1 Hinte, Godaa hinte Xoossaa nayta; hayqida asaas hinte asatethaa gaaropite; hinte huuphiya buluusopite. 2 Hinte, Godaa hinte Xoossaas geeshsha dere; Goday hintena ba ase gidana mela biittan de7iya asa ubbaafe baw dooris.

3 Neeni tunaba aybaka moopa. 4 Ne maana mehetinne do7ati haysata; boori, dorse, deeshe, 5 doge, baacho, woshi7e, wora deeshi, waaliya, gaaranne zuma dorse. 6 Shuquley phalqetidaysanne waammotiya mehetanne do7ata ubbaa miite. 7 Shin shuquley phalqetonaysatanne waammotonnayisata moopa; hessika gimale, eshenne gupalle. Haysati waammotoosona, shin enta shuquley phalqetiboona gisho, enti hintew tuna. 8 Gudunthos shuquley phalqethi, shin waammotonna gisho I hintew tuna. Iya ashuwa moopa; iya bawuta bochofite.

9 Haatha giddon de7iya medhetethata giddofe hinte maanaysati haysata; molo mela qefeynne poqoy de7iya ubbaa miite. 10 Shin molo mela qefeynne poqoy baynayisata moopite hessi hintew tuna.

11 Tuna gidonna kafo ubbaa miite. 12 Shin kafotape hinte moonna aggana kafoti haysata; arganthi, bazzo anko, kareetha anko, 13 phirco, xilo koche ubbaa, 14 qoorase koche ubbaa, 15 yancho, haatha kafo, qamma kafo koche ubbaa, 16 laafa gutto, diidinthe, haatha kutto, 17 bazzo gutto, molo kafo, solee, hazazo, 18 saabisa geetetiya kafo koche ubbaa, ayyaana kafonne shirshiqo. 19 Qefera de7iya laafa medhetethati ubbay hintew tuna; enta moopite. 20 Shin qefera de7iyabatape tuna gidonayisata miite.

21 Neeni, Godaa ne Xoossaas geeshsha asi gidiya gisho, bawuta ubbaa moopa. Hessa hinte kataman de7iya bete asay maana mela entaw immanaw danda7eeta; woyko hara biitta asas bayzanaw danda7eeta.

Deesha na7a iya aaye maathara kathofa.

22 Ne gaden laythan laythan kaxiya katha ayfe ubbaafe asraata kessa. 23 Ne ubba wode Godaas ne Xoossaas, yashshi tamaarana mela ba sunthay xeegetana mela I doorida bessan, ne kathaa, woyne ushshaanne zaytiya asraata, ne dorsafenne mehiyape bayra yeletidaysa yan, Godaa, ne Xoossaa sinthan ma. 24 Goday ne Xoossay ba sunthay xeegetana mela doorida bessay, ne de7iya bessaafe daro haaho gidiko, Goday nena anjana mela ne asraata yaa efanaw danda7onnaba gidiko, 25 he asraata bayzada miishiya Goday, ne Xoossay doorida bessaa efa. 26 He miishiyan ne koyida miizi woyko dorse woyko woyne ushshi woyko hara mino ushshi woyko hara ne koyiyaba shammada, nenne ne soo asay Godaa, ne Xoossaa sinthan hessa mada ufayta.

27 Enti neera shaaketidi ekida hara laati entaw bayna gisho, hessa ne oothiya wode ne kataman de7iya Leeweta dogopa. 28 Heedzantho laythan laythan ne katha asraata ehada ne kataman shiisha. 29 Hessa ne kataman de7iya, neera shaakitidi ekida hara laati bayna Leeweti, bete asay, yi7o naytinne am7eti yidi mo. Yaatiko, ne oothiya ooso ubban Goday, ne Xoossay nena anjana.