1 Salope garsan asa bolla gakiya daro iitabaa taani be7as. 2 Xoossi asas shalo, duretethinne boncho immees; iyaw koshshiyabaape issibaaka pacisenna. Shin iyaw imetida shaluwaninne duretethan ufaytana mela kumetha maata immenna. Hessa xalaala gidonashin I daaburidi demmidaban hari ufaytana mela oothees; hessika hadanne azzanthiya iitabaa.

3 Issi asi xeetu na7a yelidi, adussa laythi de7idi cimanaw danda7ees. Shin I baw imetidaban ufaytonnanne wursethan bonchon moogetonna attiko iyape boshi lo77o gayis. 4 He boshay coo yeletidi oonika hassayonna dhumaa biya gisho iya sunthay dhuman kametidi attees. 5 I, awa poo7o be7onna woyko aybibaaka eronna attikoka he uraape aadhidi iyaw shempoy de7ees. 6 Hessa gisho, ufaysi bayna nam7u mukulu laythi de7iya asape he bosha qaaday lo77o. Wursethan nam7ay issi bessi boosona.

7 Asi daaburidi oothiya ubbay baw miyaba demmanaasa; shin iya amoy ali erenna. 8 Yaatin, cinca asi eeya asape aybin dummatii? Manqoy daro cincidi, harata sinthan waanidi daaneko eroy iya ay maaddii? 9 Amon xuugetanaape ayfen be7oy lo77o;*Ayfen be7oy lo77o: asi amon xuugetishe daanape baw de7iyaban alidi de7o guussu. hessika carko oykanaw kaalo mela hada.

10 Haniyaba ubbay koyrottidi eretidi de7ees. Issi issi asi waananaw de7iyako adussa wodepe kase eretidi uttis. Ay asika baape minneysara baaxetanaw danda7enna. 11 Odi dariya wode hadabay darees; yaatin hessi ase ay maaddii?

12 Hada gididi kuyada coo aadhiya ba guutha laytha asi waatidi aathanaw koshshiyako erey oonee? Asi hayqidi aggin salope garsan hananaw de7iyaba asas odanaw danda7ey oonee?