1 Abiiba ageenan Godaa, ne Xoossaa Paasika Ba7aale boncha; Goday, ne Xoossay nena Abiiba ageenan qamma Gibxefe kessis. 2 Neeni dorsafenne mehe wudiyape Goday ba sunthay xeegetana mela doorida bessan, Godaas, ne Xoossaas, Paasika yarsha. 3 He yarshuwa ne miya wode irshoy gelida uythara moopa. Neeni Gibxe yeddada eeson keyiya wode oothidaysada irshoy geliboonna meto uythaa laapun gallas kumethi ma. Ne de7o laytha ubban ne Gibxefe keyida gallasaa hassayana. 4 Ne biitta ubban laapun gallassas ayba irshoy bentofo. Qassi ne koyro gallas omarsi yarshida ashuwape wontas aybika attofo.

5 Ne Paasika yarshuwa Goday ne Xoossay new immiya katama awunka coo shukofa. 6 Goday ne Xoossay ba sunthay xeegetana mela dooriya bessan ne Paasika yarshuwa shuka. Qassi awi wulliya wode Gibxefe ne keyida gisho he saatiyan shuka. 7 Goday, ne Xoossay dooriya bessan, yan kathada ma; yaatada sa7i wontiya wode ne soo soo ba. 8 Usupun gallas kumethi irshoy geliboonna uythaa ma; laapuntha gallas Godaa, ne Xoossaa goyinnanaw shiiqa; he gallas ay oosoka oothofa.

9 Ne katha caka oykida koyro wodiyape doomada, laapun saaminta kumethi tayba. 10 Yaatada, Goday, ne Xoossay nena anjidaysa mela ne, ne dosan immiya imuwa ehada, Godaa, ne Xoossaa Saaminta Ba7aale boncha. 11 Hessan neeni, ne adde nayti, ne macca nayti, ne adde aylletinne ne macca aylleti, ne kataman de7iya Leeweti, bete asay, yi7o naytinne ne giddon de7iya am7eti ubbay, Goday, ne Xoossay ba sunthay xeegetana mela dooriya bessan ufaytite. 12 Neeni Gibxe biittan aylle gididaysa hassayada ha wogaa naaga.

13 Ne wudumaafe ne kathaa, woyne yedhiya bessaafe ne woyniya shiishidaape guye, laapun gallas Shaqara Ba7aale boncha. 14 Neeni, ne adde naytinne macca nayti, ne adde aylletinne macca aylleti, ne kataman de7iya Leeweti, bete asay, yi7o naytinne am7eti ubbay he baaliyan ufaytite. 15 Goday dooriya bessan laapun gallas Godaa, ne Xoossaa, Ba7aale boncha. Ne ufaytana mela ne ayfisidabaninne ne kushe ooso ubban Goday, ne Xoossay nena anjana.

16 Hinte biittan de7iya adde ubbay laythan heedzu toho, Uytha Ba7aale wode, Saaminta Ba7aale wodenne Shaqara Ba7aale wode Godaa, hinte Xoossaa sinthan, I dooriya bessan bento. Enti Godaa sinthe yishe, mela kushe yoopo. 17 Goday, ne Xoossay nena anjidaysa mela issoy issoy baw danda7eysa mela immo.

18 Goday, hinte Xoossay immiya katamatan issi issi kochaas daynnanne halaqa hintew shuumite; enti asaas xillo pirda pirdo. 19 Xillo pirdaa wobbisopa; som7o be7ada maaddofa; wodhaafe ekofa. Wodhaafey cincata ayfiya qooqisees, xillota qaala geellayees. 20 Ne de7on daana malanne Goday ne Xoossay new immiya biitta ne laattana mela xillo pirda.

21 Neeni Godaa, Xoossaa yarsho bessa matan Asheera eeqa misiliya essofa. 22 Hinte Goday, Xoossay ixiya goyinno shucha tuussu new essofa.