33
Musey Isra7eele Kocha Anjis
1 Xoossa asi gidida Musey hayqanaape sinthe, Isra7eele asaa anjida anjo qaalay haysa.
2 Musey, “Goday Siina zumaape yis;
Sayre zumaape nu bolla poo7is.
Paarana zumaape phoolis.
Mukulan taybetiya kiitanchoti iyara de7oosona;
Iya ushachan tama lacoy de7ees.
3 Godaw neeni ne asaa dosadasa;
Geeshshati ubbay ne kushen de7oosona.
Ne tohuwa garsan ubbay gulbatidi goyinnoosona;
neepe kiita ekoosona.
4 Musey immida higgiya
Isra7eele asaa laata ekoosona.
5 Isra7eele zerethati deriya halaqatara shiiqida wode,
Goday ba asaa, Isra7eele bolla kawotis.
6 “Robeela kochay taybon guutha gidikoka,
I hayqofo; paxa de7o.”
7 Musey Yihuda kochaaba,
“Godaw, Yihuda waasuwa si7a;
hanko iya yaratara iya bu7a.
Enta kushiya minthetha;
enti banta morketara oletiya wode
enta maadda.
8 Musey Leewe kochaaba,
ne Tumiimeynne Uriimey,
neeni Masahan paacidanne Mariban palamida,
ne geeshsha asaasa.
9 Bantana yelidaysatape,
banta ishatapenne banta naytape aathidi,
enti new ammanetidosona;
ne caaqo qaala naagidosona.
10 Enti ne wogaa Yayqooba,
ne higgiya Isra7eele tamaarsoosona.
Enti ne sinthan ixaane cuyisoosona;
yarsho bessan xuussa yarsho yarshoosona.
11 Abeeti Godaw, Leeweta anja;
enta kushe oosuwan ne ufayta.
Enta bolla dendiya morketa mentheretha
zaari dendonna mela enta morketa cadda.”
12 Biniyaame kochaaba,
“Godan dosetiday iyan ammanetidi de7ees;
qamma gallas I enta naagees;
ba hashiyan tookidi shempisees.”
13 Yoosefa kochaaba,
“Goday, salope iran,
sa7ape pulto haathan
enta biitta anjo.
14 Awan kaxidi dooretida ayfeninne
woden woden kaxiya ayfen anjeto.
15 Benipe de7iya deretinne
zumati lo77o ayfen anjeto.
16 Enta biittay lo77obay kumida biitta gido;
tushiya giddon eexiya taman qoncida Goday iya anjo.
Ha anjoti ubbay Yoosefa kochaa gako;
I ba ishata giddon halaqa gido.
17 Yoosefi koyro yeletida kormada mino;
iya kaceti mentha kaceda mino.
Iya kaceti tammu mukulan taybetiya Efreema kochata;
mukulun taybetiya Minaase kochata.
He kacetan I kawotethata qaycana;
biitta gaxaa gakanaw I enta sugana.”
18 Zabloona kochaaba,
“Zabloona, neeni ne kessan ufayta;
Yisaakora, neeni ne dunkaaniyan ufayta.
19 Enti asaa banta zumako xeegana;
yan enti geeshshatetha yarsho yarshana.
Banta aquwanne banta duretetha,
abbaafenne abba gaxan de7iya shafiyape demmana” yaagis.
20 Gaade kochaaba,
“Enta biitta dalgisida Goday galatetto;
Gaadi morke som7o woyko qese menthanaw,
gaammoda naagees.
21 Enti lo77o biitta bantaw dooridosona;
halaqatas gida biitta enti ekidosona.
Isra7eele halaqati shiiqida wode,
Godaa geeshsha sheniya shaakidi eridosona
Isra7eeles suure pirdaa pirdidosona” yaagis.
22 Daane kochaaba,
“Daaney wodala gaammo mela;
I Baasanepe gupidi keyana” yaagis.
23 Niftaaleme kochaaba,
“Niftaalemey Godaa aadho keehatethan,
iya anjuwan duretis;
enta biittay Abbaafe dugeha bagga gakees” yaagis.
24 Aseera kochaaba,
“Aseeri hara kochatape aadhidi anjetidaysa;
ba ishatan dosetidaysa gido;
iya biittay shamaho zayten dureto.
25 Iya katamati birata pengen gordetidi naageto;
ba laytha ubban I wolqaama gido.
26 Isra7eele, salope nena maaddanaw,
ba gitatethan shaara bolla hemetiya,
ne Xoossaa mela xoossi oonee?
27 Merinaa Xoossay ne de7iya bessi;
iya merinaa kusheti neepe garsara de7oosona.
I ne morketa ne sinthafe kessidi,
‘enta dhaysa’ yaagis.
28 Hessa gisho, Isra7eele kochay,
salo iray bukiya bessan,
kathinne woyney kumida biittan,
hirgi bayna saro daana.
29 Isra7eele, ne anjetadaysa;
Goday ashshida ne meli oonee?
I new gondallenne maaddiya mashsha;
ne morketi ne sinthan gufannana;
ne enta baasuwa laallana” yaagis.