1 Xoossa keethi geliya wode akeekada tanga. Enti banta iita oosuwa eronna gisho, si7anaw shiiqoy eeyata yarshuwafe aadhees. 2 Odetanaw eesotopa; Xoossa sinthan odetanaw ne wozanan dirgofa. Xoossay salona, neeni sa7ana; hessa gisho, ne qaalay guutha gido. 3 Qofi dariya wode amuhoy darees; oda daroy eeyatethi qoncisees. 4 Xoossas gepidaba polanaw gam7ofa; eeyatan Xoossay ufaytenna. Hessa gisho, neeni gepidaba ubbaa pola. 5 Issiba gepidi polonna agganaape koyro geponna agoy lo77o. 6 Nagaran nena gelsonna mela ne inxarsa yeda oothofa. Xoossa keethan ootheysako, “Koyro haysa taani akeekona gepas” goopa. Hessi Xoossa daro hanqethiya gisho, ne kushe ooso ubbaa I ba hanquwan dhaysanaw danda7ees. 7 Daro amuhoynne daro odi hada. Hessa gisho, Xoossaa yayya.

8 Issi biittan manqoti naaqetishin, pirdi geellatishin neeni be7iko malaaletofa. Issi issi halaqaas iyape bollara shuumetidi iya xeelliya hara halaqi de7ees. Qassi entafe bollara shuumetidi enta xeelliya hara halaqati de7oosona. 9 Biittafe bentiya wodhey ubbaasa; hari attoshin, kawoyka goshshafe go7etees.

10 Bira dosiya uraas biri gidi erenna; duretethi siiqiya uray miishe kalli erenna; he ubbay hada. 11 Duretethi dariya wode miya asi darees. Ba shaluwa coo ayfen xeellidi, “Taani dure” gaanape haraba ay maaddii?

12 Ooso oothiya asi guuthu min daro min, saro dhisko dhiskees; shin durey ba duretethaas ubba wode un7etiya gisho dhisko dhayidi de7ees.

13 Salope garsan daro azzanthiyaba haraba taani be7as. Hessika iita wode bana asho gidi minjida shalo, 14 woyko issi iitabay gakin dhayida duretethi. I na7a yelidaba gidikoka na7aa laatisiyaba dhayidi mela attees. 15 Asi ubbay kallo yeletidaysada mela kushe simmidi baana. Ay mela I daaburidi oothikoka ekidi biyabay baawa.

16 Asi kallo yeletidi kallo guye simmeysi daro azzanthiya iitabaa. Iya daabura ubbay carko oykiyabada hada gidiko iya ay maaddii? 17 I ba laytha ubbaa dhuma de7on, azzanon, yeellan, hargeninne yilon wursees.

18 Hiza, taani akeekida issi lo77obay, salope garsan Xoossi asas immida qantha laythan, asi ba daaburaape midi uyidi ufayteysi lo77onne bessiyaba; iya qaaday hessa. 19 Xoossi asas duretethinne shalo immey, ba daabura gatiya demmidi, midi uyidi ufaytana melasa; hessika Xoossaafe iyaw imetida imota. 20 Xoossi iya wozanan ubba wode ufaysi kunthiya gisho I ba de7o laythaba daro qopenna.