32
1 Saloto, taani odeysa si7ite;
biittay ta doona qaala hayzo.
2 Ta timirtey ira mela buko;
ta qaalay akada wodho.
Maata bolla wodhiya xaasada
dola bolla wodhiya puuseda wodho.
3 Taani Godaa sunthaa awaajana;
gitatetha nu Xoossaas immite.
4 I nu Zaalla; iya oosoy polo;
iya ogey suure.
Xoossay ammantheysa; wordoy baynaysa;
I tumanchonne suure.
5 Iya sinthan banta tunatethaa bessidosona;
enti iya na7a gidokona;
enti iitanne geella yeletethi.
6 Hinteno, eeyanne akeeki bayna asaw,
hinte Godaas immiya zaaroy haysee?
I hintena medhida hinte Aawa gidennee?
hintena medhidi minthi essiday iya gidennee?
7 Beni wodiya qopa;
aadhida yeletethaa akeeka.
Ne aawa oycha; I new odana;
cimata oycha; enti new qoncisana.
8 Ubbaafe Wolqaamay kawotethatas
enta laata shaakida wode,
asa zerethika dummayida wode,
Isra7eele asaa taybuwa mela,
asaas enta zawa essis.
9 Godaa gakida gishoy Isra7eele;
Yayqoobi iya gakida laata.
10 I enta mela biittan,
aykoy bayna mela biittan,
carkoy baqishin demmis.
Iyaw gondalle gidis, iya naagis;
ba ayfe na77eda minthidi naagis.
11 Arganthi ba na7a paalo tamaarseysada,
ba miccida qefiyan gakidi ashsheysada,
Goday ba qefiyan haphidi enta ashshis.
12 Goday ba xalaala enta kaalethis;
hara allaga xoossi iyara baawa.
13 I biittas dhoqa bessaa enta kessis;
goshsha ayfiya enta muzis.
Zaalla qophope enta eessi kalsis;
shucha biittafe bentiya zayte ushshis.
14 Enta mehiyape qeesa maathi,
dorsafenne deeshape xamaata maathi,
modho dorsenne deesha asho midosona.
Baasane dorsaanne deesha ashuwa,
lo77o giste uythara midosona;
suuthi daaniya woyne ushsha uyidosona.
15 Shin Isra7eeley ordis; makallis;
midi kallidi moollotis.
Bana medhida Xoossaa aggis;
ba Atotethaa Zaalla kawushis.
16 Enti allaga xoossata goyinnidi,
iya qanaatisidosona.
Ixetida banta eeqatan
iya hanqethidosona.
17 Xoosse gidonaysatas,
kase enti eronna xoossatas,
zine dendidaysatas,
enta aawati goyinniboona
xoossatas yarshidosona.
18 Entaw de7o immiya Zaalla dogidosona;
yelidi dichida Xoossa aggidosona.
19 Adde naytinne macca nayti iya yiloyidosona;
Goday hessa be7idi enta kadhis.
20 I, “Enti geellanne ammanetona dere gidiya gisho,
taani ta som7uwa entafe genthana;
enta wursethaa si77i gada be7ana” yaagis.
21 Xoosse gidonaysatan tana qanaatisidosona;
banta eeqatan tana yiloyidosona.
Taani enta kadhetida asan qanaatisana;
eeya asan enta yiloyana.
22 Ta hanqoy tamada eexana;
Si7oole gakanaw xuuggana.
Biittan de7iyaba ubbaa maana,
deriya baasuwa gakanaw xuuggana.
23 “Taani enta bolla meto doorana;
ta dongiyan enta dukana.
24 Ta enta bolla iita kosha yeddana;
enti hargeninne gadon wurana.
Enta bolla iita bazzo do7atanne
dukidi wodhiya iita shooshata yeddana.
25 Enta, mashshi oge bolla wursana;
keetha garsan dagami kawotana.
Na7atetha addetinne maccati wurana;
guutha naytinne cimati attokona.
26 Ta enta dhaysanawunne
enta hassayiya asi
doonna mela oothanaw qopas.
