Erata Maxaafa
Gaatha Qofa
Erata maxaafan asa de7oy qanthi gideysa xalaala gidonashin, daaburan, dagaman, pirda geellatethaninne xoonetethan kumidaysa bessanaasa. Hessa gisho, xaafey, “Asa de7oy hada” yaagidi ba qofa qoncisees. Ha cinca uray, asa de7uwa wursethi gakanaw wochiya Xoossa oosuwa akeekanaw xoonetis. Gidoshin, asi ba de7ida laytha ubban baw danda7etidaba ubba minnidi oothanaw besseysanne Xoossay immidaban ufaytanaw koshsheysa zorees.
Era uraa qofatape daroti ulonne zoko gidida qofataninne ufaysa qanxon kumida qofata bessees. Gidoshin, ha maxaafay geeshsha maxaafaa bolla eqida ammanoy hari attoshin, gaahetonanne sidhen kumida qofata ba gaathan oykana gakanaw dalga gideysa bessees.
Ha erata maxaafay asa de7o mastooteda bessiya gisho, daro asati ha maxaafape minthetho demmidosona. Hessadaka, ha qofata oykida geeshsha maxaafay, de7os gita birshethi immiya Xoossan ufaysi oothana mela zorees.
Maxaafa Ayfe Qofata
Duussa birshethi (1:1—2:26)
Ubbabaas wodey de7ees (3:1-8)
Cincatethan de7a (3:9—6:12)
Wontoba oonika erenna (7:1—11:6)
Xoosse boncha iyaw kiiteta (11:7—12:14)
1
Ubbabay Hada
1 Haysi, Dawita na7aa, Yerusalaamen kawotida cinca uraa qaala.
2 He cincay, “Ubbabay hada;
ubbabay hadape hada;
ubbabay kumethi hada” yaagis.
3 Ba de7iya bessan ubban,
asi daaburidi oothiyaba ubban
iyaw wodhey aybee?
4 Issi yeletethi aadhiya wode, hara yeletethi bessaa oykees.
Shin ha biittay merinawuka laametonna de7ees.
5 Awi dolees wullees;
nam7antho dolanaw yaa doliya bessaa ellesees.
6 Carkoy issi toho duge issi toho pude carkees;
qassi yuuyi yuuyi aadhidi, simeretidi yees.
7 Goggiya haathi ubbay abban gelees;
shin abbay kumi erenna.
He haathay simmidi gogganaw,
guye ba pultiya bessaa bees.
8 Ubbabay salethiyaba;
I ay mela salethiyako odi wursanaw danda7etenna.
Ayfey xeellidi kalli erenna;
haythi si7idi, taw gidis geenna.
9 Kase hanidabay wontoka simmidi I hanana;
qassi ha77i hanishe de7eysi kase hanidaba.
Hessa gisho, salo gufanthon oorathabay aybika baawa.
10 Oonika, “Heko, haysi oorathaba” giiko, hessi oorathi gidenna;
hessi nuuni yeletanaape kase hanidaba.
11 Kase aadhida wodetan hanidabata zaaridi hassayabay baawa;
guyepe hananabata entafe guye oonika hassayenna.
Cincatethi Hada
12 Taani cincay, Yerusalaamen Isra7eeles kawo gidada de7as. 13 Taani sa7an de7iyaba ubbaa shaakada eranawunne cincatethan pilgada xeellanaw qofa qachas. Yaatada asa ubbaas Xoossay immida de7oy daro daabursiyabaanne ufaysonnaba gideysa akeekas. 14 Salope garsan hanidaba ubbaa taani be7as; shin ubbayka hada; carko oykanaw yedetheysa mela.
15 Geelli suuranaw danda7enna;
baynaba taybanaw danda7etenna.
16 Taani ta wozanan haysada yaagada qopas; “Taape kase Yerusalaame haarida ubbatape taani gitanne cinca gidas. Cincatethinne era guussi I aybeko paacada eras” yaagas. 17 Taani cincatethafe, gooshshatethafenne eeyatethafe giddon de7iya dummatethi aybeko eranaw daro daaburas. Shin wursethan hessika carko oykanaw yedetheysa mela hada gideysa eras.
18 Cincatethi dariya wode azzanthiyabay darees;
eri dariya wode qassi metoy darees.