1 Isra7eele asa boori woyko dorsi dhayidi bishin demmiko agga aadhofa; laagga ehada iya godaas imma. 2 He mehiya goday ne heera asi gidonna ixiko woyko iya goday ooneko ne eronna ixiko, iya goday koyishe yaana gakanaw ne soo efa; I koyishe yiiko iyaw imma. 3 Hessada hare woyko ma7o woyko aybaka dhayidabaa demmiko, hessada ootha.

4 Isra7eele asa harey woyko boori ogen kundin be7iko, maaddada denthafe attishin, aggada aadhofa.

5 Maccasi adde ma7o ma7ofo; addeyka maccasa ma7o ma7ofo. Hessa melaba oothiya oonaka Goday, hinte Xoossay ixees.

6 Ne oge bishin, mitha bolla gidin, sa7an ba na7aa woyko ba phuuphulliya haphida kafo demmiko, iyo, I naytara oykada ne soo efopa. 7 Nayta efanaw danda7aasa; shin aayiw baana mela yedda agga. Hessada oothiko, neeni duretada adussa laythi daana.

8 Ooratha keethi keexiya wode kaarape asi kundi hayqin ne oyshetonna mela keetha bolla kate giigisa.

9 Ne woyne gaden nam7u qommo kathi zeropa; hessada oothiko, ne zerida kathaynne woyney nam7ayka iitana.

10 Boorinne hare issife waaxada goyopa.

11 Suufepenne liinope oosetida ma7o ma7ofa.

12 Ne ma7iya ma7oy oyddu baggara macari de7iyaba gido.

13 Issi asi macho eki simmidi iyo dosona ixidi, 14 “Ha machiw ta ekiya wode kumethi giduku” yaagidi iyo iissidi odetiko, 15 na7e aawaynne na7e aayiya I geela7otetha malla efidi, katamaa pengen de7iya cimata besso. 16 Na7e aaway cimatas haysada yaagidi odo; “Taani ta na7iw ha uraas macho oothada immas, shin I, iyo ixis. 17 I, ‘Ne na7iya kumethi giduku’ yaagidi iyo iissidi odis. Gidoshin, ‘Ta na7e geela7otetha mallaa haysa be7ite’ ” yaagidi, I geela7otetha erisiya carqiya besso. 18 Yaatiko, he katamaa cimati iya garaafo. 19 I Isra7eele geela7e sunthaa iissida gisho, cimati iya xeetu bira santime*Xeetu bira santime: Issi kilonne bagga giraame deexiya bira santime acisidi, na7e aawas immo. Na7iya iyaw macho gidada de7o; ba de7o laytha ubban iyo yeddanaw bessenna.

20 Iya mootoy tuma gididi, na7iya kumethi gidonna ixiko, 21 iya ba aawa son de7ashe laymatida gisho, na7iw I aawa kare ehidi, he katamaa addeti iyo shuchan caddidi wodho. Isra7eele giddon iya borsoba oothasu; hessada oothada ne giddofe iitaa digga.

22 Issi asi hara asa machira laymatishe oyketiko, inne iyara laymatida maccasiya hayqo. Hessada oothada ne giddofe iitaa digga.

23 Issi asi hara asas oysheta giigida geela7iw katama giddon demmidi iira laymatiko, 24 enta nam7aa katamape gaxa kessidi, shuchan caddidi wodhite. Na7iya hayqey, katama giddon de7ashe, asi ashshana mela waassaboonna gishosa. Na7ay hayqey, hara asas giigida geela7iw iissida gishosa. Hessada oothada ne giddofe iitaa digga.

25 Issi asi asas giigida geela7iw asi bayna bessan wolqan oykidi, iyo iissiko, iya xalaali hayqo. 26 Iya hayqos gathiya nagara oothaboonna gisho, na7e bolla aybaka oothopite. Hessi issi asi coo dendidi hara asi wodheysa mela. 27 I iyo asi bayna bessan demmidi oykin, he geela7iya waassasu, shin iyo ashshiya asi bentibeenna.

28 Issi asi oyshetaboonna geela7iw oykidi, I geela7otetha ekidi oyketeko, 29 na7e aawa ishatamu bira santime†Ishatamu bira santime: Usupun xeetu giraame deexiya bira santime. acco. Yaatidi na7iw baw macho ootho. Ba de7o laytha ubban iyo yeddofo.

30 Issi asi ba aawa machiw ekidi, ba aawa kawushofo.