27
Ebaalan De7iya Yarsho Bessa
1 Hessafe guye, Museynne Isra7eele cimati asaako, “Taani hachi hintena kiittiya kiitaa naagite. 2 Yordaanose shaafa pinnada, Goday ne Xoossay new immiya biitta geliya wode gita shuchata essada noora tiya. 3 Goday, ne aawata Xoossay new immana gidaysada maathinne eessi goggiya biitta, Goday ne Xoossay new immiya biitta ne pinniya wode ha higgeta ubbaa he shuchata bolla xaafa. 4 Neeni Yordaanose pinnida wode ta nena hachi kiittidaysada ha shuchata Ebaala zuma bolla essada enta bolla noora tiya. 5 He bessan Godaas, ne Xoossaas, birati bochonna shuchafe yarsho bessi giigisa. 6 Godaas, ne Xoossaas yarsho bessi masetiboonna shuchafe ootha; iya bolla Godaas, ne Xoossaas xuussa yarsho yarsha. 7 Issifetetha yarshuwa shiishada mashe Godaa, ne Xoossaa sinthan ufayta. 8 Ha higgeta bentana mela oothada ha shuchata bolla qoncen xaafa” yaagis.
Ebaalape Wodhiya Baadethi
9 Museynne Leewe gidida kahineti issife asaako, “Isra7eele, si77i gada wozanape si7a; hachi ne Godaa, ne Xoossaa dere gidadasa. 10 Ta hachi new immiya Godaa, ne Xoossaa awaajota naaganne kiiteta” yaagis.
11 He gallas Musey asaa haysada yaagidi kiittis. 12 “Hinte Yordaanose pinnidaape guye Garzaana zuma bolla eqidi asaa anjanaysati, Simoona, Leewe, Yihuda, Yisakoora, Yoosefanne Biniyaame kochata. 13 Qassi Ebaala zuma bolla eqidi asaa baaddanaysati, Robeela, Gaade, Aseera, Zabloona, Daanenne Niftaaleme kochata.
14 “Leeweti banta qaala dhoqu oothidi, Isra7eele asaako haysada yaago.
15 Godaa sinthan ixetidaba gidiya gisho, kushe hiillanchchoy mithi massidi, birata sheeshidi woyko shuchi qoxidi oothida eeqa geeman goyinniya oonika baadetidaysa gido” giiko,
Asa ubbay, “Amin7i” yaago.
16 “Ba aawa woyko ba aayiw kawushiya oonika baadetidaysa gido” giiko,
Asa ubbay, “Amin7i” yaago.
17 “Ba shooruwa zawa sugiya asi baadetidaysa gido” giiko,
Asa ubbay, “Amin7i” yaago.
18 “Qooqey baanaw bessiya ogiyape hara soo zaariya asi baadetidaysa gido” giiko,
Asa ubbay, “Amin7i” yaago.
19 “Bete asaa, yi7o naytanne am7eta pirda geellayiya asi baadetidaysa gido” yaagiko,
Asa ubbay, “Amin7i” yaago.
20 “Ba aawa machiw xaallidi, ba aawa bonchuwa qaariya asi baadetidaysa gido” giiko,
Asa ubbay, “Amin7i” yaago.
21 “Mehera tuniya asi baadetidaysa gido” giiko,
Asa ubbay, “Amin7i” yaago.
22 “Ba micho gidida aawa woyko aaye na7era tuniya asi baadetidaysa gido” giiko,
Asa ubbay, “Amin7i” yaago.
23 “Ba mache aayera tuniya asi baadetidaysa gido” giiko,
Asa ubbay, “Amin7i” yaago.
24 “Ase geeman wodhiya asi baadetidaysa gido” giiko,
Asa ubbay, “Amin7i” yaago.
25 “Miishen shametidi, xillo asi wodhiya asi baadetidaysa gido” giiko,
Asa ubbay, “Amin7i” yaago.
26 “Ha higgeta naagonna asi baadetidaysa gido” giiko,
Asa ubbay, “Amin7i” yaago.