1 Hiza Godaa, ne Xoossaa dosa; iya awaajuwa, wogaa, iya higgiyanne iya kiita ubba wode naaga. 2 Hinte nayti be7onnabaanne eronnabaa gidikoka, hinte hachi Godaa seera, iya gitatetha, iya wolqaama kushiyanne micetida qesiya be7idaysa akeekite. 3 Hinte I oothida malaatatanne Gibxe kawa bollanne iya biitta ubbaa bolla oothida malaalsiyabata be7ideta. 4 Enti hintena kaallidi gooddida wode, Goday Gibxe biitta olanchota, enta paratanne para gaareta Zo7o Abban mitisidi, hachi gakanaw enta kumethi dhaysidaysa be7ideta. 5 Hinte ha bessaa gakanaw mela biittan Goday hintew oothidaba hinte ereeta. 6 Robeela kochaafe Eli7aaba nayta gidida Daatane bollanne Abeero bolla Goday oothidaysa akeekite. Isra7eele asa ubbay be7ishin, biittay dooyetidi, enta, enta soo asaa, enta dunkaaniyanne shempora de7iya entaba ubbaa mittis. 7 Goday oothida ha gita oosota ubbaa hinte, hinte ayfen be7ideta.

8 Hiza hinte mino gidana melanne Yordaanose pinnidi hinte ekanaw biya biitta laattana mela taani hachi hintena kiittiya kiita ubbaa naagite. 9 Hinte kiitetiko, Goday hinte mayzatasinne enta kochaas immana gidi caaqida, maathinne eessi goggiya biittan hinte adussa laythi daana. 10 Ne laattanaw biya biittay, ne keyada yida Gibxe biitta mela gidenna. Gibxen ne kathi zerada, goshsha biitta ubbaa atakilte bessada haathe ushshaasa. 11 Shin Yordaanose pinnidi hinte laattanaw biya biittay, dereynne zangaaray de7iya, salo iran aliya biitta. 12 He biittay, Goday ne Xoossay naagiya biitta; laytha doomethaafe bidi laytha wursethaa gakanaw Godaa, ne Xoossaa ayfey iya bolla de7iya biitta.

13 Hessa gisho, Godaa, hinte Xoossaa siiqiko, hinte kumetha wozanapenne hinte kumetha shempuwafe iya goyinniko, taani hachi hintew immiya kiita hinte naagiko, 14 ne kathi, woyney zaytey paconna shiishana mela torchenne sila ira woden woden bukisana. 15 Goday ne mehiyas maata darsana; ne maana; kallana.

16 Hinte wozanaa hara soo zaaridi, hara xoossata goyinnona melanne hokonna mela naagetite. 17 Hessa hinte oothiko, Godaa hanqoy hinte bolla eexana; iray bukonna melanne kathi dolonna mela I saluwa gordana. Hinte Goday hintew immiya lo77o biittafe eeson dhayana.

18 Hiza, ha kiitata hinte wozanaaninne hinte qofan wothite. Mallada enta hinte kushen qachite; qassi hinte som7on qachite. 19 Hinte nayta tamaarsite. Hinte son de7iya wode, ogen hemetiya wode, zin7iya wodenne dendiya wode entaw odite. 20 Hinte penge zizgiya bollanne hinte dirsa pengiya bolla xaafite. 21 Hessa hinte oothiko, Goday hinte mayzatas immana gidi caaqida biittan, hinte laythaynne hinte nayta laythay sa7ape bollara de7iya salo mela gidana.

22 Hinte Godaa, hinte Xoossaa dosiko, iya oge ubban hinte biiko, iyaw ammanetiko, ta hachi hintew immiya kiita hinte minthidi naagiko, 23 Goday ha kawotethata ubbaa hinte sinthafe gooddidi kessana. Hintefe dariyanne wolqaamiya kawotethata biitta yegisidi ekana. 24 Tohon hinte yedhida biitta ubbay hintebaa gidana. Hinte zaway dugeha mela biittafe bidi Libaanose gakanawunne Efraxiisa shaafape bidi Gita Abbaa gakanaw gidana. 25 Hintera ay asika eqetanaw danda7enna; Goday, hinte Xoossay hintew gidaysada hinte biya soo ubban asay hintena be7idi dagammana melanne hintew yayyana mela oothana.

26 Heko, ta hachi hinte sinthan anjonne baadethi wothayis. 27 Ta hachi hintena kiittiya Godaa, hinte Xoossaa kiita naagiko, hinte anjetana. 28 Shin taani hintena hachi kiittiya Godaa, hinte Xoossaa kiita naagonna ixidi, hara xoossata goyinnanaw iya ogiyape deshiko, hinte baadetana. 29 Goday, hinte Xoossay hinte laattanaw biya biitta hintena gelsiya wode, baadetha Garzaana zuma bolla, anjuwa Ebaala zuma bolla awaajite. 30 Ha zumate Yordaanose shaafape hefinthan ogiyape wuloha baggan, Araban de7iya Kanaaneta biittan, Galgala sinthan de7iya Moore mitha matan de7oosona. 31 Hinte ha77i Goday, hinte Xoossay hintew immiya biitta laattanaw Yordaanose shaafa pinnana haneeta. Hinte he biitta ekidi yan de7iya wode, 32 ta hachi hintew immiya awaajotanne higgiya ubbaa minthidi naagite.