1 Hinte de7on daana mela, hinte tayboy darana melanne Goday kase hinte mayzatas immana gidi caaqida biitta gelidi, hinte laattana mela hachi ta hintena kiittiya kiita ubbaa minthidi naagite. 2 Goday, ne Xoossay new immida kiita ne naagiyakonne naagonnaako, ne wozanaa qofaa eranaw nena paacanawunne nena aada oothanaw oytamu laythi kumethi nena mela biittan waati kaalethidaako akeeka. 3 Aadatethi erisanaw nena koshaysis; yaatidi ne woyko ne mayzati eronna Manna nena muzis. Hessa I oothiday asi Godaa doonape keyiya qaala ubbaanape attishin, katha xalaalan de7onnaysa nena tamaarsanaasa. 4 Ha oytamu laythata giddon ne ma7ida ma7oy wuribeenna; ne tohoy kixibeenna. 5 Asi ba na7a seereysada Goday, ne Xoossay nena seeroysa akeeka.

6 Iyaw yayyashenne iya bonchashe Godaa ne Xoossaa kiitaa naaga. 7 Goday ne Xoossay nena zangaarapenne deriyape goggiya shaafatinne pultoti de7iya lo77o biitta gelsanaw ehis. 8 He biittay gisteynne bangi, woyneynne balasey, oromaaney, shamaho zayteynne eessi kumida biitta. 9 He biittay aykoyka paconna hinte kallidi miya biitta. He biittay birati shuchada gela gidida biitta. Zumaape madabe birata bookidi ekiya biitta. 10 Ne mada kallida wode new I immida lo77o biitta gisho, Godaa ne Xoossaa galata. 11 Ta hachi nena kiittiya iya kiita, iya higgiyanne iya awaajuwa naagonna ixada, Godaa ne Xoossaa dogonna mela naageta. 12 Ne mada kalliya wode, lo77o keethi keexada iyan de7iya wode, 13 ne meheynne dorsay dariya wode, new birinne worqi dagaayetiya wode, new de7idabay ubbay dariya wode, 14 he wode, ne wozanay otortonna mela, Gibxe aylletetha keethaafe nena wozida Godaa, ne Xoossaa dogonna mela naageta. 15 I nena iita shooshaynne korney kumida, haathi bayna, gitanne yashshiya mela biittara nena kaalethidaysa dogopa. I new mela biittan zaallafe haathe dhuusis. 16 Ne mayzati eronna mannaa I nena mela biittan muzis. Wursethan new ubbabay injetana mela nena aada oothanawunne paacanaw hessa oothis. 17 Neeni, “Ta wolqaynne ta kushe minotethay ha duretetha taw ehis” goonna mela naageta. 18 Shin ne duretana mela new wolqa immiday Godaa, ne Xoossaa gideysa akeeka. I hessa oothiday, hachi ne be7eysada, ne mayzatara caaqida caaquwa minthanaasa.

19 Shin hinte Godaa hinte Xoossaa aggidi, hara xoossata kaalliko, entaw hokikonne goyinniko, hinte tuma dhayanaysa ta hachi markatayis. 20 Goday, hinte Xoossay hara kawotethata hinte sinthafe dhaysidaysada hinte iyaw kiitetonna ixiko hintenaka dhaysana.