1 Sangatida woyko qaaratetida addey Godaa shiiquwa gelopo.

2 Laymatethan yeletida asi Godaa shiiquwa gelopo. Hari attoshin tammantho yeletethi gakanaw, iya kochaafe oonika Godaa shiiquwa gelopo. 3 Amoone asi gidin woyko Moo7abe asi gidin, Godaa asaa shiiquwa gelopo. Hari attoshin tammantho yeletethi gakanaw enta ase gidida oonika Godaa asaa shiiquwa gelopo. 4 Neeni Gibxefe keyada bishin, enti katharanne haathara nena mokibookona. Enti Masephexoomen Patoora kataman de7iya Bi7oora na7aa Balaami nena baaddana mela shammidosona. 5 Goday, ne Xoossay nena dosida gisho Balaama si7ibeenna; iya baadetha new anjon laammis. 6 Ne de7o laytha ubban enti saro daana melanne duretana mela amottofa. 7 Edoometi new dabbo gidiya gisho enta kadhopa; ne enta biittan bete asi gidada de7ida gisho Gibxeta kadhopa. 8 Enta heedzantho yeletethay Godaa shiiquwa gelanaw danda7oosona.

9 Ne morketa olanaw keyada dunkaanida bessan nena tunatethafe naaga. 10 Qamma amuhon atuntethay gukin, irxabay iya bolla de7iya oonika gutaape gaxa keyidi yan gam7o. 11 Sa7i omarsiya wode ba asatethaa meecetidi, awi wulliya wode gutaa simmo.

12 Ne wora sheeshi uttiya bessi gutaape karen giigisa. 13 Sheeshas uttiya olla bookiya miishe ola miishera gathada oyka; sheeshas utta simmada ollan biitta zaara. 14 Goday, ne Xoossay nena naaganawunne ne morketa ne kushen aathidi immanaw, ne gutan simeretees. I yan shaatiyaba be7idi, nena aggidi simmonna mela ne gutay geeshshi gidanaw koshshees.

15 Ba godaape baqatidi, neeko yida aylliya zaarada iya godaas immofa. 16 I ne katamatape issuwan, ba koyida bessan ba koyida wode gakanaw de7o; iya un7ethofa.

17 Isra7eele asaape oonika adde gidin woyko macca gidin, eeqa goyinniya asay ootheysada laymatopo. 18 Adde gidin woyko maccas gidin, laymatethan demmida miishe qaangethi gathanaw Godaa ne Xoossaa keethi ehopo. Enta nam7aa Goday ne Xoossay ixees.

19 Hinte koche gidida Isra7eele asaas miishe woyko kathi woyko haraba tal7ada yelo ekofa. 20 Hara biitta asape yelo ekanaw danda7aasa; shin neeni laattanaw geliya biittan ne oothiyaba Goday, ne Xoossay anjana mela ne koche gidida Isra7eele asaas yelora tal7ofa.

21 Godaas, ne Xoossaas, immanaw qangetidaba gathanaw gam7ofa. Goday ne Xoossay ne qangidaysa kumethi neepe koyiya gisho, polonna ixiko new nagara gidana. 22 Shin ne qangonna aggiko hessi nagara gidenna. 23 Godaas ne Xoossaas, immana gida ne doonan odetidaba neeni dosan immana gida gisho, ne inxarsan odetidaba pola.

24 Neeni issi asa woyne gade giddora aadhiya wode woyniyape koyda mela ma, shin iyape aybaka ne oykida miishen yeggofa. 25 Issi asa gadera neeni aadhiya wode he gadiyan de7iya tiyape duuthada ma; shin kathaafe cakada ne soo efopa.