1 Ne giddon tinbite odiya woyko amuho birshiya asi dendidi, malaatanne malaalsiyabata oothiko, 2 I odida malaatay woyko malaalsiyabay tuma gididi poletin, I neeko, “Ane kase ne eronna hara xoossata goyinnoos” yaagiko, 3 ne iya ubbaraka si7opa. Hinte kumetha wozanapenne kumetha shempuwafe Godaa hinte Xoossaa dosiyakonne dosonaako paacanaw hessa oothees. 4 Godaa hinte Xoossaa kaallite; iyaw yayyite; iya kiita naagite; iya qaala si7ite; iyaw goyinnite; iyape duuxofite. 5 Hintena Gibxe aylletethaafe wozida Godaa, hinte Xoossaa bolla hinte makallana mela tamaarsiya nabe woyko amuho birshiya uraa wodhite. Hessa mela asi hinte Godaa, hinte Xoossa kiitaape kare keyana mela oothiya gisho, iya wodhite; iitaa hinte giddofe diggite.

6 Hari attoshin, ne ishay woyko ne adde na7ay woyko ne macca na7iya woyko ne dosiya machiya woyko ne mata laggey, “Kase nenne ne mayzati goyinni eronna xoossata goyinnanaw yedha. 7 Biittaa ha gaxape ya gaxaa gakanaw de7iya, ne yuusho ubban mataninne haahon de7iya asa ubbay goyinniya xoossata goyinnanaw yedha” yaagidi balethiko, 8 iyaw ero goopa; I geysa si7opa. Iyaw qadhetada iya shempuwa ashshofa; 9 iya wodhanaw bessees. Iya wodhanaw koyro ne dooma; hessafe guye, asa ubbay kaallidi wodho. 10 I hayqana gakanaw shuchan cadda; I nena Gibxe biittafe, aylletetha keethaafe kessida Godaa, ne Xoossaafe nena shaakanaw koyees. 11 Isra7eele asay hessa si7idi yayyana; qassi hessa mela iitabaa zaaridi hinte giddon oonika oothenna.

12 Goday, ne Xoossay ne daana mela immida katamaape issuwan ne de7iya wode, 13 ne asaa giddon iitati dendidi, asaako, “Nuuni eronna xoossata goyinnanaw dendite” yaagidi balethishin ne si7iko, 14 he hanota oycha; minthada pilga. He ne giddon oosetida tunabay tuma gideysa shaakada eriko, 15 he kataman de7iya asa ubbaa mashshan wursa; he katamaanne iyan de7iya mehiya ashshona dhaysa. 16 He katamaape ne ekida di7o ubbaa katamaa dabaaba shiishada, he katamaanne iya di7uwa ubbaa Godaas, ne Xoossaas, xuussa yarsho oothada wursada xuugga. I merinaw zaaridi keexetonna laaletha doore gididi attana. 17 Ha digetida miishetape aybika ne kushen bentofo. Goday ba wolqaama hanquwafe simmidi, nena maarana; I new qadhetana. Kase ne mayzatas caaqida caaquwada ne taybuwa darsana. 18 Taani hachi nena kiittiya kiita ubbaa ne naagada, Godaa, ne Xoossaas kiitetiko, Godaa ne Xoossaa ufaysiyabaa oothiko, ha gidabay new poletana.