1 He wode Goday taako, “Koyroysa mela nam7u loche shuchata giigisada taako zumaa bolla keya. Qassi iya wothanaw mithafe taabote ootha. 2 Taani kase ne menthida shuchata bolla de7iya qaalata ha shuchata bolla xaafana; ne enta taabotiya giddon wotha” yaagis.

3 Taani soqala mithafe taabote oothas. Kaseysa mela nam7u loche shuchata giigisas; he shuchata ta kushen oykada zumaa bolla keyas. 4 Hinte zumaa xaphon shiiqida gallas, tama giddofe Goday hintew odida qaalata, hessika Tammu Kiitata, kase xaafidaysata he shuchata bolla Goday xaafidi enta taw immis. 5 Hessafe guye, taani zumaa bollafe wodhada, Goday tana kiittidaysada, he shuchata ta oothida Taabotiya giddon wothas; ha77ika enti yan de7oosona.

6 Isra7eele asay Ba7aarota Benyaqanape dendidi, Musera bidosona. Aaroni yan hayqidi moogetis; iya na7ay Alaazari iya laattidi, iya bessan kahine halaqa gidis. 7 Enti yaape Gudgoda geetetiya bessa bidosona; yaape qassi goggiya haathati de7iya Yoxibaata geetetiya bessa bidosona. 8 He wode Godaa caaqo Taabotiya tookana mela, Godaa sinthan eqidi iya haggaazana melanne hachi gakanaw enti ootheysa mela Godaa sunthan anjana mela Leewe kochaa Goday baw dummayis. 9 Hessa gisho, Leewe kochaas enta ishata giddon gishoy woyko laati baawa; Goday, hinte Xoossay entaw gidaysada enta laatay Godaa.

10 Taani kaseysada oytamu gallasinne oytamu qamma zumaa bolla gam7as. Goday zaaridi ta woosa si7idi hintena dhaysanaw koybeenna. 11 Goday taako, “Taani enta aawatas immana gada caaqida biitta enti gelana melanne laattana mela ha asaa kaaletha” yaagis.

12 Neno, Isra7eele, Goday neepe koyey haysa; Godaa, ne Xoossaa yayya; iya ogiya ubban ba; iya dosa; ne kumetha wozanapenne ne kumetha shempuwafe Godaa ne Xoossaas ootha. 13 New injetana mela taani hachi new immiya Godaa kiitatanne awaajota naaga.

14 Saloynne salope bollara de7iya saloti, qassi sa7inne sa7an de7iya ubbay Godaa, ne Xoossaaba gideysi tuma. 15 Gidoshin, Goday hinte mayzatan ufaytidi, enta siiqis; hachi hinte be7eysada entafe guyen enta sheeshi gidida hintena kawotethata ubbaafe aathidi dooris. 16 Hessa gisho, hinte wozanaa qaxarite; hizape hinte wozanaa minthofite. 17 Goday, hinte Xoossay xoossata Xoossinne godata Godaa. I gita Xoossi; I wolqaamanne yashshiya Xoossi. I som7o be7idi pirdenna; wodhaafe ekenna. 18 I yi7otasinne am7etas suure pirdees; betanchuwa siiqidi, iyaw kathinne ma7o immees. 19 Hinteka betanchota siiqite; hinte hinte huuphen bete asi gididi Gibxen de7ideta. 20 Godaa, ne Xoossaa yayya; iyaw ootha; iyara oyketa; iya sunthan caaqa. 21 Neeni ne ayfen be7ida gitanne yashshiya malaalsiyabata new oothiday, I ne galataa; ne Xoossaa. 22 Gibxe biitta wodhida hinte mayzati kumethi laapun tamma; ha77i Goday, hinte Xoossay hintena salo xoolintotada darsis.