1 Ne laattana mela Goday, ne Xoossay new immiya biittan, ooni wodhidaako eretonna ahi kundidi bentiko, 2 hinte daynnatinne cimati bidi, ahay kundida bessaafe mata katamata gakanaw de7iya haahotetha wadho. 3 Hessafe guye, ahay kundida bessaas matiya katamaa cimati, wadhetaboonnanne morgen qambari wodhiboonna ussi eko. 4 Iyo goggiya haathi de7iya goyetidi eronnanne zeretidi eronna zangaara efidi, he ussee qoodhiya mirqidi mentho. 5 Hessa mela qohuwanne ooshsha shaakidi pirdanaw Goday, hinte Xoossay ba sinthan oothana melanne ba sunthan anjana mela enta doorida gisho, Leewe koche gidida kahineti he bessaa boo. 6 Hessafe guye, ahay kundida bessaas matiya katamaa cimati zangaaran qoodhe mirqidi wodhida ussee bolla banta kushiya meecetidi, 7 “Nu kushey ha suuthaa gussibeenna; nu ayfey hessa be7ibeenna. 8 Abeeti Godaw, neeni wozida ne asaa, Isra7eele maara; ha xillo suuthaa ne asaa bolla naaqo oothada taybopa. Ha xillo suuthaa gisho nu nagaray atto ga” yaago. 9 Neeni Godaa ayfiya sinthan hessada oothada, xillo suuthay gukida nagara ne giddofe digga.

10 Ne morketara ne oletanaw keyin, Goday, ne Xoossay enta ne kushen aathidi immin, enta di7iya wode, 11 di7etida asaa giddon issi mala lo7o maccas be7ada, iw mishetada machanaw koyiko, 12 iyo ne soo eha. I huuphiya meeda; I xuguntha cigga; 13 di7etiya wode de7iya ma7uwa laammada, issi ageena ne son uttada, ba aawasinne ba aayes kayoto. Hessafe guye, iyo macha. 14 Yaata simmada, iira duussay nena ufaysonna ixiko, iya ba koyida soo baana mela iyo yedda. Neeni iyo macho oothada iira issife aqida gisho, iyo miishen bayzanaw woyko aylle oothanaw bessenna.

15 Issi asas I dosiyanne dosonna nam7u macheti de7iko, he nam7ayka iyaw adde na7a yeliko, bayray I dosonna macceepe yeletidaba gidiko, 16 I ba nayta ba shaluwa laatisiya wode, I dosonnaripe yeletida bayray de7ishin, I dosiyaripe yeletida kaaluwa bayrayanaw bessenna. 17 Hara naytas immeysafe iyaw nam7u kushe aathidi immidi I dosonnari na7ay bayra gideysa erisanaw bessees. He na7ay iyaw kushe toho phalqida bayra gidiya gisho, bayratetha I ekanaw bessees.

18 Aawasinne aayes kiitetonna ixida, enti seerinka simmonna, wozana muumenne makallancho gidida na7i de7iko, 19 aawaynne aayiya he katamaa pengen de7iya cimatako iya eho. 20 Enti cimatako, “Haysi nu na7ay wozana muumenne makallancho; I nuus kiitetenna; I yarambanne ushshancho” yaagidi odo. 21 Hessafe guye, he kataman de7iya adde ubbay iya shuchan caddidi wodho. Hessada oothidi hinte giddofe iita uraa dhaysite; Isra7eele ubbay hessa si7idi yayyana.

22 Issi asi hayqo pirdisiya bala oothiko, ne iya mitha bolla kaqada wodhiko, 23 he mithaa bolla iya ahay aqopo; iya he gallas mooga. Mitha bolla kaqetidi hayqiya oonika Xoossan baadetidaysa. Goday, ne Xoossay new laata oothidi immiya ne biitta tunisopa.