1 Hinte laattana mela Goday, hinte aawata Xoossay hintew immida biittan hinte de7ida wode ubban hinte oothanaw bessiya awaajotinne higgeti haysata. 2 Hinte laattiya biittan de7iya kawotethatis deriya bolla, zumaa bollanne issi issi mitha garsan de7iya goyinno bessata dhaysite. 3 Enta yarsho bessata laallite; enta goyinno shucha tuussata mentherethite. Asheera geetetiya enta eeqa misiliya taman xuuggite; kushen oosetida enta xoossata misileta dhaysite; enta sunthata he bessaafe quchite.

4 Godaa, hinte Xoossaa enti banta xoossaa goyinniya ogen goyinnofite. 5 Goday, hinte Xoossay hinte koche ubbaa giddofe ba sunthay yan xeegetana mela doorida bessaa koyte. He bessaa hinte baanaw koshshees. 6 Hinte xuussa yarshuwa, hara yarshuwa, hinte asraata, hinte imuwa, hinte qangetha, hinte dosidi immiya imuwa, hinte mehiyapenne dorsaafe bayraa he bessaa ehite. 7 Goday, hinte Xoossay hintena anjida gisho, hessan, Goday, hinte Xoossay de7iya bessan, hintenne hinte soo asay maana; hinte kushey oothidaba ubban hinte ufaytana.

8 Hachi haysan hinte issoy issoy, dosidaba ootheysada he wode ootheketa. 9 Goday, hinte Xoossay hintew immiya shempo biitta buroo gakibeketa. 10 Shin hinte Yordaanose pinnidi, Goday hinte Xoossay immiya he biitta laattidi yan uttana. Hintena teqida morketape I hintena shempisiya gisho yan wopu gidi hinte daana. 11 He wode Goday, hinte Xoossay ba sunthay hessan xeegetanaw doorida he bessan, ta hintena kiittiyaba ubbaa, xuussa yarshuwa, hara yarshuwa, hinte asraata, hinte imuwanne hinte qangetha ubbaa yaa eheeta. 12 Hinte, hinte adde naytinne hinte macca nayti, hinte adde aylletinne macca aylleti hintera laata ekiboonna hinte kataman de7iya Leewetara issife yan Godaa, hinte Xoossaa sinthan ufaytana. 13 Neeni xuussa yarshuwa ne koyida bessan coo yarshonna mela naageta. 14 Neeni, ne kochaafe issuwan, Goday doorida bessan, ne xuussa yarshuwa yarsha; ta nena kiitida ubbaa yan ootha.

15 Gidoshin ne de7iya bessan awunka ne mehiyape Goday nena anjidaysada shukada ma. Wogaada tuna gidin woyko tuna gidonna asi oonika gaaranne gen7e meysada ne mehiyape shukada ma. 16 Shin suuthi haathada sa7an gussafe attishin, moopa. 17 Ne kathaafe, woyniyapenne zaytiyape immiya asraata, ne mehiyapenne dorsa wudiyape immiya bayraa, Godaas qangidaba ubbaanne ne dosan immiya imuwa ubbaa ne de7iya heeran moopa. 18 Shin neeni, ne adde naytinne ne macca nayti, ne adde aylletinne macca aylleti neera laata ekiboonna ne kataman de7iya Leewetara issife Goday, ne Xoossay doorida bessan, Godaa, ne Xoossaa sinthan, ha yarsho ubbaa ma. Ne daaburada shiishidaban Godaa, ne Xoossaa sinthan ufayta. 19 Ne de7o laytha ubban Leeweta qelli goonna mela naageta.

20 I new gelida qaalada Goday ne Xoossay ne zawa daligisiya wode nena asho maanaw koshshiya wode ne koyida mela ma. 21 Shin Goday, ne Xoossay ba sunthay yan xeegetana mela doorida bessay new haakiko, Goday new immida ne mehe woyko dorsaa wudiyape ta nena kiittidaysada, ne koyida mela ne kataman shukada ma. 22 Wogaada tuna gidin woyko tuna gidonna asi oonika gaara woyko gen7e meysada mo. 23 De7oy suuthan de7iya gisho, suuthi de7iya asho moonna mela naageta; hessa gisho, de7o ashora gathada moopa. 24 Suuthi haathada biittan gussafe attishin, moopa. 25 Newunne neepe guyera yaana ne naytas injetana mela suuthi moopa. Hessa ne oothiko Godaa ufaysaasa.

26 Shin ne Godaas dummayidabaanne iyaw qangidaba ekada, Goday doorida bessaa ba. 27 Xuussa yarsho ashuwanne suuthaa Godaa, ne Xoossaa yarsho bessan yarsha. Hara yarsho suuthaa Godaa, ne Xoossaa yarsho bessa matan gussada ashuwa ma. 28 Newunne ne naytas injetana mela ta nena kiittiya kiitaa minthada naaga. Hessa ne oothiko, Godaa ne Xoossaa ufaysiyabaanne suureba oothaasa.

29 Ne laattanaw biya kawotethaa, Goday ne Xoossay ne sinthafe dhaysiya wodenne ne enta biitta laattiya wode, 30 enti ne sinthafe dhaydaape guye, ne enta xoossata goyinnada, xihen oyketonna mela naageta. Neeni, “Ha kawotethati banta xoossata waatidi goyinnona?” yaagada kaallada oychonna mela naageta. 31 Enti banta xoossata goyinniya wode Goday ixiya ubbaa oothiya gisho, Godaa ne Xoossaa ne hessada goyinnanaw bessenna. Enti hari attoshin, banta adde naytanne macca nayta banta xoossatas yarsho oothidi taman xuuggoosona.

32 Hiza ta nena kiittidaba ubbaa ootha; iya bolla gujofa; iyape pacisopa.