1 “Laapuntha laytha wursethan tal7e aco ubbaa maara. 2 Ne aco maarana wogay haysa; Isra7eele gidida ba ishaas tal7ida oonika he acuwa maaro. Godaa maarotethay awaajetida gisho, Isra7eele gidida ba ishaas tal7ida ba tal7iya oychofo. 3 Hara biitta asas ne tal7ida acuwa ekanaw danda7aasa, shin ne kochaas tal7idaba ubbaa maara.

4 “Ne laattana mela Goday, ne Xoossay new aqo oothidi immiya biittan, Goday nena anjana gisho ne giddon manqoy deenna. 5 Ne Godaas ne Xoossaas kiitetiko, ta hachi nena kiittiya kiita ubbaa naagiko, ne polo anjetana. 6 Goday, ne Xoossay new odidaysada nena anjana; daro kawotethati hintefe tal7ana, shin hinte issuwafeka tal7eketa. Qassi ne kawotethata haarana, shin issoyka nena haarenna.

7 “Goday, ne Xoossay new immiya biittan de7iya katamatape issuwan de7iya Isra7eele asi manqidi bentiko, iyaw ulo minnofa; ne kushiya shiisha ekofa. 8 Ne kushiya iyaw birsha; iya koshshiyaba tal7a.

9 “Aco maariya laapuntha laythi matis” gada, manqo Isra7eele asi tal7e diggofa; hessa mela iita qofi ne wozanan gelopo. Ne iyaw tal7onna ixin, I Xoossako yeekiko, hessi new nagara gidana. 10 Ne iyaw keehatethan imma; ne wozanan ayis immiyana gada uuzettofa. Hessa ne oothiko, Goday ne Xoossay nena oykidaban yedhidaban ubban anjana. 11 Awudeka gidin, biitta bollafe manqoy dhayonna gisho, ne Isra7eeletas, manqotasinne metootanchotas hinte keeha gidana mela kiittayis.

12 Adde gidin macca gidin, Isra7eele asi, aylle oothidi shammiko, I new usupun laythi ootho; laapuntha laythan aylletethafe la77a keyo. 13 Neeni aylletethaafe iya kessa yeddiya wode mela kushe yeddofa. 14 Goday ne Xoossay nena anjidaysa mela ne mehiyape, shaaliyapenne woyne gum7ethaafe entaw keehatethan imma. 15 Neeni kase Gibxe biittan aylle gididaysanne Goday ne Xoossay nena yaape wozidaysa dogopa. Ta hachi ha kiitaa new immey hessasa.

16 Shin ne aylley nenanne ne keetha asaa dosida gishonne neera de7oy iyaw lo77o gidiya gisho, “Taani ne soope biike” yaagiko, 17 iya penge efada, goothi ekada, iya haytha luka. Yaatiko, I new merinaw aylle gidana; qassi macca aylleska hessada ootha. 18 Iya neeni aylletethaafe kessada yeddiya wode neeni qohetas gada qopofa. I ha usupun laythata giddon asi une ootheysafe dako daro new oothis. Hessa gisho, neeni oothiyaba ubban Goday, ne Xoossay nena anjana.

19 Ne mehiyapenne ne dorsaa wudiyape bayra yeletida adde ubbaa Godaas, ne Xoossaas dummaya. Ne dummayida mehiyape bayra yeletida boora goyopa; ne dorsaa wudiyape bayra yeletida dorsaa ikisiya meedopa. 20 Nenne ne soo asay Goday dooriya bessan Godaa, ne Xoossaa sinthan hessata laythan laythan ma. 21 Shin ne yarshiya mehiya bolla borsiyabay bentiko, I wobbe woyko qooqe woyko hara iita borisiyabay iya bolla de7iko, hessa Godaas, ne Xoossaas yarshofa. 22 Hessa ne de7iya ne kataman ma; wogaada tuna gidonna asi gidin woyko tuna asi gidin gaaranne gen7e ashoda mo. 23 Gidoshin, ne iya suuthaa haathada sa7an gussafe attishin, moopa.