wode yuuyidaysi hintew gidana; pudeha bagga simmidi biite. 4 Asaa neeni yaagada kiitta; ‘Sayren de7ey Eesawe nayta hinte ishata gidiya gisho enta biittara hinte kantheeta. Enti hintew yayyana, shin hinte keehi naagetite. 5 Taani enta biittafe tohoy yedhiya bessa mela hintew immonna gisho entara oletofite. Taani derey dariya Sayre biitta laata oothada Eesawes koyrottada immas. 6 Hinte miya kathaanne uyaa haatha entafe miishen shammite’ ” yaagada kiitta.

7 Goday hinte Xoossay hinte oothidaba ubbaa anjis; hinte ha wolqaama mela biittan hemetiya wode hintena naagis. Oytamu laytha ubban Goday hinte Xoossay hintera de7is; hintew aybaaka pacisibeenna.

8 Hessa gisho, “Nuuni nu ishata gidiya Eesawe nayti de7iya Sayre biittara kanthidi bida. Qassi Elaatanne Exiyoon-Gabira katamatape dendidi, Maxine Abbaako gathiya ogiya aggidi, Moo7abe mela biittara aadhida. 9 Goday taako, ‘Taani enta biittafe aybaka hintew immonna gisho, Moo7abe asaara kacetofite woyko enta olopite. Era katamaa taani laata oothada Looxe kochaas koyro immas’ ” yaagis.

10 (He biittan kase minonne daro gidida, qassi Anaaqe kochatada adusse gidida Emimeta geetetiya asati de7idosona. 11 Enti Anaaqetada Raafaymeta geetetoosona. Shin Moo7abe asay enta Emimeta gidi xeegosona. 12 Hoora biitta asay kase Sayren de7idosona, shin Isra7eele asay laattana mela Goday entaw immida biittan enti oothidaysada Eesawa kochati Hoorata enta biittafe shoddidosona. Qassi banta sinthafe enta dhaysidi enta bessan uttidosona.)

13 Goday nuuko, “Ha77i dendite, Zareada Shaafa pinnite” yaagin, nuuni Zareda Shaafa pinnida. 14 Nuuni Qaades-Barnefe dendidi, Zareda Shaafa pinnana gakanaw hastamanne hospun laythi aadhis. He wode Goday entaw caaqidaysada olas gakida adde ubbay wuris. 15 Dunkaanida gutaape enti kumethi dhayana gakanaw, Godaa kushey enta bolla deexis.

16 Olas gakida adde asa ubbay kumethi dhaydaapenne asaa giddofe hayqidi wuridaape guye, 17 Goday taako, 18 “Era ogiyara hachi hinte Moo7abe biitta kantheeta. 19 Hinte Amoone asaa biitta gakiya wode enta bochofite woyko entara ooyetofite. Amoone asata biittafe aybibaaka taani hintew laata oothada immike. Taani he biitta Looxe kochaas laata oothada koyro immas” yaagis.

20 [He biittay kase yan de7iya asay xeegetiya sunthaa Raafaymeta biitta geetetidi xeegetees. Qassi Amooneti enta Zamzumeta gidi xeegosona. 21 Enti Anaaqetada adusse, minonne daro dere, shin Goday enta dhaysin, Amooneti enta biitta laattidi uttidosona. 22 Goday Sayren de7iya Eesawe kochaas oothidaysada, enta bolla oothis. Hessika I he biittan de7iya Hoorata dhaysin, Eesawe kochay enta biitta laattidi hachi gakanaw uttidosona. 23 Gaaza gakanaw de7iya heeran de7iya Aweeti, Kaftoore biittafe yida Kaftooreti enta dhaysidi enta biittan uttidosona.]

24 Qassika Goday nuuko, “Dendite; Arnoona Shaafa pinnite. Heko, Amoore biitta asi gidida Haseboona kawa Sihoonanne iya biitta ta hinte kushen aathada immas; iya olidi iya biitta laattite. 25 Hachife doomin salope garsan de7iya asa ubbay hintew yayyana mela taani oothana. Enti hintebaa si7iya wode ubban yashshan kokorana” yaagis.

26 Hessafe guye, Qidemoota mela biittafe Haseboona kawa Sihoonas kiitanchota bolla haysada yaagada saro qaala kiittas. 27 “Nuna ne biittara aatharki; nuuni wogga ogiya xalaala oykidi baana; iyape ushachi woyko haddirsi gooko. 28 Nuuni miya kathasinne uyaa haathas miishe qanxana. Nu koyey ne biittara kanthi aatha xalaala. 29 Sayren de7iya Eesawe kochatinne, Eran de7iya Moo7abe kochati nuna aathidaysada Goday nu Xoossay, nuus immiya biittas Yordaanose shaafa nuuni pinnana gakanaw yaara nuna aatha” yaagas. 30 Shin Haseboona kawoy Sihooney nuna aathona ixis. Goday hinte Xoossay ha77i oothidaysada iya hinte kushen aathidi immanaw koyida gisho iya wozanaa muumisisdi, otorancho oothis.

31 Hessafe guye Goday taako, “Heko, Sihoonanne iya biitta ta new aathada immo doomas; ha77i xoonada iya biitta laatta” yaagis.

32 Sihooney ba olanchota ubbaa ekidi Yahaaxa geetetiya bessan nuura oletanaw keyis. 33 Shin Goday nu Xoossay nuus iya aathidi immin, iya, iya adde naytanne iya olanchota ubbaa nuuni wodhida. 34 He wode nuuni iya katamata ubbaa oykidi, iyan de7iya adde, maccanne na7a ubbaa ashshona dhaysida. 35 Enta mehiyanne nuuni oykida katamatape di77idaysa xalaala nuus ekida. 36 Arnoona Zangaara gaxan de7iya Aro7eerapenne he zangaara giddon de7iya katamaape bidi Galada biitta gakanaw nuura eqetida issi katamika deenna. Goday nu Xoossay enta ubbaa nu kushen aathidi immis. 37 Shin nuuni Amoone biittako, Yaaboqa Shaafa gaxan de7iya biittako, gezze biittan de7iya katamatakonne Goday nu Xoossay nuuni boonna mela diggida bessaa ubbaa shiiqibooko.