1 Goday, ne Xoossay new immiya biittan de7iya kawotethata dhaysiya wodenne ne enta gooddada, enta katamataninne enta keethatan duussu doomiya wode, 2 Goday, ne Xoossay laata oothidi immiya biittan de7iya katamatape heedzu katamata new dummaya. 3 Goday, ne Xoossay new laata oothidi immiya biitta heedza kessada shaaka. Yaatada ase wodhida oonika he katamatako eeson baqatidi attana mela oge giigisa.

4 Issi asi kase morketethi bayna de7ishin, eronna ba laggiya wodhiko, I he katamatape issuwako baqatidi ba shempuwa ashsho. 5 Nam7u asati mithi qanxanaw wora bin, issoy mithaa qanxishin, mithaafe kalta ayfey koletidi hankuwa wodhiko, wodhida uray ha heedzu katamatape issuwako baqatidi, ba shempuwa asho. 6 Baqatidi attiya katamay issinni xalaala gidiko, wodhida uray eeson woxidi gakanaw ogey adusse gidiko, suuthi zaariya mata dabboy gooddi gakidi, yilon dendidi hayqanaw bessonna uraa wodhanaw danda7ees. I ba laggiya wodhiday kase morketethi de7iya gisho gidenna. 7 Hinte heedzu katamata dummayi wothana mela ta nena kiittey hessasa.

8 Goday, ne Xoossay kase ne mayzatas caaqidaysada ne zawa dalgisikonne ne mayzatas immana gida biitta ubbaa new immiko, 9 ha heedzu katamata bolla hara heedzu katamata guja. Hachi ta nena kiittiya ubbaa ne poliko, Godaa ne Xoossaa dosikonne I nena tamaarsida ogiyan minnada de7iko, ha biittay new imetana. 10 Hessa ne oothiko, Goday, ne Xoossay laata oothidi new immiya biittan xillo asa suuthi gukenna; neka suuthi gussada oyshetaka.

11 Shin issi asi ba shooruwa ixidi, qoseti naagidi iya wodhidi, ha katamatape issuwako baqatiko, 12 I de7iya kataman de7iya cimati I baqatida katamaape ehisidi, kushe zaaranaw koyeysas aathidi immo. 13 Iyaw aybaka qadhetofa; new ubbabay injetana mela, xillo suuthi gussida uraa Isra7eele giddofe digga.

14 Goday ne Xoossay neeni laattana mela immiya biittan, beni asay essida gade zawa shoddofa.

15 Issi asi bala oothanaw issi marka xalaali gidenna. Nam7u woyko heedzu marki markatin, he mootoy pirdetanaw koshshees.

16 Issi asi hara asi wordon mootiko, 17 mooteysinne mooteteysi nam7ay Godaa sinthan, kahineta sinthaninne daynnata sinthan eqo. 18 Daynnati he odaa minthidi pilgo; he uray ba ishaa wordon mooteysi tuma gidiko, 19 he mooteteysi ekanaw de7iya seera mooteysi seereto. Hessada oothada, iita uraa ne giddofe digga. 20 Hessada oothiko, hara asay hessa si7idi yayyana; hessa mela iita oosoy zaaridi oosetenna. 21 Hessa mela iita ooso oothidaysas qadhetofa; shempo gisho shempo; ayfe gisho ayfe; acha gisho ache; kushe gisho kushe; gedaa gisho gedaa mentha.