1 Issi asi macho eki simmidi, issi iitabaa I bolla demmidi iyo ixidi, pirimaa daakidi, yeddiko, 2 iya soope keyada, hara azina geliko, 3 he nam7antho azinay iyo dosonna ixidi, pirimaa daakidi, iyo ba soope kessidi yeddiko, woyko iyo ekida nam7antho azinay hayqiko, 4 iya tunida gisho, koyro ekida azinay, zaaridi iyo ekofo. Hessi Godaa sinthan ixetidaba; ne Goday, ne Xoossay ne immiya biittan hessa mela nagara oothofa.

5 Ooratha macho ekida asi olas boopo; hara deexo ooso oothofo. Issi laythi aadhana gakanaw awuka boonna ba machiw ufayso.

6 Issi asa woxa woyko mayde acos oykofa; hessi keetha asay miyaba dhayidi hayqo guussu.

7 Issi Isra7eele gidida ba ishaa kaysoti efidi, aylle kessey woyko haras bayziya uray hayqo. Hessada oothada iita uraa ne giddofe digga.

8 Goga hargefe nena minthada naaga; Leewe koche gidida kahineti nena tamaarsiya ubbaa pola; ta entaw immida kiita naaga. 9 Neeni Gibxefe keyada ogen de7ishin, Goday ne Xoossay Mayraami bolla oothidaysa akeeka.

10 Issi asas issiba tal7ada, oythiyaba oychanaw iya soo gelopa. 11 Neeni karen eqidashin, ne tal7ida uray oothiyaba soope kessidi new immo. 12 I manqo gidiko, neeni acos oykida iya ma7uwa ne son aysopa. 13 I ma7idi aqana mela sa7i omarsiya wode iyaw guye zaara; I nena galatana. Hessi Godaa ne Xoossaa sinthan new xillotetha ooso gididi taybetana.

14 Manqonne maade koyidi dookaletida, Isra7eele gidida ne ishaa gidin woyko ne katamatape issuwan de7iya hara biitta asi naaqofa. 15 I hachi oothidaysa hachi ekanaw minthidi koyiya gisho, awi wullonna iyaw qanxa. Hessi hanonna ixiko, manqoy Godaako waassin hessi new nagara gidana.

16 Nayti oothida nagaraa gisho, aawata wodhanaw bessenna; qassi aawati oothida nagaraa gisho nayta wodhanaw bessenna. Oonika ba oothida nagaran nagaran hayqanaw bessees.

17 Hara biitta asaa pirdaanne yi7o nayta pirdaa wobbisopa; am7e ma7uwa aco gisho oykofa. 18 Neeni Gibxe biittan aylle gididaysanne Goday ne Xoossay nena yaape wozidi kessidaysa akeeka. Taani nena kiittey hessa gishosa.

19 Neeni kathi cakiya wode ne dogida mirqiya ekanaw guye simmofa. Goday, ne Xoossay ne kushe ooso ubban nena anjana mela hessa bete asas, yi7o naytasinne am7etas aggaaga. 20 Neeni shamaho ayfe maxiya wode wursada maxanaw nam7antho guye simmofa. Attidaysa bete asaas, yi7o naytasinne am7etas aggaaga. 21 Neeni woyne ayfe maxiya wode wursada maxanaw nam7antho guye simmofa. Attidaysa bete asas, yi7o naytasinne am7etas aggaaga. 22 Neeni Gibxe biittan aylle gidada de7idaysa dogopa. Taani nena kiittey hessa gishosa.