27 Shin enta morketi, ‘Xooniday nuna;
ha ubbaa oothiday Godaa gidenna;
yaagidi otoron ceeqetonna mela gada aggaagas’ ” yaagis.
28 Isra7eele asay wozani bayna asi;
enti akeekokona.
29 Enti cincidi akeekidako haysa erana,
banta wursethaka shaakanashin.
30 Goday enta Xoossay enta bayzonaako,
enta medhida Wolqaamay aathidi immonaako,
waatidi issi asi mukulu asaa,
num7u asi tammu mukulu asaa xoonii?
31 Nu Zaallay nu morketa zaalla mela
gidonnaysa enti eroosona.
32 Enta woyney Soodome woyniyape yees,
enti Gamoora goshshan dolidosona;
ayfiyan marzeynne camoy kumis.
33 Enta woyney shoosha marze;
wodhiya soggo.
34 Goday, “Ta hessa dogadina?
Ta mazgaben xaafabikina?
35 Entaw dhayo gallasi matis;
enta bolla gakanabay ellesees.
He wode enta tohoy dhubetana;
ta halo keyananne kushe zaarana.”
36 Enta wolqay wuridaysanne
enta maaddiya asi baynaysa be7ida wode,
Goday ba asaas pirdana; ba aylletas qadhetana.
37 Xoossay entako, “Enti ammanetiya enta xoossati awunee?
Enti baqatidi qosetiya enta zaallay awunee?” yaagana.
38 Enta modho yarshuwa midaysati,
enta woyne ushsha yarshuwa uydaysati,
ha77i dendidi enta maaddo; enta asho.
39 “Tuma, Godi tana; Xoossi ta xalaala;
taape attishin, hara Xoossi baawa.
Wodheynne paathey tana;
ta madunxisayis; ta pathayis;
ta kushepe oonika ashshena.
40 Ta kushiya denthada haysada yaagana;
Taani merinaw de7o;
41 Phooliya ta mashsha leefada,
pirdanaw ta kushen oykiya wode,
ta morketa bolla ta halo keyana;
tana ixeysatas kushe zaarana.
42 Ta dongey enta suuthan mathotana;
ta mashshay enta ashuwa maana.
Tana ixiya ubbaa maarike;
madunxidaysatinne di7etidaysati hayqana.”
43 Kawotethato, Godaa asaara ufaytite;
I ba aylleta suutha accana.
Ba morketa bolla halo keyana;
biittan de7iya ba asaa nagaraa atto gaana.
44 Museynne Nawe na7ay Iyyasuy Isra7eele asaa shiishidi, ha mazmuriya ubbaa asay si7ishin yexidosona.
45 Musey ha qaala ubbaa Isra7eele asaas odi wursidaape guye, 46 entako, “Ha higge qaala ubbaa hinte nayti naagana melanne kiitetana mela hachi ta hintew marka oothada immiya qaala ubbaa hinte wozanan wothite. 47 Ha qaalay hintew de7ope attishin, coo qaala gidenna. Hinte ha qaala naagiko, Yordaanose pinnidi laattana biittan adussa laythi daana” yaagis.
48 He gallas Goday Muse haysada yaagis; 49 “Moo7aben, Iyaarko katamape sintha baggara de7iya Abariima Zumatape issuwa gidida Nabo Zuma bolla keya; yan Isra7eele asaa ta laatisana, Kanaane biitta haahon xeella. 50 Ne ishaa Aaroni Hoora Zuma bolla hayqidi, ba mayzata gakidaysada neka ha zumaa bolla hayqada ne mayzata gakana. 51 Hinte nam7ay Isra7eele asaa sinthan taw ammanetibeketa. Siina mela biittan, Qaadesa matan de7iya Mariba haatha matan ta geeshshatetha Isra7eele asaa bessibeketa. 52 Hessa gisho, neeni he biitta haahon xeellanaape attishin, ta Isra7eele asaa laatisana biitta gelaka” yaagis.