1 Goday, ne Xoossay nena laatisiya biitta gelada, wopu gada duussi oykiya wode, 2 Goday, ne Xoossay new immiya biittan mokida katha ubbaafe bayraa, Goday ne Xoossay ba sunthay xeegetana mela doorida bessaa ekada ba. 3 He wode aawatiya kahiniyako bada, “Goday taw immana gidi kase nu mayzatas caaqida bessaa nuna gelsida Godaas, nu Xoossaas, hachi markatayis” yaagite. 4 Kahiney kathaa ne kushepe ekidi, Godaa ne Xoossaa yarsho bessa sinthan wotho. 5 Hessafe guye, Godaa ne Xoossaa sinthan haysada yaaga; “Ta mayzay bessafe besse yuuyishe de7ida Soore biitta asi; I taybon guutha asatara Gibxe wodhidi yan de7is. I yan de7ishe gita, wolqaamanne taybon daro dere gidis. 6 Shin Gibxeti nuuni aylle gididi oothana mela un7ethidosona; kawushidosona. 7 Yaatin, nuuni Godaako, nu aawata Xoossaako waassida. Goday nu waasuwa si7is; nu waayiya, nu daaburanne nu un7etetha be7is. 8 Goday ba wolqaama kushiyan, ba micetida qesiyan, gita dagaman, malaataninne malaalsiyabatan nuna Gibxefe kessis. 9 Ha bessaa nuna ehidi, maathinne eessi goggiya ha biitta nuus immis. 10 Heko, Goday nuus immida biitta ayfiyape bayraa ehas” yaagada, kathaa Godaa ne Xoossaa sinthan wothada, iya sinthan gufanna. 11 Newunne ne soo asaas Goday, ne Xoossay immida lo77oba ubban ufaytashe, Godaa galata. Leewetinne ne giddon de7iya bete asa ubbayka neera ufayto.

12 Asraata kessiya heedzantho laythan, ne kathaafe asraata kessa ongidaape guye ne kataman de7iya Leewetas, bete asaas, yi7otasinne am7etas immada enti kallidi maana mela ootha. 13 Godaa, ne Xoossaako, “Taani ta soope dummatida katha imota kessada, ne tana kiittidaysada Leewetas, bete asaas, yi7otasinne am7etas immas. Taani ne kiitaape issuwaka menthabike; issuwaka doga aggabike. 14 Ta kayotiya wodeka, he asraatape aybaka mabike; ta tunida wodeka iya bochabike; hayqida asas iyape immabike. Taani Godaa, ta Xoossaa bonchas; I tana kiittidaba ubba polas. 15 Ne de7iya geeshsha bessaafe, salope duge xeella; ne deriya Isra7eele anja; kase nu mayzatas ne immana gada caaqida maathinne eessi goggiya biitta nuus anja” yaaga.

16 Ne ha awaajotanne wogata naagana mela Goday ne Xoossay hachi nena kiittis. Hessa gisho, ne kumetha wozanapenne kumetha shempuwafe enta naaga. 17 Goday, new Xoosse gideysanne neeni iya ogiyan baanaw, iya wogaa, iya kiitaanne higgiya naaganaysa hachi erisadasa. 18 Goday ba gelida qaalada ne iya dere gideysa, iyaw buzo miishe gideysanne iya kiita ubbaa naageysata gideysa hachi nena erisis. 19 Hessa ne oothiko, I medhida dere ubbaafe aathidi nena galatan, sunthaninne bonchon gita dere oothana. I gelida qaalada ne iyaw geeshsha dere gidana.