1 Neno, Isra7eele si7a; neepe gitatiyanne wolqaamiya kawotethata, gimbey salo gakida gita katamata laattanaw hachi Yordaanose pinnaasa. 2 He biittan de7iya asay minonne adusse. Neeni, “Oonika entara eqetanaw danda7onna Anaaqe kochata” gishin si7adasa. 3 Shin miya tamada neepe sinthara bey Godaa, ne Xoossaa gideysa hachi era. I enta dhaysananne ne sinthan enta kawushana. Goday new gidaysada ne enta gooddada kessananne ellesada dhaysana.

4 Goday, ne Xoossay enta ne sinthafe gooddidaape guye, ne wozanan, “Taani xillo gidiya gisho, ha biitta ta laattana mela Goday tana ehis” goopa. Goday enta ne sinthafe yedethidi kessiday enti iita gidiya gishosa. 5 Ne enta biitta laattanaw yiday ne xillonne suure gidiya gisho gidenna. Shin Goday, ne Xoossay enta ne sinthafe gooddiday ha kawotethati iita gidiya gishonne beni ne mayzatas Abrahaames, Yisaaqasinne Yayqoobas caaqida caaquwa naaganaassa. 6 Hiza ne hessa akeeka. Goday, ne Xoossay ha lo77o biitta nena laatisey ne xillotethaa gishosa gidenna; neeni wozani muumida asi.

7 Godaa, hinte Xoossaa mela biittan waatidi yiloyidaako dogopite. Hinte Gibxe biittafe keyida gallasape doomidi, hachi ha bessaa gakanaw Godaa bolla makallideta. 8 Koreeba zumaa bolla Goday hintena dhaysanaw dendana gakanaw hinte Godaa yiloyideta. 9 Goday hintera caaqida caaqoy xaafetida loche shuchata ekanaw taani zumaa bolla keyida wode, yan kathi moonnanne haathe uyonna oytamu gallasinne oytamu qamma gam7as. 10 Hessafe guye, Xoossa biradhen xaafetida nam7u loche shuchata Goday taw immis. Hinte zumaa xaphon shiiqida wode tama giddon Goday hintew immida kiitati he loche shucha bolla xaafetidi uttidosona. 11 Oytamu gallasapenne qammafe guye, Goday ba caaqo qaalay xaafetida nam7u loche shuchata taw immis. 12 Hessafe guye, Goday taako, “Ellesada haysafe duge wodha; neeni Gibxefe kessida ne asay tunis; enti ta kiitaa eeson aggidi, kushen oosetida eeqa goyinnanaw simmidosona” yaagis.

13 Qassika Goday taako, “Taani ha asaa be7as; enti tuma wozana muume asi. 14 Hiza ta enta dhaysona melanne enta sunthaa biitta bollafe quchonna mela tana diggofa. Ta nena entafe minonne dariya kawotethi kessana” yaagis.

15 Taani caaqo qaalay xaafetida nam7u loche shuchata ta kushen oykada zumaa bollafe wodhas; he wode tama lacoy zumaa bolla bentees. 16 He wode Godaa, hinte Xoossaa bolla hinte nagara oothidaysa be7as. Hinte mara misilen oosetida worqa eeqa giigisideta. Goday, hintena kiitida ogiyape eeson hara soo simmideta. 17 Taani ta kushen oykida nam7u loche shuchata holada hinte be7ishin menthas. 18 Hessafe guye, Godaa yiloyanaw hinte iya sinthan iita ooso oothidi, nagara oothida gisho, kaseysada oytamu gallasinne oytamu qamma Godaa sinthan gufannada gam7as; he wode ta kathi mabike; haathe uyabike. 19 Goday hinte bolla yilotidi dhaysanaw dendida gisho taani yayyas. Shin Goday zaaridi tana si7is. 20 Qassi Goday yilotidi Aaronaka dhaysanaw koyis; shin taani he wode Aaronas woossas. 21 Taani hinte nagaran kumida he mara misiliya ekada, taman xuuggas. Iya tincheretha gaaccada dhiille kessas; he dhiilliya zumaape goggiya haathara yeddas.

22 Qassi hinte Taaberan, Masahaninne Qibiroot-Hatawan Godaa yiloyideta. 23 Goday hinteko, “Bidi, taani hintew immida biitta laattite” yaagidi, Qaades-Barnefe yeddida wodeka hinte Godaa, hinte Xoossaa kiita ixidi makallideta. Iyaw ammanetibeketa woyko iya qaalas kiitetibeketa. 24 Taani hintena erida wodiyape doomidi, hinte Godaas makallideta.

25 Goday hintena dhaysana gida gisho, taani oytamu gallasinne oytamu qamma Godaa sinthan gufannada gam7as. 26 Taani Godaa Xoossaako haysada yaagada woossas; “Abeeti Ubbaa Haariya Godaw, neeni ne gita wolqan wozidanne ne mino kushen Gibxefe kessida, ne laata gidida ne asaa dhaysofa. 27 Ne aylleta, Abrahaame, Yisaaqanne Yayqooba qopa; enta wozanaa minotethaa, enta iitatethaanne enta nagaraa taybopa. 28 Hessi hanonna attiko, neeni nuna yaape kessida Gibxe asay, ‘Goday entaw immana gida biitta gelsanaw danda7iboona gishonne enta ixida gisho, mela biittan wodhanaw enta kessis’ yaagana. 29 Gidoshin, ha asay neeni ne gita wolqaaninne ne micetida qesen Gibxefe kessida ne laata gidida ne asaa” yaagas.