1 Godaas, ne Xoossaas, borisiyabay de7iya mehe woyko dorse yarsho oothada shiishopa; hessi Xoossa sinthan ixetidaba.

2 Goday, ne Xoossay new immiya katamatape awunka adde woyko macca gidin Godaa, ne Xoossaa sinthan iitaba oothikonne iya caaquwa menthidi bentiko, 3 ta kiita aggidi, hara xoossata, awa woyko ageena woyko salo xoolinto goyinnida asi de7iko, 4 hessa melaba hinte si7iko, he odaa minthidi pilga. Hinte koyin, hessa mela tunabay Isra7eele giddon oosetidaysi tumanne geeshshi gidiko, 5 he iitaa oothida addiya woyko maccasiw ne katamaape gaxa kessada, shuchan caddada wodha. 6 Issi asi nam7u woyko heedzu marki markatonna de7ishin hayqofo; issi asa markan ay asika hayqofo. 7 Iya bolla markatida asati koyro iya shuchan caddo; enta kaallidi hanko asay caddo. Hessada oothada, iitaa ne giddofe digga.

8 Hinte sinthe shiiqiya mootoy deexo gidiko, hessika, shempo wodho, shoche, madunthi, dumma dumma mootota Goday, ne Xoossay doorida bessaa eha. 9 Kahine gidida Leewetakonne daynnatako he mootuwa shiisha; he mootuwa enti pirdo. 10 Goday doorida bessan enti pirdidaysada ootha; ne oothana mela enti kiittiyaba ubba akeekada ootha. 11 Enti nena tamaarsida higgiyadanne enti odida pirdada ootha; enti pirdida pirdaafe ushachi woyko haddirsi goopa. 12 Godaas, ne Xoossaas oothiya daynnas woyko kahiniyas kiitetonna ixiya asi de7iko, he uray hayqo. Hessada oothada, iitaa Isra7eele giddofe digga. 13 Asa ubbay hessa si7idi yayyana; zaaridi hessa mela iita oothiya asi deenna.

14 Goday, ne Xoossay new immiya biitta laattada, yan de7o doomiya wode, ne yuushon de7iya kawotethatada, “Nuka nu bolla kawo kawothana” yaagiko, 15 ne kawothana kawoy Goday, ne Xoossay new dooridaysa gidanaw bessees. Hessika, ne asaa giddofe dooretidaysa gidope attishin, hara biitta asi ne bolla kawothofa. 16 Goday, “He ogiyara Gibxe simmopite” yaagida gisho, he kawoy daro para shiishanaw bessenna; ba asaaka para shammana mela Gibxe yeddofo. 17 Iya wozanaa balethonna mela kawoy daro macco ekofo; daro worqanne bira shiishopo.

18 I ba araatan uttiya wode Leewe koche gidida kahineti naagiya maxaafape ha higgiya duuqidi baw eko. 19 I ha higgiya qaalanne wogaa naagonne polo eridi Godaas, ba Xoossaas, yashshi tamaarana mela, ha maxaafay iyara de7o; ika ha maxaafa ba de7o laytha ubban nabbabo. 20 I ba wozanan, “Taani ta laggetape aadhayis” gidi ba ishata bolla otortenna. Ika Xoossaa higgiyafe haddirsi woyko ushachi geenna. I ba kawotethan adussa laythi kawotana; iya nayti Isra7eele biittan daro laythi kawotana.