31
Kawa Limu7eela Leemisota
1 Haysafe kaallidi xaafetida leemisoy, kawa Limu7eela aayiya kawa Limu7eela tamaarsidaysa.
2 Ta na7aw, ta ulope wodhidayso,
taani qangetada yelidayso,
3 maccasan ne wolqaa wursofa;
kawota dhaysiya maccasatan ne minotethaa dhaysofa.
4 “Limu7eela, woyne ushshi kawotas bessenna;
mathoyiya ushshi shuumatas bessenna.
5 Enti uyaa wode higge baloosona;
naaqetida asaa maata qelli goosona.
6 Mathoyaa ushshu hayqana haniya uraasinne
sa7i iitida uraas immite.
7 Enti banta manqotethaanne
banta waayiya doganaw uyo.
8 Banta gisho odetanaw danda7onna asaa gisho ne odeeta;
maaddiya asi baynayisata gisho ne eqa.
9 Enta miyen eqada entaw suure pirda;
manqotanne metootanchota maata naaga” yaagada tamaarsasu.
Wozanaama Macho
10 “Wozanaama macho ooni demmanaw danda7ii?
I gatey zo7o al7o shuchafe aadhees.
11 I azinay iyo ammanetees;
iyaw koshshiyabaape aybika pacenna.
12 Iya ba de7o laytha ubban,
iyaw lo77obaape attishin, iitaba oothuku.
13 Suufenne liino koyada,
ufaytashe ba kushen oothawusu.
14 Iya zal7anchota markabe mela;
ba kathaa haaho biittafe shiishawusu.
15 Iya ba soo asaas kathi giigisanawunne
ba macca aylletas ooso immanaw,
sa7i wontonna de7ishin dendawusu.
16 Lo77o gade koyada shammawusu;
ba kushen oothada demmida
miishen woyne tokawusu.
17 Iya ba xeessa minthada dancawusu;
ba qesiya oosos minthawusu.
18 Iya wodhe demmanaw minnada zal7awusu;
iya oothashe qamisiya gisho I xompey to7enna.
19 Iya ba hindziritiya oykawusu;
ba biradhen loythada suqawusu.
20 Iya manqotasinne metootanchotas immawusu.
21 I soo asa ubbay ho77iya ma7o ma7iya gisho,
shachi bukikoka iya hirguku.
22 Alga bolla hiixiya ma7o sikawusu;
liinope oosetida ocha teera daaniya ma7o ma7awusu.
23 Biitta cimati shiiqiya dubbushan
I azinay bonchetida asi.
24 Liinope ma7onne danco oothada,
zal7anchotas bayzawusu.
25 Iya minonne boncho asi;
yaana laytha ubban ufaytada de7awusu.
26 Cincatethan ba doona dooyawusu;
ammanthiya zorey I inxarsan de7ees.
27 Iya ba soo asaa de7uwa injeyanaw ubba wode oothawusu;
azallatethi I bolla bentidi erenna.
28 I nayti dendidi, iyo nashshoosona;
I azinay iyo yaagidi galatees;
29 Lo77oba oothiya daro maccasati de7oosona;
shin ne enta ubbaafe aadhasa” yaagees.
30 Mali cimmees;
yegelssatethi dhayana.
Shin Godaa yayiya maccasiya,
iya anjetidaaro.
31 Iya oothidaba ubbaas iyo woytite;
I ooso ubbay dabaaban iyo galatiso.