1 Taani zaarada, salope garsan ay mela naaqoy de7iyako be7as. Naaqeteysati minthetho dhayidi yeekosona. Naaqeyisata kushen maati de7iya gisho naaqeteyisata maaddey baawa. 2 Taani, “Ha77i paxa de7eysatape kase hayqidaysati lo77o” yaagas. 3 Gidoshin, ha nam7atape aadhidi yeletiboonaysatanne salope garsan oosetiya naaquwa be7onayisata qaaday lo77o.

4 Asa daaburinne amotidaba demoy, asas ba laggiya bolla de7iya qanaatepe pulteysa be7as. Hessika hada; carko oykanaw kaalo mela. 5 Ba kushe idimmidi uttiya azallay koshan hayqees. 6 Daaburaninne carko kaalon demmiya dakobaape wopan demmiya issi kushey lo77o.

7 Salope garsan hada gididaba haraba be7as. 8 Hessika na7i woyko ishi bayna issi bizza addey de7ees. Shin iya daaburas zawi baawa; baw de7iyaban alenna. I bana, “Ta haysa ooddes daaburayna? Taani tana ayis ufaysi diggadina?” yaagidi oychis. Hessika qassi hadanne meto de7o.

9 Banta oosuwan lo77o ayfe demmiya gisho issino gideysafe nam7a gideysi lo77o. 10 Nam7aafe issoy kundiko issoy denthees; shin barka de7iya uray kundiko iya denthey bayna gisho iya ayye! 11 Nam7ay issife zin7iko ho77ees; shin barka zin7iya uraa waanidi ho77anaw danda7ii? 12 Issi asi barka teqanaw danda7onna metuwa nam7u asati teqanaw danda7oosona. Heedzu ayfen dooqetida wodoroy elle duuxenna.

13 Zore ekonna eeyanne ceega kawuwape manqonne cinca gidida na7atetha kawoy lo77o. 14 He na7atethay qasho keethafe keyidi woyko manqotethafe dendidi kawo gidanaw danda7ees. 15 Salope garsan de7iyanne simeretiya asa ubbay kawa laattiya na7atetha kaalleysa be7as. 16 Issi kawoy haariya asaa tayboy daro gidanaw danda7ees. Shin kaalliya yeletethay iya kawotethan ufaytibeenna. Hessika hada; carko oykanaw kaalo mela.