1 Nam7u asati ooyetidi pirda keethi biiko, daynnati xilluwa ne like gidi, naaqidaysa ne bala gidi pirdo. 2 Balidaysa garaafo bessiyaba gidiko, iya tirara zin7isidi zokon shocana mela daynnay kiitto. I garaafetey daynna sinthaninne I oothida balaa mela gido. 3 I oytamu gakanaw garaafetanaw danda7ees, shin hessafe daropo. Hessafe dariko ne ishay ne sinthan kawuyana.

4 Wudumman kathi yedhiya boora doona qachofa.

5 Issife de7iya ishatape issoy na7a yelonna hayqiko, iya machiya hara asi gelopo. I azinaa ishay iyo ekidi, iw koshshiyaba kuntho. 6 Hayqida ishaa sunthay Isra7eele asaa giddofe qushetidi dhayonna mela iya, koyro yeliya adde na7ay hayqida ishaa sunthan xeegeto.

7 Gidoshin, I ba ishaa machiw ekanaw koyona ixiko, maccasiya katamaa pengen de7iya cimatako bada, “Ta azinaa ishay ba ishaa sunthay Isra7eelen daana mela koybeenna; tana ekidi, taw koshshiyaba kunthonna ixis” yaagada odo. 8 Katamaa cimati iya xeegidi oychin, I ha77ika, “Taani iyo ekike” giiko, 9 maccasiya cimata sinthan iyako shiiqada, iya caammaafe issuwa kessada, iya som7on cuttada, “Ba ishaas zerthi daana mela koyonna asa bolla haysa mela kawushi gakanaw bessees” yaago. 10 Yaatin, he uraa soo asay Isra7eele kochaa giddon, “Caamma kessida asaa soo” geetetidi xeegetishe daana.

11 Nam7u asati wadhetishin, issuwa machiya yada, ba azinaa shoceysa kushepe ashshanaw, ba kushiya yeddada hankuwa addetetha oykiko, 12 I kushey qadhey bayna qanxeto.

13 Gitanne guuthi gidida nam7u mizaane oykofa. 14 Daronne guuthi makiya nam7u maka miishey new doopo. 15 Goday, ne Xoossay new immiya biittan adussa laythi ne daana mela like mizaaneynne maka miishey new de7o. 16 Goday ne Xoossay hessa melaba oothidi, balethiya oonaka ixees.

17 Ne Gibxefe keyada oge bolla de7ishin, Amaaleqati ne bolla oothidaba akeeka. 18 Enti Xoosse yayyonna dere; ne ogiyan enti neera eqetidosona. Ne bishin, daaburidi guye attida asa ubbaa wodhidosona. 19 Hessa gisho, Goday ne Xoossay nena he biitta laatisidi, ne yuushuwan de7iya morketape nena shempisiya wode ha biittan enta hassayiya asi dhayana gakanaw Amaaleqata ubbaa dhaysa; hessa oothanaysa dogopa.