1 Goday, ne Xoossay ne laattanaw biya biitta nena gelsiya wodenne neepe wolqaamanne minniya laapun kawotethata, hessatika Hiteta, Gergeseta, Amooreta, Kanaaneta, Parzeta, Hiwetanne Yaabuseta ne sinthafe gooddiya wode, 2 Goday ne Xoossay ne kushen aathidi immin, ne enta xooniya wode, enta kumethi dhaysa. Entara aybibaaka caaqofa; entaw qadhetofa. 3 Entara eketofa; geletofa. Ne macca nayta enta adde naytas immofa woyko enta macca nayta ne adde naytas ekofa. 4 Enti ne nayta tana kaalleysa aggidi hara eeqata goyinnana mela oothana. He wode Godaa hanqoy ne bolla eexana; nena ellesidi dhaysana. 5 Hessa gisho, enta yarsho bessa laallite; goyinno shucha eeqata mentherethite. Asheera geetetiya eeqa misiliya tincherethite; kushen oosetida misileta taman xuuggite. 6 Neeni, ne Godaa Xoossaas geeshsha dere. Goday, ne Xoossay nena baw dumma asi oothidi biitta bolla de7iya asa ubbaafe nena dooris.

7 Goday hintena dosidaynne dooriday hinte hara asaape taybon darida gisho gidenna. Hinte hara asa ubbaafe taybon guutha. 8 Shin Goday hintena dosida gishonne hinte mayzatas caaqida caaquwa naagida gisho, I hintena aylletetha biittafe, Gibxe kawa kushepe, ba wolqaama kushiyan kessisinne wozis. 9 Hessa gisho, Goday, hinte Xoossay Xoosse gideysa erite. I bana doseysatasinne ba kiita naageysatas mukulu yeletethi gakanaw, ba siiquwa naagiya ammanetiya Xoossi. 10 Shin I bana ixeyisata seeranawunne dhaysanaw guye geenna. 11 Hessa gisho, taani hachi new immiya kiita, awaajuwanne higgiya naaga.

12 Ne ha kiita sa7ada mintha naagiko, Goday, ne Xoossay hinte mayzatas caaqidaysada ba siiqo caaquwa new naagana. 13 I nena dosana; nena anjana; ne taybuwa darsana. Qassi I new immanaw ne mayzatas caaqida biittan ne ulo ayfiya, biitta ayfiya; kathaa, woyniya, zaytiya, mehe maratanne dorsa marata darsidi nena anjana. 14 Ne hara asaape aadhada anjetidaysa gidana. Addey woyko macci woyko ne mehey maynnena. 15 Goday harge ubbaafe nena naagana. Neeni Gibxe biittan eriya iita hargiya ne bolla ehenna, shin I nena ixiya ubbaa bolla he hargiya ehana. 16 Goday, ne Xoossay new aathidi immiya asa ubbaa qadhetonna dhaysa. Hessi new xihe gidana gisho, enta xoossata goyinnofa.

17 Neeni, ne wozanan, “Ha kawotethati taape minnoosona; yaatin, ta enta waatada gooddada kessanee?” gaanaw danda7aasa. 18 Shin entaw yayyofa. Goday, ne Xoossay, Gibxe kawa bollanne Gibxe biitta ubbaa bolla oothidaysa akeeka. 19 Goday, ne Xoossay nena Gibxefe kessiya wode oothida gita gadota, malaatata, malaalsiyabata, iya wolqaama kushiyanne iya micetida qesiya ne, ne ayfen be7adasa. Hachi ne yayiya asa ubbaa bolla Goday, ne Xoossay hessada oothana. 20 Qassi neepe baqatidi qosetidaysati dhayana gakanaw Goday, ne Xoossay enta giddon kazhe yeddana. 21 Hessa gisho, ne entaw yayyofa; neera de7iya Goday, ne Xoossay, gitanne yashshiya Xoossi. 22 Goday, ne Xoossay he kawotethata guuthara guuthara gooddidi, ne sinthafe dhaysana. Ne enta ubbaa issi toho dhaysaka; hessa ne oothiko, biittan de7iya do7ati daridi nena waaysana. 23 Shin Goday, ne Xoossay enta ne kushen aathidi immana; enti dhayana gakanaw I enta daganthana. 24 Enta kawota ne kushen aathidi immana. Ne enta suntha salope garsan quchada dhaysana. Oonika neera eqetidi danda7enna; ne enta dhaysana.

25 Kushen oosetida enta eeqa misileta taman xuugga. He misileta bolla de7iya bira woyko worqaa amottofite; nebaa oothada ekofa. Hessi Godaas, ne Xoossaas tuna gidiya gisho, iyape ne ekiko new xihe gidana. 26 Enti banta huuphen baadetidaysata gidiya gisho, ne he tuna eeqata ne soo gelsada, enta mela baadetidaysata gidopa. Enta kumethi ixa; shaateta.