1 Neeni morketara oletanaw biya wode, enta parati, para gaaretinne enta olanchoti neepe darin be7ada, entaw yayyofa; nena Gibxefe kessida Goday, ne Xoossay neera de7ees. 2 Hinte ola doomanaape koyro, kahiney olanchota sinthe aadhidi haysada yaago; 3 “Isra7eele asaw, si7ite; hachi hinte, hinte morketara oletanaw haneeta. Hiza hinte wozanay dagammofo; yayyofite; enta sinthan kokoropite; hirgofite. 4 Goday, hinte Xoossay hintera biya gisho, hinte morketa olidi, hintew xoono immana” yaago.

5 Toora moconati olanchotako, “Ooratha keethi keexidi geliboonna asi de7iko, I olan hayqin, hara asi iya keethan gelonna mela I soo simmo. 6 Woyko woyne tokidi, ayfe moonna asi de7iko, I olan hayqin, hara asi iya woyne ayfiya moonna mela I soo simmo. 7 Macho oychidi ekiboonna asi de7iko, I olan hayqin, hara asi iya machiw ekonna mela I soo simmo” yaago. 8 Olaa kaaletheysati gujidi haysada yaago; “Ha asaa giddon yayyanne hirgiya oonika de7iko, I ba laggeta wozanaa yashshan til7isanaape soo simmo” yaago. 9 Olaa kaalethaysati hessa asaas odi wursiya wode cugaas cugaas toora moconata dooro.

10 Issi katamaa olanaw bada ne iyako matiya wode, koyrottidi sarora enti kushe immana mela oycha. 11 Enti sarora banta kushiya immidi, banta gimbe pengiya dooyidi nena gelsiko, he kataman de7iya asa ubbay new deexo ooso oothidi haggaazo. 12 He katamaa asay new sarora kushe immonna ixidi, olas giigetiko, ne he katamaa yuushuwa teqa. 13 Goday, ne Xoossay enta new aathidi immiya wode he kataman de7iya adde ubbaa mashshan wursa. 14 Gidoshin, maccasa, nayta, mehiyanne kataman de7iya ubbaba new di77a. Goday, ne Xoossay new immiya ne morketa shaluwa go7eta. 15 Ne de7iya bessaafe haakidi de7iya katamata ne oykiya wode hessada ootha.

16 Shin Goday, ne Xoossay new laata oothidi immiya biittan shempora de7iyaba issuwaka ashshona wodha. 17 Goday, ne Xoossay kiittidaysada Hiteta, Amooreta, Kanaaneta, Parzeta, Hiwetanne Yaabuseta wursada wodha. 18 Hessi hanonna ixiko, enti banta xoossata goyinnishe oothiya ixetida oosota hinte oothana mela hintena tamaarsidi, Godaa hinte Xoossaa bolla hinte nagara oothana mela denthethana.

19 Issi katama oykanaw yuushuwa ne teqada, daro gallas oletashe gam7iya wode, iyan de7iya ayfe immiya mithaa ayfiya mape attishin, qanxofa. Ne yuushuwa teqidi oley asepe attishin, denban de7iya mithaa gidenna. 20 Gidoshin, ne ayfe immonna hara mithata qanxada, neera oletiya katamay kundana gakanaw yan miixa keexa.