1 Hachi ta ne sinthan wothida anjoynne baadethay ne bolla gakiya wode Goday, ne Xoossay nena laaliya hara kawotethata giddon de7ishe haysa ne akeekiko, 2 nenne ne nayti Godaa, ne Xoossaako, simmada, ne kumetha wozanapenne ne kumetha shempuwafe taani hachi nena kiittiya higgiyas kiitetiko, 3 yan Goday, ne Xoossay ne di7etida biittafe nena zaarana. I hintew qadhetidi hintena laallida kawotethata ubbaa giddofe zaaridi shiishana. 4 Biitta gaxape gaxa gakanaw ne laaletikoka, yaape Goday, ne Xoossay nena zaaridi shiishana. 5 Ne aawati kase laattida biitta, neka laattana mela Goday, ne Xoossay nena he biitta ehana. Yan nena ne aawatape aathidi dureyana; ne taybuwa darsana.

6 Ne de7on daana melanne Godaa, ne Xoossaa ne kumetha wozanapenne ne kumetha shempuwafe dosana mela I newunne ne naytas kiitetiya wozana immana. 7 Goday, ne Xoossay ha baadethata ubbaa ne morketanne nena gooddeyisata bolla ehana. 8 Hachi ta nena kiittiya higgiya ne naagana; zaarada Godaas, ne Xoossaas kiitetana. 9 He wode Goday ne Xoossay nena ne kushe ooso ubban, ne ulo ayfiyan, mehiyaninne ne goshsha ayfiyan nena darsidi anjana. Goday kase ne aawata anjidi ufaytidaysada nena anjidi ufaytana. 10 Hessi hananay ha higge maxaafan xaafetida Godaa, ne Xoossaa higgiyanne wogaa naagada, Godaa, ne Xoossaako ne kumetha wozanapenne ne kumetha shempuwafe simmiko.

11 Hachi ta nena kiittiya kiitati hessa mela deexo gidokona; neepe haakokona. 12 Neeni, “Nuuni si7idi kiitetana mela salo keyidi nuus wodhisanay oonee?” goonna mela salona gidenna. 13 “Nuuni si7idi kiitetana mela nuus abba pinnidi ehanay oonee?” goonna mela abbaafe hefinthana gidenna. 14 Qaalay new daro matan de7ees; ne oothana mela qaalay ne wozanaaninne ne doonan de7ees.

15 Heko, ta hachi ne sinthan de7onne lo77otethi, hayqonne dhayo wothas. 16 Ne Godaa, ne Xoossaa dosiko, iya ogiyan biiko, iya kiitaa, iya awaajuwanne iya higgiya naagiko, ne de7on daananne darana. Ne laattanaw geliya biittan Goday, ne Xoossay nena anjana.

17 Shin ne wozanay Godaape haakin, iyaw kiitetonna ixada, hara xoossatas gufannada enta goyinniko, 18 hinte ubbay dhayanaysa ta hachi hintew odayis. Yordaanose pinnidi hinte laattanaw biya biittan hinte laythay aduqenna.

19 Ta hinte sinthan de7onne hayqo, anjonne baadethi wothidaysas hachi salonne sa7a hinte bolla markayana. Hiza hintenne hinte sheeshay de7on daana mela de7o doorite. 20 Godaa ne Xoossaa dosa; iya qaala si7a, iyaw kiiteta; iyara oyketa. Hessada haniko, Goday kase ne mayzatas, Abrahaames, Yisaaqasinne Yayqoobas immanaw caaqida biittan nenne ne sheeshay adussa laythi daana.