1 Musey ba odaa wursidaape guye Isra7eele asaako haysada yaagis; 2 “Ha77i taw xeetanne laatamu laythi gidida gisho, hizape guye kaalethanaw danda7ike. Goday taako, ‘Ne Yordaanose pinnaka’ yaagis. 3 Goday, ne Xoossay ne sinthe aadhidi nena kaalethana. Yan de7iya kawotethata I dhaysana gisho, enta biitta ne laattana. Goday gidaysada Iyyasuy hintena kaalethana. 4 Goday Amoore kawota Sihoonanne Ooge xoonidi, enta biitta dhaysidaysada hinte morketa hessada oothana. 5 Goday enta hintew aathidi immin, hinte enta bolla ta hintena kiittidaysada oothana. 6 Minnite; gencite; yayyofite. Enta be7idi dagammopite. Goday hinte Xoossay hintera gidana; I hintena yeggenna, aggenna” yaagis.

7 Musey Iyyasu xeegidi, Isra7eele asaa ubbaa sinthan haysada yaagis; “Minna; genca. Ne ha asaara issife Goday enta mayzatas immana gidi caaqida biitta gelaasa; he biitta enta laatisaasa. 8 Goday, I ba huuphen neera gididi nena kaalethana. I nena yeggenna; aggenna. Hessa gisho, yayyofa; ufaysi qanxofa” yaagis.

9 Musey ha higgiya xaafidi, Godaa qaala caaqo Taabotiya tookiya kahine gidida Leewe naytasinne Isra7eele cimatas immis. 10 Musey entako, “Aco ubbay atto geetetiya laapuntha laytha wursethan, Shaqara Ba7aaley bonchetiya gallas, ha higgiya dhoqu oothidi nabbabite. 11 Godaa, hinte Xoossaa sinthan, I doorida bessan, iya goyinnanaw Isra7eele asa ubbay shiiqiya wode entaw nabbabite. 12 Enti ubbay si7idi, Godaa, hinte Xoossaas yashshi tamaarana mela ha higge qaala ubbaa naagana mela addeta, maccasata, naytanne hinte biittan de7iya hara biitta asaa issife shiishite. 13 Ha higge qaala eronna enta naytika Yordaanose pinnidi, hinte laattanaw biya biittan, hinte de7iya laytha ubban ha higgiya si7o; Godaas, hinte Xoossaas, yashshi tamaaro” yaagidi kiittis.

14 Goday Museko, “Ne hayqiya wodey matis. I kaalethana wogaa ta iyaw immana mela Iyyasu xeegada, iyara issife Dunkaaniya penge shiiqite” yaagin, Museynne Iyyasuy Dunkaaniya pengiyako shiiqidosona.

15 Goday Dunkaaniya pengen eqida shaara tuussan entaw qoncis.

16 Goday Museko, “Neeni mata wode hayqada ne aawatan gahetaasa. Neepe guye, ha asay taw ammanetonayisata gidana; ta entara gelida caaquwa menthana. Enti tana aggidi, banta laattiya biittan de7iya eeqata kaallana. 17 Hessi haniya wode ta hanqoy enta bolla eexana; ta enta aggaagana; ta som7uwa entafe hara soo zaarana. Enti dhayana; iita metoynne dhayoy enta bolla yaana. He wode enti, ‘Tuma ha metoy nuna gakiday nu Xoossay nu giddon bayna gisho gidennee?’ yaagana. 18 Hara xoossata goyinnidi, enti oothida iita oosuwa gisho, ta he gallas ta som7uwa entafe hara soo zaarana.

19 “Ha77i ha mazmuriya xaafada, Isra7eele asaa ubbaa tamaarsa. Ha mazmurey taw Isra7eele asaa bolla marka gidana mela enta yexisa. 20 Enta mayzatas gelida qaalada, maathinne eessi goggiya biitta ta enta gelsa simmin, enti mi kallidi goobidaape guye, hara xoossata goyinnidi, tana kadhana; ta caaquwa menthana. 21 Daro metoynne dhayoy enta bolla gakida wode ha mazmurey enta naytape baletonna gisho, enta bolla marka gidana. Taani caaqida biitta enta buroo gelsonna de7ishin, haara enti qopiya qofaa taani erayis” yaagis. 22 Musey he gallas mazmuriya xaafidi, Isra7eele asaa tamaarsis.

23 Hessafe guye, Goday Nawe na7aa Iyyasuko, “Minna, genca; ta entaw immanaw qaala gelida biitta Isra7eele asaa efada gelsa. Ta neera gidana” yaagis.

24 Musey ha higgeta koyrope wursethi gakanaw xaafidi wursidaape guye, 25 Godaa, Qaala caaqo Taabotiya tookiya Leeweta haysada yaagidi kiittis; 26 “Godaa higgey xaafetida ha maxaafa efidi, Godaa, hinte Xoossaa Qaala caaqo Taabotiya matan wothite. Yan I hinte bolla marka gidana. 27 Hinte ay mela geellekonne wozana iiteko ta erayis. Tuma, ta hintera de7ida laytha ubban hinte Godaas makallata, shin ta hayqin, ubba hintte waanidi makallandetii? 28 Hessa gisho, haysa ubbaa ta entaw odanawunne salonne sa7a ta enta bolla markayanaw hinte kochaa halaqatanne deriya kaalethiya asaa ubbaa taw shiishite. 29 Ta hayqidaape guye, hinte tuma iita ase gidanaysanne taani hintena tamaarsida kiitaape hara soo simmanaysa taani erayis. Hinte iya sinthan iitabaa oothidi, Godaa yiloyiya gisho, wodepe I hinte bolla iita gado ehana” yaagis.

30 Hessafe guye, Musey ha mazmure qaalata wurana gakanaw shiiqida Isra7eele maabara ubbaa nabbabidi sissis.