1 Goday Koreeba zuman, Isra7eele asaara caaqida caaquwa bolla gujidi Moo7aben entara caaqanaw Muse kiitida caaqo qaalati haysata. 2 Musey Isra7eele asaa ubbaa xeegi shiishidi, haysada yaagis.

Goday Gibxe kawa bolla, iya olanchota bollanne iya biitta ubbaa bolla oothidabaanne gathidaba hinte, hinte ayfen be7ideta. 3 Enta bolla gathida iita metota, malaalsiyabatanne gita malaatata hinte, hinte ayfen be7ideta. 4 Shin hachi gakanaw Goday, hintew akeekiya wozana, xeelliya ayfenne si7iya haythi immibeenna. 5 Goday oytamu laythi kumethi hintena mela biittan kaalethiya wode hinte ma7oy wuribeenna, hinte caammay cimibeenna. 6 Goday, hinte Xoossaa gideysa hinte erana mela uythi mibeeketa; woyne woyko hara mathoyiya ushshi uyibeeketa.

7 Nuuni ha bessa gakida wode Haseboona Kawoy Sihooninne Baasane Kawoy Oogey nuura oletanaw keyidosona, shin nuuni enta xoonida. 8 Enta biitta ekidi, Robeelanne Gaade kochaas, qassi Minaase kochaafe baggaas laata oothidi immida.

9 Hinte oykiyabaynne yedhiyabay hintew anjetana mela ha caaqo qaalata ammanetidi naagite. 10 Hachi hinte ubbay, kochata halaqati, cimati, shuumatinne Isra7eele asa ubbay haysan Godaa sinthan eqideta. 11 Hinte naytara, hinte machetara, hinte giddon de7idi, mithi mixiyanne haathe tikiya hara biitta asaara issife haysan eqideta. 12 Godaa, hinte Xoossara qaala gelanaw haysan eqideta. Goday ha qaala hachi hintera caaqon minthana. 13 Goday hintena ba ase oothidi minthana; hintewunne hinte mayzatas, Abrahaames, Yisaaqasinne Yayqoobas caaqidaysada I hintew Xoosse gidana. 14 Goday ha caaqo qaala essey hinte xalaalara gidenna. 15 Hachi haysan, Godaa, nu Xoossaa sinthan eqida nu ubbaaranne sinthafe yaana yeleta ubbaara essees.

16 Nuuni Gibxen waanidi de7idaakonne ha77i gakanaw ogen de7iya kawotethata giddora waanidi kanthidi yidaako ereeta. 17 Enta giddon de7iya ixetida mitha, shucha, biranne worqa eeqa misileta be7ideta. 18 Ha hintefe oonika adde gidin macca gidin, issi soo asi gidin, issi kochi gidin Godaa, nu Xoossaafe, haakidi hara kawotethata xoossata goyinnona mela naagetite. Hessa mela cammiyanne wodhiya ayfe ayfiya asi hinte giddon de7opo.

19 Ha caaqo qaala si7idi, ba wozanan, “Ta shenen taani biikoka, metoy baawa” yaagidi bana cimmiko, hessa mela asi lo77ota bollanne iitata bolla dhayo ehees. 20 Godaa hanqoynne qanaatey hessa mela ase bolla eexidi keyana. Ha maxaafan xaafetida baadethi ubbay iya bolla yaana; salope garsan iya suntha Goday quchana. 21 Goday ha higge maxaafan xaafetida baadetha caaqo qaalada he uraa Isra7eele giddofe shaakidi dhaysana.

22 Yaana yeletethay, hinte sheeshaynne haaho biittafe yaa hara biitta asay, Goday hinte bolla ehida gaduwanne hargiya be7ana. 23 Biitta ubbay diinneninne maxinen kumana; toketiyabay deenna; doliyabay bentenna; maatinne mithi dolenna. Goday ba hanqon dhaysida Soodomadanne Gamoorada, Adaamadanne Xaboyma katamatada hanana. 24 Kawotethati, “Goday ha biitta bolla haysa melaba ayis oothidee? Ha wolqaama hanquwas gaasoy aybee?” yaagana.

25 Asay zaaridi, “Enti Goday, enta aawata Xoossay, enta Gibxefe kessida wode entara gelida caaqo qaala menthida gishosa. 26 Enti eronna xoossatasinne I goyinnofite gida xoossata goyinnidosona. 27 Hessa gisho, Goday hanqetidi, ha maxaafan xaafetida baadethata ubbaa enta bolla ehis. 28 Goday wolqaama hanqo hanqetidi, enta biittafe entana shoddidi hara biitta yedethis” yaagana.

29 Xuuray nu Godaa nu Xoossasa, shin nuuni ha higge qaala oothana mela qoncidaysati merinaw nuusanne nu naytasa.